ރީނދޫ ލަސްކަރަށް އިހުތިރާމް ކުޑަވާގޮތަށް ވާހަކަ ދެއްކިކަމަށްބުނެ ’އެމްޑީޕީގެ މަންމަ‘ މާރިޔާގެ ނުރުހުން

ދިވެހިރާއްޖޭގެ ދެވަނައަށް އެންމެ ބޮޑު ސިޔާސީ ޕާޓީ، ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ތެރޭގައި އެޕާޓީގެ ރީނދޫ ލަސްކަރަށް އިހުތިރާމް ކުޑަވާގޮތަށް ވާހަކަ ދެއްކެވި ކަމަށް ބުނެ، ކުރީގެ ޑިފެންސް މިނިސްޓަރު މާރިޔާ ދީދީގެ ނުރުހުން މާލޭ މޭޔަރު އާދަމް އާޒިމަށް އަމާޒުވެއްޖެއެވެ.

މާރިޔާގެ ނުރުހުން އާޒިމަށް އަމާޒުވީ، އަންނަ ކައުންސިލް އިންތިޚާބުގައި އެމްޑީޕީގެ ޓިކެޓުގައި މާލެ ސިޓީގެ މޭޔަރު ކަމަށް ވާދަކުރާނެ ކެންޑިޑޭޓަކު ހޮވުމަށް ބާއްވާ ޕްރައިމަރީގެ ކެންޕެއިން ޖަލްސާގައި އާދަމް އާޒިމް ދެއްކެވި ވާހަކައާގުޅިގެންނެވެ.

”މި އާދަމް އާޒިމަކީ ވެރިކަން ގެއްލި ޕާޓީ، މާޔޫސްކަމުގެ ރަޖާލައިގެން އޮތްވަގުތު އެއްކަލަ ރަޖާގަނޑުދަށުން ނުކުމެ، ހިތްވަރުކޮށްގެން މާލޭ މޭޔަރުކަމުގެ ގޮނޑި އެމްޑީޕީއަށް ކާމިޔާބުކޮށް، ޕާޓީއަށް ރޫޙު ގެނުވައިދިން އާދަމް އާޒިމް“

އާދަމް ޢާޒިމް

އެކަމާއި ގުޅިގެން މާރިޔާ، އޭނާގެ އެކްސްގައި ކުރެއްވި ޕޯސްޓުގައި ވިދާޅުވީ، އޭނާއަކީ މޭޔަރު ޕްރައިމަރީގައި އެއްވެސް ފަރާތަކަށް ނުޖެހިހުރި މީހެއް ކަމަށެވެ.

"ނަމަވެސް، އެމްޑީޕީއާމެދު އެމްޑީޕީއަކީ، 2023 ވަނަ އަހަރުގެ އިންތިޚާބުން ބަލިވުމާ ގުޅިގެން، ހުންއައިސް ރަޖާލައިގެން، ތިބި ފިނޑިބައެއް ކަމާ، އެ ހާލަތުގައި އެމްޑީޕީ ކޮޅަށްޖެއްސެވީ މޭޔަރު އާދަމް އާޒިމް ކަމަށް ވިދާޅުވެ، މި މޭރުމުން ވާހަކަ ދެއްކުވުމުން، މޭޔަރު އާދަމް އާޒިމްއަށް ދަންނަވާލަން ބޭނުންފުޅުވާ"ކަންކަން ހުރި ކަމަށް މާރިޔާ ވިދާޅުވިއެވެ.

އާޒިމްގެ އެވާހަކައިން ސިފަވަނީ، 2023 ވަނަ އަހަރުގެ އިންތިހާބުން އެމްޑީޕީ ބަލިވުމާ ގުޅިގެން، އެ ޕާޓީ ހުއްޓި، ފިލީ ކަމަށް ކަމަށެވެ. އަދި މި ހާލަތުގައި އެމްޑީޕީ އަލުން އާލާކުރީ އާޒިމް ކަމަށް ވިދާޅުވެ، އެމްޑީޕީ ހަރުގޭގައި އާޒިމް ދެއްކެވި ވާހަކަތަކާމެދު އޭނާގެ ކަންބޮޑުވުން ފާޅުކުރެއްވިއެވެ. އެމްޑީޕީގެ މޭޔަރު ޕްރައިމަރީގައި ވަކި ފަރާތަކަށް ނުޖެހި ހުރި މީހެއް ނަމަވެސް، މިފަދަ ވާހަކަތައް ދެއްކެވުމުން، އެކަމަށް އޭނާގެ ނުރުހުން ހުރިކަން ހާމަކުރެއްވިއެވެ

