”ފާއިތުވި 10 އަހަރަށްވުރެ ގިނައިން ވަޒީފާގެ ފުރުސަތުތައް ނުކުޅެދުންތެރިކަން ހުންނަ ފަރާތްތަކަށް ފަހިކޮށްދެވިއްޖެ“

ފާއިތުވި 2 އަހަރު ކުރެވުނު އެންމެ ބޮޑު އެއް މަސަތްކަތަކީ ނުކުޅެދުންތެރިކަން ހުންނަ ފަރާތްތައް އިޤްތިޞާދީ ގޮތުން ބާރުވެރިކުރުވުން ކަމަށާ، އެގޮތުން 360 އަށްވުރެ ގިނަ ފަރާތަކަށް ވަޒީފާގެ ފުރުސަތު ފަހިކޮށްދެވިފައިވާކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް ވިދާޅުވެއްޖެއެވެ.

ނޭޝަނަލް އެކްޝަން ޕްލޭން އޮން ޑިސިބިލިޓީ އިންކުލޫޝަން އިފްތިތާޙް ކުރުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ، ނޭޝަނަލް އެކްޝަން ޕްލޭން އޮން ޑިސިބިލިޓީ އިންކުލޫޝަންއަކީ ނުކުޅެދުންތެރިކަން ހުންނަ ފަރާތްތައް ހުރިހާ ސަފެއްގައި ބައިވެރިވުން އިތުރުކޮށް ޝާމިލް މުޖުތަމަޢުއެއް ބިނާ ކުރުމަށް އެޅިގެންދާ ވަރުގަދަ ބިންގަލެއް ކަމަށެވެ.

ނުކުޅެދުންތެރިކަމަކީ އިންސާނީ ހައްގުތަކާއި، ގައުމުގެ ތަރައްގީއާ ގުޅިފައިވާ މުހިންމު ކަމަކަށް މިއަދު ވަނީ ބަދަލުކުރެވިފައި. ނުކުޅެދުންތެރިކަން ހުންނަ ފަރާތްތައް ބާރުވެރިކޮށް އެފަރާތްތަކުގެ ހައްގުތައް ކަށަވަރުކުރުމަކީ އަދުގެ ސަރުކާރުން ވަރަށްބޮޑު އިސްކަމެއްދީގެން ކުރަމުންއަންނަ މަސައްކަތެއް.

އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް

ވަޒީރު ވިދާޅުވީ، ނުކުޅެދުންތެރިކަން ހުންނަފަރާތްތަކާއެކު ގާތުން މަސައްކަތްކޮށް،  އެފަރާތްތަކުގެ ހައްގުތައް ކުރިއަރުވައި، ބޭނުންވާ ޚިދުމަތްތަކާއި ފަރުވާ ފޯރުކޮށްދިނުމަށާ، އެފަރާތްތައް އިގްތިޞާދީގޮތުން ބާރުވެރި ކުރުވުމަށް ފުރުސަތުފަހިކޮށްދިނުމަށް އަދުގެ ސަރުކާރުން ގިނަ މަސައްކަތްތަކެއް ކުރަމުންދާ ކަމަށެވެ.

އެގޮތުން މައިމީހާގެ ބަނޑުގައި ދަރިފުޅު ޣަރުބަގަތީއްސުރެ، އެކުއްޖާގެ ކިބާގައި ނުކުޅެދުންތެރިކަމެއް ހުރިތޯ ދެނެގަތުމަށާ، ޅަފަތުގެ ދައުރުން ފެށިގެން ސުކޫލްގެ ދައުރުގަޔާއި، މަތީ ތައުލީމާއި ވަޒީފާގެ މާހައުލަށް ނުކުތުމަށާއި، އަދި އެ ވަޒީފާގައި ދެމިހުރުމަށް ބޭނުންވާ އެހީތެރިކަން ފޯރުކޮށްދިނުމަށް ގިނަގުނަ މަސައްކަތްތަކެއް ދަނީ ކުރެވެމުން

އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް

ވަޒީރު އިތުރަށް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ޚާއްޞަ އިސްކަމެއް ދެވިގެން ފާއިތުވި 2 އަހަރު ކުރެވުނު އެންމެ ބޮޑު އެއް މަސަތްކަތަކީ ނުކުޅެދުންތެރިކަން ހުންނަ ފަރާތްތައް އިޤްތިޞާދީ ގޮތުން ބާރުވެރިކުރުވުން ކަމަށެވެ.

މިގޮތުން މިފަރާތްތަކަށް ވަޒީފާ ކަށަވަރު ކުރުމުގެ ފުރުސަތު ފަހިކޮށްދިނުމުގެ ގޮތުން، ރައީސް މުޢިއްޒުގެ އިސްނެންގެވުމާއެކު މިދައުރުގައި މިހާތަނަށް 367 ފަރާތަކަށް ސަރުކާރުގެ އެކި އިދާރާތަކުން ވަޒީފާ ހަޖައްސައިދެވިފައިވާކަން އުފަލާއެކު ފާހަގަކުރަން. މިއީ ފާއިތުވި 10 އަހަރުގެ ތެރޭގައި ފޯރުކޮށްދެވިފައުވާ ފުރުސަތުތަކަށްވުރެ އިތުރު އަދަދެއް

އިޖުތިމާޢީ އަދި ޢާއިލީ ތަރައްޤީއާ ބެހޭ ވަޒީރު ޑރ. ޢާއިޝަތު ޝިހާމް

މީގެ އިތުރުން ނުކުޅެދުންތެރިކަން ހުންނަ ފަރާތްތައް ވަޒީފާގެ މާހައުލަށް ނުކުތުމަށް ބޭނުންވާ ތަމްރީނުތައް ދިނުމަށް ކަމުގެ ތައުލީމާއި ތަޖުރިބާހުރި ފަރާތްތައް މެދުވެރިކޮށް ތަމްރީނުތައް ކުރިއަށް ގެންދިޔުމުގެ މަސައްކަތްވެސް ފަށާފައިވާ ކަމަށް ވަޒީރު ވިދާޅުވިއެވެ. އެގޮތުން، ކެއާ ސޮސައިޓީއާއި، ޕޮލިޓެކްގެ އިތުރުން ރިސޯޓްތަކާއި ގުޅިގެންވެސް ގިނަ މަސައްކަތްތަކެއް ކުރެވުފައިވާކަން ވަޒީރު ފާހަގަކުރެއްވިއެވެ.

އެ ތަމްރީނު ތަކުގެ ސަބަބުން ބައެއް ފަރާތްތަކަށް ދާއިމީ ވަޒީފާ ހަމަޖެހި، އެ ފަރާތްތައް އިްގތިޞާދީގޮތުން ބާރުވެރިކުރުވިފައިވާ ކަމަށް ވަޒީރު ވިދާޅުވިއެވެ.