ހއ.ދިއްދޫ ބިން ހިއްކާ ޑްރެޖަރު އެރަށަށް ބަނދަރުކޮށްފި

ހއ. ދިއްދޫ އެއާޕޯޓު މަސައްކަތްކުރުމަށާއި، އިތުރު ވަސީލަތްތައް ގާއިމުކުރުމަށް ރަށަށް އިތުރުކުރާ ބިން ހިއްކުމަށް ރާއްޖެ ގެނައި ދު ޑްރެޖަރު މިއަދު އެ ރަށުގައި ބަނދަރުކޮށްފިއެެވެ.

މިއީ މުޅި ދުނިޔެއިންވެސް 3 ވަނަ އަށް އެންމެ ބޮޑު ޑްރެޖަރެވެ.

ދިއްދޫގައި އެއާޕޯޓު އެޅުމުގެ މަޝްރޫއަކީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު 2023 ވަނަ އަހަރުގެ ރިޔާސީ އިންތިހާބުގައި އެރަށުގެ ރައްޔިތުންނަށް ވެވަޑައިގެންފައިވާ ވައުދުފުޅުގެ މަތިން ކުރިއަށް ގެންދާ މަޝްރޫއެކެވެ.

މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އިން ހިންގާ މި މަޝްރޫޢުގައި ދިއްދޫގެ މިހާރުގެ ބިމަށް ވުރެ ބޮޑު ސަރަހައްދެއް ހިއްކުމަށް ވަނީ ހަމަޖެހިފައެވެ. އެގޮތުން އެރަށުން ޖުމުލަ 110 ހެކްޓަރުގެ ބިން ހިއްކާ، އެ ބިިން ބޯހިޔާވަހިކަމުގެ މަޝްރޫޢު ހިންގުމާއި  އެއާޕޯޓް އެޅުމަށް ބޭނުންކުރަން ވަނީ ހަމަޖެހިފައެވެ.

މިކަމާއި ގުޅިގެން ދިއްދޫ ދާއިރާގެ ރައްޔިތުންގެ މަޖިލިސް މެންބަރު އަބްދުއްލަތީފު މުހައްމަދު ވިދާޅުވީ އިތުރުކުރެވޭ ބިމަކީ އެއާޕޯޓު ތަރައްގީކުރުމުގެ އިތުރަށްވެސް ރަށުގެ ތަރައްގީއަށް ބޭނުންވާ މުހިއްމު ގިނަ މަސައްކަތްތަކަށް މަގުފަހިކުރުމަށް ބޭނުންކުރެވޭނެ ބިމެއް ކަމަށެވެ. އަދި ހިއްކާ ބިމުގައި އެއާޕޯޓަށް ބޭނުންވާ އިތުރު ހިދުމަތްތަކާއި އައު ވިޔަފާރިތައް ގާއިމުކުރެވިގެންދާއިރު، ދިއްދޫ ރައްޔިތުންނަށް ގިނަ އަދަދެއްގެ ވަޒީފާގެ ފުރުސަތުތައް ލިބިގެންދާނެ ކަމުގައިވެސް މެންބަރު ދެކެވަޑައިގަންނަވައެވެ.

ރާއްޖޭގެ އެކި ހިސާބުތަކުގައި ބިން ހިއްކުމުގެ އެތައް މަޝްރޫއެއް މިހާރުވެސް ކުރިއަށް ދަމުން ދެއެވެ. އެގޮތުން ދުނިޔޭގެ އެންމެ ބޮޑު 3 ޑްރެޖަރުވެސް މިވަގުތު ރާއްޖޭގައި ބިން ހިއްކުމުގެ މަޝްރޫއުތަކުގައި ބޭނުންކުރެވެމުންދެއެވެ.