ސްޓޭޓް ފާމާގެ ފާމަސީތަކުން ލިބެންހުރި ބޭހުގެ މަޢުލޫމާތު ބެލޭ ޕޯޓަލެއް ސެޕްޓެމްބަރުގައި ލޯންޗުކުރަނީ
ސްޓޭޓް ފާމާގެ ފާމަސީތަކުން ލިބެން ހުރި ބޭހާއި އެ ބޭސް ހުރި ތަންތަނުގެ މަޢުލޫމާތު އެއް ޕްލެޓްފޯމަކުން ފެންނާނެ ޚާއްޞަ ޕޯޓަލެއް އަންނަ ސެޕްޓެމްބަރު މަހު ލޯންޗުކުރާނެ ކަމަށް އެ ކުންފުނިން ބުނެފިއެވެ.
މި ޕޯޓަލް މެދުވެރިކޮށް ކޮންމެ ތަނެއްގައި ހުރެގެން ވެސް ބޭނުންވާ ބޭސް ލިބެން ހުންނަ ފާމަސީއާއި އެ ބޭހުގެ އަގު ބެލޭނެ ކަމަށް ސްޓޭޓް ފާމާއިން ބުނެއެވެ.
ބޭސް ހޯދަން ބޭނުންވާ ފަރާތްތަކަށް ބޭސް ލިބެން ހުންނަ ފާމަސީ ނޭނގުމަކީ ގިނަ ރައްޔިތުންގެ ކަންބޮޑުވުމެއް ކަމަށާއި އެ މައްސަލައަށް ދާއިމީ ޙައްލެއް ގެނައުމުގެ ގޮތުން މި ޕޯޓަލް ފަރުމާކުރަމުން އަންނަ ކަމަށް ވެސް އެ ކުންފުނިން ބުނެފައިވެއެވެ.
"އަޅުގަނޑުމެން ކުންފުނިން މި ކުރާ މަސައްކަތަކީ ރައްޔިތުން އުފުލަމުންދާ ތަކުލީފުތައް ދެނެގަނެ އެކަމަށް ދާއިމީ ހައްލު ހޯދުމުގެ މަސައްކަތް" ސްޓޭޓް ފާމާއިން ބުންޏެވެ.
ބޭސް ލިބުމުގައި ހުރި މައްސަލަ ހައްލުކުރެވޭނީ، ރާއްޖެއަށް ބޭނުންވާ ބޭސްތައް ދުރާލާ އެނގިގެން ކަމަށާއި އެކަން އެނގޭނެ ނިޒާމެއް ޤާއިމުކުރުމުގެ މަސައްކަތް ކުރަމުންދާ ކަމަށް އެކުންފުނިން މީގެކުރިން ވަނީ ބުނެފައެވެ.
މި މަސައްކަތަށް ބޭނުންވާ އެންޓަޕްރައިސް ރިސޯސް މެނޭޖްމަންޓް ސިސްޓަމަކާއި، އީ-ލޮޖިސްޓިކްސް ސިސްޓަމެއް ޤާއިމުކުރުމުގެ ފުރަތަމަ ފިޔަވަހީގެ މަސައްކަތް ނިމިފައިވާ ކަމަށާއި މީގެ ސަބަބުން ރާއްޖޭގައި ބޭހުގެ ސްޓޮކް ހުރި އަދަދު ދެނެގަނެވޭނެ ކަމަށްވެސް އެ ކުންފުނިން ވަނީ ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
