ދަރަނި މެނޭޖްކުރުމަކީ މިނިވަންކަމާ ގުޅިފައިވާކަމެއް: ޢިމްރާން

ދަރަނި މެނޭޖްކުރުމަކީ މިނިވަންކަމާ ގުޅިފައިވާކަމެއް ކަމަށް ހެންވޭރު ދެކުނު ދާއިރާގެ މެންބަރު ހުސައިން އިމްރާން ލަޠީފް ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށަހެޅުނު ދައުލަތުގެ ދަރަނި މެނޭޖްކުރުމުގެ ބިލަށް ބަހުސް ކުރައްވަމުން ޢިމްރާން ވަނީ ދައުލަތުގެ ދަރަނި މެނޭޖްކުރަންޖެހޭ ސަބަބުތަކާއި އެކަމުގެ މުހިންމު ކަމަށް އަލިއަޅުވާލައްވާފައެވެ.

އެގޮތުން ވިދާޅުވީ، ގައުމަށް އިޤްތިޞާދީ ލޮޅުންތަކުން އަޔަ ނުދީ، އިޤްތިޞާދު މެނޭޖްކުރުމަށް އެގައުމެއްގެ ދަރަނި މެނޭޖްކުރުމަކީ ނުހަނު މުހިންމު ކަމެއް ކަމަށެވެ.

ދައުލަތުގެ ދަރަނި މެނޭޖް ނުކުރެވިއްޖެނަމަ ތަކެތީގެ އަގު އިންތިހާއަށް އުފުލިގެން ހިނގައިދާނެ. މީގެ އިތުރުން ދަރަނި މެނޭޖްކުރުމަކީ އިންވެސްޓަރުންގެ އިތުބާރު ދެމެހެއްޓުމަށްވެސް މުހިންމު ކަމެއް. އިންވެސްޓަރުންގެ އިތުބާރު ރާއްޖެއަށް ގެއްލިއްޖެނަމަ ބޮންޑް ވިއްކުމަށް ހުރަސް އެޅި، ޕްރައިވެޓް ސެކްޓަރގައި އިންވެސްޓްކުރުމަށް އަންނަ އިންވެސްޓަރުން ފަސްޖެހޭން ފަށާފާނެ. މިއީ އަޅުގަނޑުމެން ވިސްނާލަންޖެހޭ ކަންކަން

މެންބަރު ހުސައިން އިމްރާން ލަޠީފް

ދަރަނި ބޮޑުވެ، ދަރަނި ދައްކަން ހޭދަކުރާ ފައިސާގެ އަދަދު ދައުލަތުގެ އާމްދަނީ އާ ނުބައްދަލު ހިސާބަކަށް ގޮސްފިނަމަ ސްރީލަންކާ ފަދަ ގައުމުތަކަށް ޖެހުނު ހާލަތު ދިވެހިރާއްޖެއަށް ޖެހިދާނެކަން ފާހަގަކުރައްވައި އިމްރާން ވިދާޅުވީ، ލަންކާއަށް އެ ހާލުގައި ޖެހުނީ އިގްތިޞާދީ ގޮތުން އެ ގައުމު ވެއްޓުނު އަނދަވަޅުގެ ސަބަބުން ކަމަށެވެ.

އަޅުގަނޑުމެން ދަރިންނާއި ދަރިންގެ ދަރިންގެ އަތްމައްޗަށް ގައުމު ވާރުތަވާއިރު ކޮންމެ މީހެއްގެ ބޮލުގައި މިލިއަނުން ލޯނު އެޅިގެން ދިޔުމަކީ އެކަކުވެސް ބޭނުންވާނެ ކަމެއް ނޫން.

މެންބަރު ހުސައިން އިމްރާން ލަޠީފް

މިއާއެކު އިމްރާން ވިދާޅުވީ، ދަރަނި މެނޭޖްކުރުމަކީ މިނިވަންކަމާ ގުޅިފައިވާކަމެއް ކަމަށެވެ. އެގޮތުން، ނިމިދިޔަ ސަރުކާރުގައި ވަކި ގައުމަކަށް އެއްކޮށް ބަރޯސާވެ، އިގްތިޞާދީ ގޮތުން އެބައެއްގެ “އަޅުވެތިކަމަށް” ރާއްޖެ ދިޔަ ކަމަށް އޭނާ ވިދާޅުވިއެވެ.

ކަންމިހެން ހުރުމުން، ސަރުކާރުން ހުށަހަޅާފައިވާ ދަރަނީގެ ބިލާއެކު ކުރިއަށް އޮތް ތަނުގައި އަންނަ ސަރުކާރުތަކަށްވެސް ޒިންމާދާރުކަމާއެކު ދައުލަތުގެ ދަރަނި މެނޭޖްކުރުމަށް އަދި ދަރަނި ނެގުމަށް އުސޫލު ތަކެއް ކަނޑައެޅިގެންދާނެ ކަމަށް އިމްރާން ފާހަގަކުރެއްވިއެވެ.

އަދި ސަރުކާރުން އަޅުއްވަމުން ގެންދަވާ މާލީ އިސްލާހީ ފިޔަވަޅުތަކުގެ ނަތީޖާއެއްގެ ގޮތުން، ދިވެހިރާއްޖޭގެ ކްރެޑިޓް ރޭޓިން މަތިވެ، ކުރީގެ ސަރުކާރުގައި އޮތް މިންވަރަށްވުރެ ރަނގަޅު ކްރެޑިޓް ރޭޓިންގ އެއް ހޯދާނެކަމީ ޔަގީން ކަމެއް ކަމަށް އޭނާ ވިދާޅުވިއެވެ.