މިނިސްޓްރީއާއި ހަވާލުވެފައި އެންމެ ފުރަތަމަވެސް ކުރި ކަމަކީ މިނިސްޓްރީ އޮޑިޓު ކުރުން: ވަޒީރު ރާފިޢު

ނިމިދިޔަ ސަރުކާރުގައި، ކުޅިވަރާއި ބެހޭ ވުޒާރާއިން ހިންގާފައިވާ އެކިއެކި ފައިސާގެ މުޢާމަލާތާއި ގުޅޭ އޮޑިޓެއް ހަދާފައިވާ ކަމަށް ކުޅިވަރާއި ބެހޭ ވަޒީރު އަބްދުالله ރާފިޢު ވިދާޅުވެއްޖެއެވެ.

ވަޒީރު މިހެން ވިދާޅުވީ މަޖިލީހުގެ މިއަދުގެ ޖަލްސާގައި އެކަމާއި ގުޅޭގޮތުން، ވިލިމާލޭ ދާއިރާގެ މެންބަރު މުހައްމަދު އިސްމާޢީލް ކުރެއްވި ސުވާލަށް ޖަވާބުދެއްވަމުންނެވެ.

އެމްޑީޕީ ވެރިކަމުގައި 600 މިލިއަނެއްހާ ރުފިޔާ ޚަރަދުކޮށްފައި އެބަހުރި. ހުރިއިރުގައި ތިތަނުގައި އިންޓާނަލް އޮޑިޓެއް ހައްދަވައިފިންތޯ އެމްޑީޕީ ކުދިންގެ ޖީބަށް، މިނިސްޓަރުގެ ޖީބަށް ލީ ކިހާވަރެއްތޯ ބަލާލަން. ހެދިފައި އޮތް ނަމަ އެ މައްސަލަ ޝަރީއަތަށް ފޮނުވާނީ ކޮންއިރަކުންތޯ

މުހައްމަދު އިސްމާޢީލް

އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ، މިނިސްޓްރީއާއި ހަވާލުވުމަށްފަހު، އެންމެ ފުރަތަމަވެސް ކުރެއްްވި ކަމަކީ އެ މިނިސްޓްރީ އޮޑިޓް ކުރުމުގެ މަސައްކަތް ކަމަށެވެ.

އޮޑިޓަރ ޖެނެރަލްގެ އޮޑިޓް އޮފީހުން އެންމެ ފުރަތަމަވެސް އަޅުގަނޑުމެންގެ އޮފީސް އޮޑިޓް ކުރީ. އެ ރިޕޯޓް އިރާދަކުރެއްވިއްޔާ އަޅުގަނޑު އުއްމީދު ކުރަނީ ހާމަވެގެންދާނެ ކަމަށް އޮޑިޓަރ ޖެނެރަލްގެ އޮފީހުން.

ކުޅިވަރާއި ބެހޭ ވަޒީރު އަބްދުالله ރާފިޢު

މިއާއެކު ވިލިމާލޭގެ ވޮލީކޯޓާއި, ބާސްކެޓް ބޯޅަ ކޯޓުގެ ހަލާކުވެފައިވާ ކަމަށާ އަދި އެންމެ ފުޓުބޯޅަދަނޑެއް އޮންނާތީ އެކަމުގެ ސަބަބުން ދިމާވާ ދަތިތަކާއި ގުޅޭ ގޮތުން މެންބަރު މުހައްމަދު އިސްމާއީލް ވަޒީރާއި ސުވާލުކުރައްވާފައިވާއިރު، އެ ސުވާލަށް ޖަވާބު ދެއްވަމުން ވަޒީރު ވިދާޅުވީ، ވިލިމާލޭ ބެޑްމިންޓަން ކޯޓް ކައިރީގައި ބިމެއް އޮތް ކަމަށާ، ސްޕޯޓްސް ކޮމިޔުނިޓީއާއި ގުޅިގެން އެ ބިމުގައި އިތުރު ދަނޑެއް އެޅުމަށް ހޯދުމުގެ މަސައްކަތް ކުރައްވަމުންދާ ކަމަށެވެ.

އަދި ބާސްކެޓް ބޯޅަ ކޯޓެއް އެޅުމަށް ޕްރޮޕޯސަލް ލިބެމުންދާ ކަމަށާ، އެކަން އިއުލާން ކޮށްގެން ކުރިއަށް ގެންދާގޮތަށް ނިންމަވާފައިވާ ކަމަށްވެސް ވަޒީރު ރާފިޢު ވިދާޅުވިއެވެ.