އެމްޑީޕީ ގައުމީ މަޖިލިސް އިންތިހާބު އަންނަ މަހު 27 ގައި؛ ޓައިމްލައިން އާންމުކޮށްފި

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އަންނަ ނޮވެމްބަރު މަހުގެ 27 ގައި ބޭއްވުމަށް ހަމަޖައްސާފައިވާ ކަން އިއުލާންކޮށް ގައުމީ މަޖިލިސް އިންތިހާބުގެ ޓައިމްލައިން މިއަދު އާންމުކޮށްފި އެވެ.

އެ ތާވަލުގައިވާ ގޮތުން، އިންތިހާބަށް ކުރިމަތިލުމުގެ ފުރުސަތު ހުޅުވައިލާނީ އޮކްޓޫބަރު 10 ގައެވެ. އޭގެ ތިން ދުވަސް ފަހުން މާލޭގެ ވޯޓުލާ މަރުކަޒުގައި އޮފިޝަލުންގެ ގޮތުގައި ނަން ހުށަހެޅުމަށް ވެސް ފުރުސަތު ދޭން ވަނީ ނިންމައިފަ އެވެ. ވޯޓުލުމުގެ ހައްގު ލިބޭ ގޮތަށް ޕާޓީގެ މެންބަރެއްގެ ގޮތުގައި ރަޖިސްޓަރީވެވޭ އެންމެ ފަހު ތާރީހަކީ އޮކްޓޫބަރު 20 ގެ މެންދުރުފަހު 14:00 އެވެ.

ކެންޑިޑޭޓުންގެ ނަން ހުށަހެޅުމުގެ ސުންގަޑި އާއި މެންބަރުންގެ ދަފްތަރަށް ޝަކުވާ ހުށަހެޅުމުގެ ސުންގަޑި ވެސް ކަނޑައަޅާފައި އޮތީ އޮކްޓޫބަރު 25 ގެ މެންދުރުފަހު 14:00 އަށެވެ. ކެންޑިޑޭޓުންގެ ލިސްޓު އާންމުކޮށް ޝަކުވާ ހުށަހެޅުމަށް އެއް ދުވަހުގެ މުއްދަތެއް ދޭ ގޮތަށް ހަމަޖެހިފައި ވަނީ އޮކްޓޫބަރު 27 ގައެވެ.

ހަމަ އެ ދުވަހު ރީ-ރަޖިސްޓްރޭޝަނަށް ހުޅުވައިލައި، ނޮވެމްބަރު 6 ގެ މެންދުރުފަހު 14:00 ގައި އެ ފުރުސަތު ބަންދުވާނެއެވެ. ރީ-ރަޖިސްޓްރޭޝަން ލިސްޓާ މެދު ޝަކުވާ ހުށަހެޅޭ ފަހު ތާރީހަކީ ނޮވެމްބަރު 12 އެވެ. ކެންޑިޑޭޓުންގެ މަންދޫބުންގެ ނަން ހުށަހެޅުމަށް އޮކްޓޫބަރު 29 ގައި ފެށި، ނޮވެމްބަރު 8 ގެ މެންދުރުފަހު 14:00 ގައި ހަމަވާ ފުރުސަތެއް ދޭން ވެސް ތާވަލުކޮށްފައިވެއެވެ.

ދާއިމީ ވޯޓާސް ލިސްޓު ނޮވެމްބަރު 14 ގައި ހާމަކުރާ އިރު، ވޯޓުފޮށި ބަހައްޓާ ތަންތަން ނޮވެމްބަރު 23 ގައި އިއުލާންކުރާ ގޮތަށް ވަނީ ރާވައިފައެވެ.

ވޯޓުލުން ކުރިއަށް ގެންދަން ރާވާފައި ވަނީ ނޮވެމްބަރު 27 ގެ މެންދުރުފަހު 14:30 އިން ރޭގަނޑު 20:30 އާ ހަމައަށެވެ. ވޯޓުލުން ނިމުމުން ވަގުތީ ނަތީޖާ އެ ރޭ އިއުލާންކޮށް، ދާއިމީ ނަތީޖާ ނޮވެމްބަރު 30 ގައި ނެރުމަށް ވަނީ ހަމަޖެހިފައެވެ.

މި އިންތިހާބަކީ އެމްޑީޕީން ދާދި ފަހުން އެ ޕާޓީގެ އަސާސީ ގަވާއިދަށް ބޮޑެތި ބަދަލުތައް ގެނައުމަށް ފަހު ބާއްވާ ފުރަތަމަ އިންތިހާބެވެ.