ތިލަމާލެ ބްރިޖުގެ މަސައްކަތް އެއްކޮށް ނިމޭނީ އަންނަ އަހަރު: މުއްޠަލިބު

'ތިލަމާލެ ބްރިޖު'ގެ މަޝްރޫއު އެއްކޮށް ނިމޭނެ ކަމަށް މިހާރު ލަފާކުރެވެނީ އަންނަ އަހަރު ކަމަށް އިމާރާތް ކުރުމާ ބިނާރާ ބެހޭ ވަޒީރު ޑރ. އަބްދުالله މުއްޠަލިބު ރޭ ވިދާޅުވެއްޖެ އެވެ.

ޕީއެސްއެމްގެ 'ރާއްޖެ މިއަދު' ޕްރޮގްރާމުގައި ވާހަކަ ދައްކަވަމުން ވަޒީރު ވިދާޅުވީ ބްރިޖުގެ މަސައްކަތް މިހާރު ކުރިއަށްދަނީ ބޭނުންވާ ސްޕީޑުގައި ނޫން ކަމަށެވެ.

އެހެން ދިމާވީ، ޕްރޮޖެކްޓު ކުރިއަށް ގެންދިޔުމުގައި ކޮންޓްރެކްޓަރަށް ވެސް ދަތިތައް ދަތިތަކާ ކުރިމަތިވެފައިވާތީ ކަމަށް ވަޒީރު ވިދާޅުވިއެވެ.

އެންމެ ބޮޑު ދައްޗެއްގެ ގޮތިގައި ފާހަގަކުރެވެނީ އެ ބޭފުޅުންނަށް، މިދިޔަ ސަރުކާރު ނިމެނިކޮށް 30 މަހުގެ މުއްދަތު އިތުރުކޮށްދީފައި އެބައޮތް އިތުރު ފައިސާ ދިނުމަކާ ނުލާ. އޭގެ ސަބަބުން 100 މިލިއަން ޑޮލަރަށް ވުރެ ބޮޑު ހަރަދެއް އެބޭފުޅުންގެ އަތުން ދާ ކަމަށް ބުނެފައިވަނީ.

މުއްޠަލިބު

"ނަމަވެސް އެ މުއްދަތު ދީފައި އޮތީ ދައުލަތުން ޒިންމާވާންޖެހޭ ކަމެއްގެ ސަބަބުންނެއް ނޫން. ކޮންޓްރެކްޓަރުގެެ ޕާފޯމަންސް ދަށްވެގެން ކޮންޓްރެކްޓަރުގެ ޒިންމާގެ ދަށުން އަންނަ ޑިލޭއަކަށް ދައުލަތުން ޒިންމާވާކަށް ނުޖެހޭނެ،" މުއްޠަލިބު އިތުރަށް ވިދާޅުވި އެވެ.

މިއާއެކު ވަޒީރު ވިދާޅުވީ، ބްރިޖުގެ މަސައްކަތް އަވަސްކުރުމަށް އިންޑިއާ ސަރުކާރާ އެކުވެސް މަޝްވަރާތަކެއް ކުރިއަށްދާ ކަމަށެވެ.

"މަސައްކަތް ކުރިއަށް އެބަދޭ. ވިލިމާލެ އާއި މާލެއާ ގުޅާލުމުގެ ކުލަމަތި ވެސް ފެންނަމުން އެބަދޭ. އެ ސެގްމެންޓުތައް އެޓޭޗު ކުރަމުން އެ ދަނީ. އެހެންވީމާ އަޅުގަނޑުމެންނަށް އަދިވެސް އަވަސްކުރެވޭނެ ގޮތެއް އޮތްތޯ ބަލަމުން މިދަނީ.،" އޭނާ ވިދާޅުވި އެވެ.

ވަޒީރު ވިދާޅުވީ، މަސައްކަތް މިހާރު ކުރިއަށްދާ ގޮތަށް ބަލާއިރު މި އަހަރު ނިމެންވާއިރަށް ވިލިމާލެއަށް ގުޅުވާލެވޭނެ ކަމަށެވެ.

"މިހާރު އޮތް ގޮތުން ވިއްޔާ މި އަހަރު ނިމޭއިރަށް ގާތްގަނޑަކަށް ވިލިމާލެއާ ހަމައަށް ގުޅާލެވޭނެ ކަމަށް ބަލަނީ. ނަމަވެސް އަޅުގަނޑުމެން ބޭނުންވަނީ މިހާރު ގުޅިފަޅު ވެސް އާބާދުވަމުން އަންނާތިއްޔާ އެއްކޮށް އިންޑިއާ ސަރުކާރާއި ކޮންޓްރެކްޓަރާ އެކީ މަސައްކަތްކޮށްގެން ވީހާ ވެސް އަވަހަކަށް ކުރަން،" މިނިސްޓަރު ވިދާޅުވި އެވެ.

"ޕްރޮޖެކްޓު ނުހުއްޓި ކުރިއަށް އެބަދޭ. މިހާރު ދާ ގޮތަށް ދާ ކަމަށް ވަންޏާ 2027 ވަނަ އަހަރު ޕްރޮޖެކްޓު ނިމޭނީ."

މި މަޝްރޫއުގައި މާލެއިން ގުޅީފަޅަށް އަޅާ ބްރިޖުގެ މަސައްކަތް ނިމޭ ތާރީހަކަށް މީގެ ކުރިން ދީފައި އޮތީ 31 މާޗް 2026 އެވެ. އަދި ގުޅީފަޅުން ތިލަފުއްޓަށް އެ މަސައްކަތް ނިމޭނެ ތާރީހަކަށް ދީފައި އޮތީ 30 ސެޕްޓެމްބަރ 2026 އެވެ.