އަރަބިއަން ޓްރެވެލް މާކެޓްގައި ރާއްޖޭގެ ފަތުރުވެރިކަމުގެ ސިނާއަތުން ބައިވެރިވެއްޖެ

ދުބާއީގައި މިއަދު ފެށި އަރަބިއަން ޓްރެވަލް މާކެޓްގައި ދިވެހިރާއްޖޭގެ ފަތުރުވެރިކަމުގެ ސިނާއަތުން ބައިވެރިވެއްޖެއެވެ.

މޯލްޑިވްސް މާކެޓިން ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) އިން ބުނީ، މިފަހަރުގެ އޭޓީއެމް ފެއާގައި ދިވެހިރާއްޖެއިން 235 މަންދޫބުން ތަމްސީލްކުރާނޭކަމަށެވެ. މި ފެއާގައި އެމްއެމްޕީއާރުސީން މަންޒިލެއްގެ ގޮތުގައި ރާއްޖޭގެ ފަތުރުވެރިކަމުގެ ސިނާއަތް ތަމްސީލްކުރުމަށް ހަމަޖެހިފައިވައިރު، ރާއްޖޭގެ އަމިއްލަ ކުންފުނިތަކުން އެފަރާތްތަކުގެ ވިޔަފާރިއާއި ރާއްޖެ އިސްތިހާރުކުރުމުގެ މަސައްކަތް ކުރާނެއެވެ.

ދުބާއީގެ ވަރލްޑް ޓްރޭޑް ސެންޓަރުގައި ކުރިއަށްދާ އޭޓިއެމް ފެއާގައި ރާއްޖޭގެ 110 ކުންފުންޏަކުން ބައިވެރިވެއެވެ. މި ފެއާ ފެށުމަށްޓަކައި މިއަދު ބޭއްވި ރަސްމިއްޔާތުގައި ޓޫރިޒަމާ ބެހޭ ވަޒީރު ޠާރިޤު އިބްރާހިމްގެ އިތުރުން މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން އިބްރާހިމް ޝިއުރީ އާއި ކަމާ ގުޅުންހުރި އިސް ފަރާތްތަކުން ވަނީ ބައިވެރިވެފައެވެ. އޭޓިއެމް ފެއާ ކުރިއަށްދާނީ މިއަދުން ފެށިގެން އަންނަ މެއިމަހުގެ އެއްވަނަ ދުވަހުގެ ނިޔަލަށެވެ.

އެމްއެމްޕީއާރުސީއާ ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ ކުންފުނިތަކުން ވަނީ މީގެ ކުރިންވެސް ދުބާއީ އޭޓީއެމް ފެއާގައި ބައިވެރިވެފައެވެ. މެދުއިރުމަތީގެ މާކެޓަކީ ރާއްޖޭގެ ފަތުރުވެރިކަމުގެ ސިނާއަތުގައި ވަރަށް މުހިއްމު މާކެޓެކެވެ. މިއަހަރުގެ ފުރަތަމަ 2 މަސްދުވަހުގެ ތެރޭގައި މެދުއިރުމަތީގެ ޤައުމުތަކު ވަނީ ރާއްޖެއަށް 10,845 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 10.8 އިންސައްތަ ދަށްވުމެކެވެ. މިދިޔަ އަހަރުގެ ފުރަތަމަ ދެ މަސްދުވަހުގެ ތެރޭގައި މެދުއިރުމަތީގެ ޤައުމުތަކުން ރާއްޖެއަށް 12,164 ފަތުރުވެރިން ޒިޔާރަތްކުރިއެވެ.