ތޫފާން ދިތުވާ: ސްރީލަންކާއިން މަރުވި މީހުންގެ އަދަދަު 212 އަށް އަރައިފި
އަވައްޓެރި ސްރީލަންކާއަށް އެރި ތޫފާން ދިތުވާގައި ބޯކޮށް ވާރޭ ވެހުމާއި ގުޅިގެން ހިނގާދިޔަ ހާދިސާތަކުގައި މިހާތަނަށް 212 މީހެއްގެ ފުރާނަ ގެއްލިފައިވާކަމަށް އެޤައުމުގެ ޑިޒާސްޓާ މެނޭޖްމަންޓް ސެންޓަރުން ހާމަކޮށްފިއެވެ.
ލަންކާގެ ޑިޒާސްޓާ މެނޭޖްމަންޓް ސެންޓަރުން އެންމެފަހުން އާއްމުކުރި މައުލޫމާތަށް ބަލާއިރު، 212 މީހެއްގެ ފުރާނަ ގެއްލުނުއިރު، 218 މީހަކު ވީއެއްނުވީއެއް ނޭނގި ވަނީ ގެއްލިފައެވެ. މީގެ އިތުރުން އެތައްބަޔަކު ކިސަޑާއި އެކި ސަރަހައްދުތަކުގައި ތާށިވެފައި ތިބެދާނެކަމަށް އެ އިދާރާއިން ވަނީ ބުނެފައެވެ.
މީހުން ސަލާމަތްކުރުމުގައި ހަރަކާތްތެރިވާ ޓީމުތަކުން އަދިވެސް ދަނީ އެކި ސަރަހައްދުތަކުން މީހުން ސަލާމަތްކުރުމުގެ މަސައްކަތްކުރަމުންނެވެ. ބައެއް އަވަށްތަކުގައި ފެންގަނޑު ބޮޑުވެފައިވާތީވެ މީހުން ސަލާމަތްކުރުމުގެ މަސައްކަތް މިއަދުވެސް މައިގަނޑު ގޮތެއްގައި ކުރިއަށްގެންގޮސްފައިވަނީ ހެލިޮޕްޓަރު ބޭނުންކޮށްގެންނެވެ. މި މަސައްކަތްތަކުގައި ބައިވެރިވުމުގެ ގޮތުން އިންޑިއާ ސަރުކާރުންވެސް ވަނީ ސްރީލަންކާއަށް ހެލިކޮޕްޓަރާއި އެނޫންވެސް ވަސީލަތްތައް ހަދިޔާކޮށްފައެވެ.
ސްރީލަންކާއަށް އެހީތެރިވުމުގެ ގޮތުން މިވަގުތުވެސް އެކި ޤައުމުތަކުންނާއި ޖަމިއްޔާ ޖަމާއަތްތަކުންދަނީ އެޤައުމުގައި ހަރަކާތްތެރިވަމުންނެވެ. މީގެ ތެރޭގައި ޔޫއެންވެސް ހިމެނެއެވެ.
ތޫފާން ދިތުވާއަކީ މި ފަހުގެ ތާރީހެއްގައި ސްރީލަންކާއަށް އެރި އެންމެ ގެއްލުންބޮޑު ތޫފާނެވެ. މިހާހިސާބަށް އާއިރު 30،000 ހާހަށްވުރެ ގިނަ މީހުންގެ ގެދޮރު ގެއްލުނުއިރު، އެތައް އާއިލާތަކެއްގެ ގެދޮރުވަނީ ވަރަށް ބޮޑު މަރާމާތެއްކޮށްގެން ނޫނީ މަރާމާތު ނުކުރެވޭ ހާލަތަށް ގޮސްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
