ދެ ވިސާއެއް ތައާރަފުކޮށް ބައެއް ކަންކަމަށް ހުއްދަ ދެނީ

ފަތުރުވެރިކަމަށް ކުރާ ނޭދެވޭ އަސަރު ކުޑަކުރުމުގެ ގޮތުން މުހިންމު ބައެއް ފިޔަވަޅުތައް އެޅުމުގެ މަސައްކަތް ކުރަމުންދާ ކަމަށް ޓޫރިޒަމް މިނިސްޓަރު ތޯރިގް އިބްރާހިމް ވިދާޅުވެއްޖެ އެވެ.

މެދުއިރުމަތީގައި ފެށިފައިވާ ހަނގުރާމައާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެކުލަވާލެއްވި ވަޒީރުންގެ ހާއްސަ ކޮމިޓީން މިއަދު ބޭއްވި ނޫސްވެރީންގެ ބައްދަލްވުމުގައި ވާހަކަ ދައްކަވަމުން މިނިސްޓަރު ވިދާޅުވީ ރާއްޖޭގަައި ތިބި ބައެއް ފަތުރުވެރީން ވިސާގެ މުއްދަތު އިތުރުކުރުމަށް ހުށައަޅަމުންދާ ކަމަށެވެ. އެކަމަށް މިވަގުތު އޮތީ އުނދަގޫ އުސޫލެއްކަން ފާހަގަ ކުރައްވާ މިނިސްޓަރު ވިދާޅުވީ ވިސާގެ މުއްދަތު އިތުރުކުރަން ހުށައެޅުމުގައި ފަސޭހަ ގޮތްތަކެއް ހަމަޖެއްސުމުގެ މަސައްކަތް ކުރަމުންދާ ކަމަށެވެ.

އަދި މިވަގުތު އިތުރު ދެ ވިސާއެއް ތައާރަފު ކުރުމުގެ މަސައްކަތް ކުރަމުންދާ ކަމަށް ވިދާޅުވި އެވެ. އެގޮތުން ރިމޯޓް ވޯކިން ވިސާ އާއި ކޮންޓެންޓްކްރޭޓިވް ވިސާއެއް ތަޢާރަފުކުރުމުގެ މަސައްކަތް ވެސް ކުރަމުންދާ ކަމަށް ވިދާޅުވި އެވެ.

ބައެއް ކަންކަމަށް ހުއްދަ ދެނީ

މީގެ އިތުރުން ފަތުރުވެރިކަން އިތުރަށް ފުޅާކުރުމަށް ބައެއް ކަންކަމަށް ހުއްދަ ދޭން ނިންމާފައިވާ ކަމަށް ވިދާޅުވި އެވެ. އެއް ކަމަކަށް މިނިސްޓަރު ފާހަގަ ކުރެއްވީ ސްޕިއާ ފިޝިންއަށް ހުއްދަ ދޭން ނިންމުންނެވެ. އެކަން މަނާވެފައި އޮންނަތާ 40 އަހަރު ވެއްޖެ އެވެ.

އަދި ޓެކްނިކަލް އެންޑް ރިކްރިއޭޝަނަލް ޑައިވިން އަށް ހުއްދަ ދިނުމަށް ވެސް ވަނީ ނިންމާފަ އެވެ. އަދި ސުޕަ ޔޮޓާއި ލިވަބޯޑް ޗާޓަ ޓްއަރިޒަމް ވެސް އިތުރަށް ހަރުދަނާކޮށް ފަސޭހަކަމާއެކު ކުރެވޭނެ އިންތިޒާމު ހަމަޖައްސާނެ ކަމަށް މިނިސްޓަރު ވިދާޅުވި އެވެ.

މިނިސްޓަރު ވިދާޅުވީ ސަރުކާރުން ދަނީ ހަލާލު ޓޫރިޒަމް ފުޅާކުރުމަށް ވެސް ހާއްސަ އިސްކަމެއް ދީގެން މަސައްކަތް ކުރަމުންނެވެ.

ފަތުރުވެރީންގެ އަދަދު 21 އިންސައްތަ ދަށް

މިނިސްޓަރު ވިދާޅުވި ގޮތުގައި މެދުއިރުމަތީގެ އެއަރލައިންތަކުން އަންނަ ފަތުރުވެރީންގެ ނިސްބަތް 30 އިންސައްތާގައި ހުރިއިރު އެ ހުރިހާ ދަތުރުތައް ކެންސަލް ވުމަކީ ޓޫރިޒަމަށް އޮތް ވަރަށް ބޮޑު ގޮންޖެހުމެކެވެ.

މި އަހަރު ފެށިގެން އައީ ރާއްޖެއަށް ޓޫރިޒަމްގެ އެންމެ ކާމިޔާބު އަހަރުގެ ގޮތުގައި ނަމަވެސް ހަނގުރާމައިގެ ސަަބަބުން އެކަން ބަދަލުވެފައިވާ ކަމަށް ވިދާޅުވި އެވެ. މި އަހަރުގެ ފުރަތަމަ ދެ މަހަކީ ރާއްޖެއަށް އެންމެ ގިނައިން ފަތުރުވެރީން އަައި ދެ މަސް ކަމަށާ ނަމަވެސް ހަނގުރާމައިގެ ފަހުން މިހާތަނަށް ރާއްޖެ އައީ 97,000 ފަތުރުވެރީން ކަމުގައި ވިދާޅުވި އެވެ. އެއީ 21 އިންސައްތައިގެ ދަށްވުމެކެވެ.

މި އަހަރުގެ މިހާތަނަށާް 5,62,956 ފަތުރުވެރީން ރާއްޖެ އައިސްފައިވެ އެވެ.