މި އަހަރު ވެސް އީދު ނަމާދު ކުރަން ފަށާނީ ހަތެއް ޖަހާއިރު

‏މިދިޔަ އަހަރެކޭ އެއް ފަދައިން މި އަހަރު ވެސް ޢީދު ނަމާދުގެ ޖަމާޢަތް ފަށާ ގަޑިއަކީ ހެނދުނު 7.00 ކަމަށް އިސްލާމިކް މިނިސްޓްރީން ބުނެފި އެވެ.

ޒަމާނުއްސުރެ ރާއްޖޭގައި އީދު ނަމާދު ކުރަނީ 7:30 ގަ އެވެ. ނަމަވެސް އީދު ނަމާދު ކުރާ ގަޑި މިދިޔަ އަހަރު ވަނީ ބަދަލުކޮށްފަ އެވެ.

އެއީ 7:00 އަށެވެ. އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ ‏މިދިޔަ އަހަރެކޭ އެއް ފަދައިން މި އަހަރު ވެސް ޢީދު ނަމާދުގެ ޖަމާޢަތް ފަށާ ގަޑިއަކީ ހެނދުނު 7.00 ކަމަށެވެ.

މިނިސްޓަރީން މިދިޔ އަހަރު ނިންމި ނިންމުމުގައި ބުނެފައި ވަނީ ދިވެހިރާއްޖޭގައި ޒަމާނުއްސުރެ އީދު ނަމާދު ކުރަމުން އައިސްފައިވަނީ ހެނދުނު 7:30 ގައި މިސްކިތްތަކުގައި ކަމުގައިވިޔަސް އެވަގުތަކީ އިރުއަރައި އިރުގެ ހޫނުކަން ގަދަވަމުން އަންނަ ވަގުތަކަށް ވެފައި މިހާރަކަށް އައިސް ރާއްޖޭގައި މައިދާންތަކާއި ހުސްބިންތަކުގައި އީދު ނަމާދު ކުރަމުން ގެންދާ ކަމަށެވެ. އަދި އީދު ނަމާދުގެ ޖަމާއަތަށް ހާޒިރުވާ ފަރާތްތަކުގެ ތެރޭގައި ތުއްތު ކުދީންނާއި އަންހެނުންނާއި މުސްކުޅިންނާއި ހާއްސަ އެހީއަށް ބޭނުންވާ ފަރާތްތައް ވެސް ހިމެނޭތީ އާއި ހޫނުގަދަވުމުގެ ސަބަބުން ތަކުލީފުތަކެއް އުފުލަން ޖެހޭތީ އާއި ކީރިތި ރަސޫލާގެ ސުންނަތުން ސާބިތުވާ ގޮތުން ވެސް އެކަލޭގެފާނު އީދު ނަމާދު ކުރައްވާފައި ވަނީ އިރުގެ ހޫނުކަން ގަދަވުމުގެ ކުރިން ލުހާ ވަގުތުގައި ކަން ފެންނަން އޮތުމާ އެކު ކީރިތި ރަސޫލާގެ ސުންނަތާއި އެކަލޭގެފާނުގެ އަސްހާބު ބޭކަލުންގެ އަމަލުފުޅުގައިވާ ގޮތަށް ތަބައަވުމަކީ މޮޅު އިތުރުގޮތް ކަމަށް ވާތީ އާއި އާންމު މަސްލަހަތަށް ރިއާޔަތް ކުރުމަށް ޝަރުއުގައި ކަނޑައަޅުއްވާފައިވާ ގަވާއިދުތަކަށް ރިއާޔަތްކޮށް މި އަހަރުން ފެށިގެން ރާއްޖޭ ގައި ފިތުރު އީދު ނަމާދާއި އަލްހާ ޢީދު ނަމާދުގެ ޖަމާއަތް ފަށާ ވަގުތަކީ ހެނދުނު 7:00 ކަމުގައި ކަނޑައަޅާފައިވާ ކަމަށެވެ.އީދު ނަމާދުގެ ޖަމާއަތް ފަށާ ވަގުތު އަވަސް ކުރުމަށް ނިންމާފައި ވަނީ ރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހާއި ދީނީ އިލްމުވެރިންނާ އިސްލާމީ ކަންތައްތަކާބެހޭ ވުޒާރާގައި ގާއިމުކުރެވިފައިވާ ފަލަކީ ހިސާބުތަކާބެހޭ ކޮމެޓީ އާއި މަޝްވަރާ ކުރުމަށް ފަހުގައި ކަމަށް ވެސް އެ ނިންމުގައި ވެ އެވެ.