ފެނަކައިގެ ވައްކަން ބެލުން އަވަސްކުރުމަށް މުއައްސަސާތަކަށް އަންގައިފިން: ރައީސް

ފެނަކަ ކޯޕަރޭޝަންގެ ހާއްސަ އޮޑިޓް ރިޕޯޓުން ފާހަގަވި ޚިޔާނާތުގެ މައްސަލަތައް ބެލުން އަވަސްކުރުމަށް ދައުލަތުގެ އިދާރާތަކަށް އަންގާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިރޭ ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ ތ. ތިމަރަފުށީ ރައްޔިތުންނާއި ބައްދަލުކުރުމަށް މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ފެނަކައިގެ ތެރެއިން ހިންގާފައިވަނީ ވަރަށް ބޮޑު ވައްކަމެއް ކަމަށެވެ. އެކަން އޮޑިޓަރު ޖެނެރަލްގެ ރިޕޯޓުން ސާފުވާ ކަމަށް ވިދާޅުވި އެވެ.

ރައީސް މިރޭވެސް ވިދާޅުވީ ރައްޔިތުންގެ ފައިސާއިން ކުރާ ވައްކަމާއި ހިޔާނާތް ބަލަން ޖެހޭނެ ކަމަށެވެ. އެހެން ކަމުން އެކަންކަން ބެލުމަށް އެމަނިކުފާނަށް އެންގެން އޮތް މިންވަރަކަށް މުއައްސަސާތަކަަށް އަންގާފައިވާ ކަމަށެވެ.

“ފުލުހުންގެ އިދާރާއިން ކުރަން ޖެހޭ ކަންކަން ފަށައިފި. އަޅުގަނޑުމެން އަންގައިފިން އޭސީސީއަށްވެސް. އަޅުގަނޑުމެން އަންގައިފިން ޕްރޮސެކިއުޓަރު ޖެނެރަލަށް ވެސް, އަޅުގަނޑަށް މަގާމުގެ ހައިސިއްޔަތުން އެންގޭނެ މިންވަރަށް އަންގައިފިން މިކަން އަވަސް ކުރަން," ރައީސް ވިދާޅުވި އެވެ.

ރައީސް ވިދާޅުވީ ކޮރަޕްޝަނަށް މި ސަރުކާރުން ޖާގަ ނުދެއްވާނެ ކަމަށެވެ. އަދި އެފަދަ ކަންކަމުގައި ވަކި މީހަކަށް ނުބަލާނެ ކަމަށް ވިދާޅުވި އެވެ.

“ކޮރަޕްޝަން ނައްތާލުމަށްޓަކައި ކުރަން ޖެހުނު ހުރިހާ ކަމެއް އަޅުގަނޑުމެން ކުރާނީ. އެއްވެސް މީހަކަށް ނުބަލާނަން. އަޅުގަނޑު ގަބޫލުކުރާ ހަމައަކީ މީހާއަށް ބެލުމެއް ނޫން. ކުރި އަމަލަށް ބެލުން. ސިޔާސީ އެއް ނުވާނަން," ރައީސް ވިދާޅުވި އެވެ.