ފަލަސްތީނު މެޗްގެ ފުރަތަމަ ސްވެނިއާ ޓިކެޓް ބައްލަވައިގަތީ ރައީސް މުޢިއްޒު

ފަލަސްތީނާ ދިވެހިރާއްޖެ މިއަދު ބައްދަލުކުރުމަށް ހަމަޖެހިފައިވާ މެޗްގެ ފުރަތަމަ ސްވެނިއާ ޓިކެޓް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބައްލަވައިގަނެފިއެވެ.

ފުޓްބޯޅް އެސޯސިއޭޝަން އޮފް މޯލްޑިވްސްއިން ކުރި ޕޯސްޓެއްގައި ވަނީ މިކަން ހާމަކޮށްފައެވެ. މިރޭގެ މެޗްގެ ފުރަތަމަ ޓިކެޓް ރައީސް ޑރ.މުއިއްޒު ބައްލަވައިގަތްއިރު، އެމަނިކްފާނަށް ޓިކެޓް އެރުވީ، ރައީސުލްޖުމްހޫރިއްޔާގެ އޮފީހުގައި އެފްއޭއެމްގެ ރައީސް އަހުމަދު ތޯރިގް (ޓޮމް) އެވެ.

ފަލަސްތީނާ ރާއްޖެ ބައްދަލުކުރާ މެޗްގެ ޓިކެޓް މިހާރު ވިއްކަން ފަށާފައިވާއިރު، މިރޭގެ މެޗް ފެށުމަށް ހަމަޖެހިފައިވަނީ 20:30 ގައެވެ. ފަސޭހަކަމާއެކު ޓިކެޓް ލިބޭނޭ އިންތިޒާމް ހަމަޖެއްސުމުގެ ގޮތުން އެފްއޭއެމުން ވަނީ، މޯބައިލް ނަމްބަރު 7507006 އަށް ވައިބަރ ނުވަތަ ވަޓްއަޕަށް މެސެޖުކޮށްގެން ޓިކެޓް ގަނެވޭނޭ އިންތިޒާމު ހަމަޖައްސާފައެވެ.

ގަލޮޅު ދަނޑުން މިއަދު ހެނދުނު 9 އަކުން ފެށިގެން 12:00 އަށް އަދި މެންދުރުފަހު 14:00 އިން ފެށިެގން 18:00 އަށް ޓިކެޓް ވިއްކަމުންދާނެއެވެ. އެފްއޭއެމުން ވަނީ ފަލަސްތީނު ޓީމަށް އެހީތެރިވުމަށްޓަކައި މިމެޗްތަކަށް ހާއްސަ ސްވެނިއަރ ޓިކެޓްތަކެއް ވިއްކުމަށް ނިންމާފައެވެ. އެގޮތުން ސްވެނިއަރ ޕްލެޓިނަމް ޓިކެޓް 1000 ރުފިޔާއަށް ވިއްކުމަށް ނިންމާފައިވާއިރު، މީގެ ތެރޭގައި ހިމެނެނީ ވީވީއައިޕީ (ރޮސްޓްރަމް) ގެ 50 ޓިކެޓެވެ. މީގެ އިތުރުން ދެން ހިމެނެނީ 200 ސްވެނިއަރ ގޯލްޑް ޓިކެޓެވެ. މި ޓިކެޓްތައް ވިއްކުމަށް ނިންމާފައިވަނީ، 500 ރުފިޔާއަށެވެ.

އެފްއޭއެމުން ފަލަސްތީނުމެޗް ޓިކެޓް ވިއްކިނަމަވެސް ގަލޮޅުދަނޑަށް ކުޅިބަލަން ހިލޭ ވަނުމުގެ އިންތިޒާމުވެސް ވަނީ އާއްމުކޮށް ހުޅުވާލާފައެވެ

ފަލަސްތީނުން ރާއްޖޭގައި ކޭމްޕްކޮށްފައިވަނީ އޭޝިއަންކަޕް ކޮލިފައިންގައި އެޓީމް ކުޅެންޖެހޭ މެޗްގެ ކުރިން ތަމްރީނުތައް ހަދައި ރާއްޖޭގެ ޤައުމީޓީމާއެކު އެކުވެރިކަމުގެ މެޗްތަކެއް ކުޅުމަށެވެ. ފަލަސްތީނު ޓީމް ރާއްޖެ އައުމަށް ރައީސް ހުއްދަ ދެއްވިއިރު އެޓީމަށް އެ ފުރުސަތު ދީފައިވަނީ ޢައްޒާ ހަނގުރާމައާ ގުޅިގެން ފަލަސްތީނުގައި ފަރިތަކުރުންތައް ކުރިއަށްގެންދާނޭ ރައްކާތެރި މާހައުލެއް ނެތުމުންނެވެ. އޭއެފްސީ ކަޕް ކޮލިފައިން މެޗްތައް އޮންނާނީ މިމަހުގެ 22 އިން 30 އަށް ތައިލޭންޑްގެ ޗޮންބުރީގައެވެ.