ސީރިއާގެ ވެރިކަން ވެއްޓި، ރައީސް ބަޝާރުލްއަސަދު ގައުމު ދޫކޮށް ފިލައިފި

ސީރިއާގެ ރައީސް ބަޝާރުލްއަސަދުގެ 24 އަހަރުގެ ވެރިކަން ނިމިއްޖެ ކަމަށް އިއުލާންކޮށްފިއެވެ. އެއާއެކު އޭނާ މިހާރު ސީރިއާ ދޫކޮށް ފިލާފައިވާ ކަމަށް ބޭރުގެ މީޑިއާ ތަކުން ވަނީ ބުނެފައެވެ.

ސީރިއާގެ ރައީސް ބަޝާރުލްއަސަދުގެ ވެރިކަން ވެއްޓިފައިވާ ކަމަށް އެ ގައުމުގެ ސިފައިންގެ ވެރިން، އޮފިސަރުންނަށް އަންގާފައިވާ ކަމަށް ރޮއިޓާސްއަށް އިން ބުނެފައިވެއެވެ. މި ކުއްލި ބަދަލު އައިސްފައިވަނީ އިދިކޮޅުގެ ހަލުވި ހަމަލާތަކެއްގެ ސަބަބުންނެވެ.

އިދިކޮޅުގެ ބާރުގެ ދަށަށް ދިމިޝްޤު ގެނައުމާއެކު، އެމީހުންވެސް މިހާރު އަންނަނީ އަސަދުގެ ކިބައިން ދިމިޝްޤު މިހާރު މިނިވަންވެފައިވާކަމަށް ބުނެ އުފާ ފާޅުކުރަމުންނެވެ. އަދި އިދިކޮޅުން އަންނަނީ ދައުލަތުގެ މީޑިއާ މެދުވެރިކޮށް ސީރިއާގެ ރައްޔިތުންނާ މުޚާޠަބުކޮށް ފުރަތަމަ ބަޔާން ދޭން ތައްޔާރުވަމުންދާ ކަމަށްވެސް އިދިކޮޅުން ބުނެފައިވެއެވެ.

އަސަދުގެ ވެރިކަން ވެއްޓިފައިވާއިރު، އޭނާ، މިއަދު އިރާކޮޅުގެ ވަގުތެއްގައި ދިމިޝްޤުން ފުރައިގެން ގޮސްފައިވާ ކަމަށް އެގައުމުގެ ސިފައިންގެ ދެ އިސް އޮފިސަރުންނާ ހަވާލާދީ ރޮއިޓާސް އިން ބުނެފައިވެއެވެ. ނަމަވެސް އޭނާ ފިލަން ދިޔަ ތަނެއް ސާފެއް ނުވެއެވެ.

ފްލައިޓްރާޑާ ވެބްސައިޓުން ދައްކާ ގޮތުގައި، ވެރިރަށް އިދިކޮޅުގެ ބާރުގެ ދަށަށް ދިޔަކަމަށް ރިޕޯޓުކުރެވުނު ވަގުތާ ދިމާކޮށް، ސީރިއާ އެއަރގެ މަތިންދާބޯޓެއް ދިމިޝްޤު އެއަރޕޯޓުން ފުރައިގެން ގޮސްފައިވެއެވެ. އެ މަތިންދާބޯޓު ފުރަތަމަ ދަތުރުކުރީ ސީރިއާގެ ކޯސްޓަލް ސަރަޙައްދަކަށެވެ. މިއީ އަސަދުގެ އަލަވީ މަޛްހަބުގެ މީހުންގެ ނުފޫޒު ބޮޑު ސަރަޙައްދެކެވެ.

ނަމަވެސް، ކުއްލިއަކަށް މަތިންދާބޯޓު ޔޫ-ޓާނެއް ޖަހައި، އެއާ އިދިކޮޅަށް މިސްރާބު ބަދަލު ކުރިއިރު، މިނެޓުތަކެއްވަންދެން ދަތުރުކުރުމަށްފަހު މަތިންދާބޯޓް ވަނީ ޗާޓުން ގެއްލިފައެވެ. މި މަތިންދާބޯޓުގައި ތިބީ ކޮން ބައެއްކަން ޔަގީނެއް ނުވެއެވެ.

ސީރިއާގެ ރައްޔިތުން އުފާފާޅުކުރަމުންދާއިރު، ސީރިއާގެ ބޮޑުވަޒީރު މުޙައްމަދު ޣާޒީ އަލް-ޖަލާލީ ވަނީ ވެރިކަމުގެ އިންތިޤާލީ މަރުޙަލާ ކުރިއަށް ގެންދިއުމަށް ތައްޔާރަށް ހުރި ކަމަށާއި، ސީރިއާގެ ރައްޔިތުން އިޚްތިޔާރުކުރާ ކޮންމެ ވެރިކަމަކާއެކު މަސައްކަތްކުރުމަށް ތައްޔާރަށް ހުރި ކަމަށް ބުނެފައެވެ.