ހުޅުމާލެ ހޮސްޕިޓަލްގެ އޮޑިޓް؛ ބޭސް ފިހާރައާ ކެންޓީނުން ކުލި ނުދައްކާ، އުސޫލާ ޚިލާފަށް ބިން ދޫކުރި

އެއްބަސްވުމެއް ނެތި ބޭސް ފިހާރައެއް ހިންގުމަށް ހުޅުމާލެ ހޮސްޕިޓަލްގެ ގޯތީގެ ބިމުން ބައެއް ކުންފުންޏަކަށް ދޫކޮށްފައިވާ ކަމަށާ ކުއްޔަށް ދޫކޮށްފައިވާ ބޭސްފިހާރަތަކުންނާއި ކެންޓީނުން ލިބެން ޖެހޭ މިލިއަނަކަށްވުރެ ގިނަ ރުފިޔާ ހޯދާފައިނުވާ ކަމަށް އޮޑިޓަރު ޖެނެރަލްގެ އޮފީހުން ބުނެފި އެވެ.

އެ އޮފީހުން މިއަދު ވަނީ ހުޅުމާލެ ހޮސްޕިޓަލްގެ 2021 ވަނަ އަހަރުގެ މާލީ ބަޔާންތަކުގެ އޮޑިޓް އަދި 2020 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓް ނެރެފަ އެވެ. އެ ރިޕޯޓްގައި ވަނީ މާލީ ގިނަ މައްސަލަތަކެއް ފާހަގަކޮށްފަ އެވެ.

އެގޮތުން އެއްބަސްވުމެއް ނެތި ބޭސް ފިހާރައެއް ހިންގުމަށް ހުޅުމާލެ ހޮސްޕިޓަލްގެ ގޯތީގެ ބިމުން ބައެއް ކުންފުންޏަކަށް ދޫކޮށްފައިވާ ކަން ވަނީ ފާހަގަކޮށްފަ އެވެ. އަދި ކުއްޔަށް ދޫކޮށްފައިވާ ބޭސްފިހާރަތަކުންނާއި ކެންޓީނުން ލިބެން ޖެހޭ 1,739,375 ރުފިޔާ ހޯދުމަށް މަސައްކަތް ކޮށްފައިނުވާ ކަމަށް ވަނީ ބުނެފަ އެެވެ.

އަދި ހުޅުމާލެ ހޮސްޕިޓަލްގެ މިލްކިއްޔާތުގެ ބަޔާނުގައި 2021 ވަނަ އަހަރު ނިމުނުއިރު އާސަންސަ ފިޔަވައި ހުޅުމާލެ ހޮސްޕިޓަލަށް ލިބެން ޖެހޭ ފައިސާގެގޮތުގައި ދައްކާ 9,423,221 ރުފިޔާ ހޯދުމަށް ދައުލަތުގެ މާލިއްޔަތުގެ ގަވާއިދާ އެއްގޮތަށް އަމަލުކޮށްފައިނުވާ ކަމަށް ވެސް ބުނެފައިވެ އެވެ.

އެއްބަސްވުންތައް މާލެ ގްރޫޕް އޮފް ހޮސްޕިޓަލްގެ ދަށަށް ބަދަލެއް ނުކުރޭ

އޮޑިޓް ރިޕޯޓްގައި ބުނެފައިވާ ގޮތުން ހުޅުމާލެ ހޮސްޕިޓަލް އާސަންދައިގެ ދަށުން މާލެ ގްރޫޕް އޮފް ހޮސްޕިޓަލްސްގެ ދަށަށް ބަދަލުވީ ނަމަވެސް އާސަންދައިގެ ދަށުން ހިނގަމުން ދިޔައިރު ކުއްޔަށް ދީފައިވާ ހުޅުމާލެ ހޮސްޕިޓަލްގެ ދެ ބޭސް ފިހާރައާ ކެންޓީންގެ އެއްބަސްވުން ހުޅުމާލެ ހޮސްޕިޓަލްގެ ނަމަށް ބަދަލެއް ނުކުރެ އެވެ.

އެހެން ކަމަުން އެކަން އިސްލާހް ކުރުމަށް ރިޕޯޓްގައި ވަނީ އަންގާފަ އެވެ. އަދި ހުޅުމާލެ ހޮސްޕިޓަލަށް ލިބެން ޖެހޭ ފައިސާގެ ތެރެއިން ނުލިބިހުރި ފައިސާ އެކަށީގެންވާ މުއްދަތެއްގެ ތެރޭގައި ހޯދުމަށް އިދާރާތަކާއި މަޝްވަރާކޮށް އަވަސް ފިޔަވަޅުތަކެއް އެޅުމަށް ވަނީ އަންގާފަ އެވެ.