އަހަރަކަށްވުރެ ގިނަ ދުވަސްވީ މައްސަލަތައް ނިންމަން ޓާސްކުފޯސް އެކުލަވާލައިފި

ކޯޓްތަކުގައި އަހަރަކަށްވުރެ ގިނަ ދުވަސްވީ މައްސަލަތައް އަވަހަށް ނިންމަން ހާއްސަކޮށް ޓާސްކު ފޯހެއް އެކުލަވާލައިފި އެވެ.

އަހަރަކަށްވުރެ ގިނަ ދުވަސްވީ 13،000 ވުރެ ގިނަ މައްސަލަ އެބައޮތް ކަމަށާ އެ މައްސަލަތައް އަވަހަށް ނިންމަން ޓާސްކު ފޯހެއް އެކުލަވާލަން ނިންމާފައިވާ ކަމަށް އުއްތަމަފަނޑިޔާރު ޢަބްދުލްޣަނީ މުޙައްމަދު އިއުލާނު ކުރެއްވީ މި މަހުގެ 8 ވަނަ ދުވަހު އެވެ.

ސުޕްރީމް ކޯޓުން މިއަދު ބުނީ އެ ޓާސްކު ފޯސް އުއްތަމަފަނޑިޔާރު މިއަދު އެކުލަވާލައްވާފައިވާ ކަމަށެވެ. ޓާސްކު ފޯސް ހިމެނެނީ އެކި މަރުހަލާތަކުގެ ކޯޓްތަކުން ތަމްސީލުވާ ގޮަތަށް ނުވަ މެންބަރުންގެ މައްޗަށް ކަމަށް ވެސް ބުންޏެވެ.

ނަމަވެސް މެންބަރުންގެ މައުލޫމާތު ހިއްސާއެއް ނުކުރެ އެވެ.

މި ޓާސްކްފޯހުގެ ފަރާތުން މީގެ ތެރެއިން ކޮންމެ މައްސަލައެއް ނުނިމި އޮތް ސަބަބު, ސީދާ އެ މައްސަލަ ހަވާލުކުރެވިފައިވާ މެޖިސްޓްރޭޓް, ގާޒީ, ފަނޑިޔާރުގެ ގާތުގައި އަހާ, ނުނިމި އޮތް ސީދާ ސަބަބު ރަނގަޅަށް ސާފުކޮށް އެ މައްސަލަ ކުރިއަށް ގެންގޮސް ދިނުމުގައި އެހީތެރިވެދޭނެ ކަމަށް އުއްތަމަފަނޑިޔާރު ވިދާޅުވި އެވެ.

އުއްތަމަފަނޑިޔާރު ވިދާޅުވީ މި މައްސަލަތަކުގެ ތެރެއިން ބަންދުގައި ތިބި މީހުންގެ މައްސަލަތަކަށްވެސް ދާއިމީ ހައްލު އަންނާނެ ކަމަށެވެ.