މާރިޔާ ފާހަގަކުރައްވާ ގޮތުގައި، 2012 ފެބްރުއަރީ 7 ގައި އެމްޑީޕީ ސަރުކާރު އިސްތިޢުފާ ދިނުމުން، ”ބަޑިއެއް، ބިޑިއެއް، ވޯޓަރ ގަންއެއް، މުގުރެއް، ޕެޕަރ ސްޕްރޭއެއް، ނުވަތަ އެއްވެސް ހުކުމަކަށް“ ފަހަތަށް ނުޖެހި މަގުމައްޗަށް ނިކުތީ އެމްޑީޕީގެ ރީނދޫ ލަސްކަރެވެ.

ހަމަ އެހެންމެ، 2013 ވަނަ އަހަރު ޕީޕީއެމްގެ ވެރިކަމުގައި ގިނަ ސިޔާސީ ފަރާތްތަކެއް ޖަލަށްލުމުން، ޖަލުގެ ގޮޅިއަކަށް، ޕެޕަރ ސްޕްރޭއަކަށް، މުގުރަކަށް، ނުވަތަ ޖަހާނެ ހުކުމަކަށް ފަހަތަށް ނުޖެހި އިހުތިޖާޖަށް ނިކުތީވެސް އެމްޑީޕީގެ ރީނދޫ ލަސްކަރު ކަމަށް މާރިޔާގެ ވިދާޅުވެފައި ވެއެވެ.

”އެމްޑީޕީގެ މެންބަރެއްގެ ގޮތުން ހުންނަވައި، އެމްޑީޕީގެ ޓިކެޓުގައި ވާދަކުރައްވަމުން އެމްޑީޕީގެ ހިތްވަރުގަދަ ރީނދޫ ލަސްކަރަށް މިހާ ކުޑައިމީސްކޮށް ދެކެވަޑައިގެން،  އެމްޑީޕީގެ ހުރިހާ ހިތްވަރަކީ މަނިކުފާނު ކަމަށް ވިދާޅުވެ ދެއްކެވި ވާހަކަތަކަކީ، އެމްޑީޕީގެ މަންމަ ކަމަށް ގިނަ މެންބަރުން ބުނާ މީހެއްގެ ހައިސިއްޔަތުން، އަދި މިނޫންވެސް އެތައް ހައިސިއްޔަތުން އަޅުގަނޑަށް ބަލައިގަނެވޭނެ ކަމެއް ނޫން“

މާރިޔާ ވިދާޅުވިއެވެ.

މިއާއެކު މާރިޔާ ވިދާޅުވީ، އެމްޑީޕީގެ ރީނދޫ ލަސްކަރަށް ނިސްބަތްކޮށް، އެމްޑީޕީ ރާޖާލާ ހުއްޓިފައި ފިލާ ތިއްބާ ނެރުނީ އާޒިމް ކަމަށް ވިދާޅުވެ ދެއްކެވި ވާހަކަތަކަށް މޭޔަރު އާޒިމް، އެމްޑީޕީގެ ރީނދޫ ލަސްކަރުގެ ކިބައިން މާފަށް އެދިވަޑައިގަންނަވަން ޖެހޭނެ ކަމަށެވެ.

މާރިޔާ އިތުރަށް ވިދާޅުވިގޮތުގައި، އެމްޑީޕީއަށް ނިސްބަތްވާ އެއްވެސް ވަކި ފަރުދަކަށްވުރެ އެމްޑީޕީ ބޮޑުވާނެއެވެ. އަދި އެކަން އެމްޑީޕީގެ ރީނދޫ ލަސްކަރު ކޮންމެ ދުވަހަކުވެސް ސާބިތުކޮށްދެމުންދާ ކަމަށް މާރިޔާ ވިދާޅުވިއެވެ.