މި މަސައްކަތް ކުރަނީ ހައްގުވެރިންނަށް އެ ހައްގެއް ދާއިމީކޮށް ލިބޭނެ މަގުފަހިކޮށްދޭން: ޢިމްރާން

މި ސަރުކާރުން އަދި ވެރިކަންކުރާ ޕާޓީގެ މަޖިލިސް މެންބަރުންވެސް މަސައްކަތް ކުރައްވަނީ، ހައްގުވެރިންނަށް އެ ހައްގެއް ދާއިމީކޮށް ލިބޭނެ މަގުފަހިކޮށްދެއްވުމަށް ކަމަށް، ހެންވޭރު ދެކުނު ދާއިރާގެ މެންބަރު ހުސައިން އިމްރާން⁩ ލަތީފް (އިއްމު) ވިދާޅުވެއްޖެއެވެ.

މަޖިލީހުގެ މިއަދުގެ ޖަލްސާގައި، ދައުލަތުގެ ބަޖެޓަށް ބަހުސް ކުރައްވަމުން ޢިމްރާން ވިދާޅުވީ، އާސަންދަ އާއި އެންސްޕާ ރިފޯމް ކުރުމަކީ ދުނިޔޭގެ މާލީ އިދާރާތަކުންވެސް އެތައް ޒަމާނެއް ވަންދެން ކުރަން ބުނަމުން އައި ކަންކަން ކަމަށާ އެއީ ފަސޭހަ ކަމެއް ނޫންކަމަށެވެ.

މީގެ އިތުރުން އޭނާ ވިދާޅުވީ، 65 އަހަރުން މަތީގެ މީހުންނަށް ދެވޭ އެލަވަންސް  ދޭ ގޮތް ބަދަލު ވެގެންދާނީވެސް އަންނަ އަހަރުގެ އޭޕްރީލްގެ ފަހުން ކަމަށެވެ.

މި ބަދަލު ވެގެން އަންނަ އުސޫލުގެ ތެރެއިން، އެންމެ މުއްސަނދި މަހުޖަނު މީހާ މީގެ ބައެއް ކަންކަމުގެ ތެރެއިން އުނިވެގެން ހިނގައިދާނެ. ރިސޯޓް އޯނަރެއް 65 އަހަރުވެފައި ހުންނައިރު، މަޖިލިސް މެންބަރެއް 65 އަހަރުވެފައި ހުންނައިރު، އެނޫންވެސް މާލީ ގޮތުން ތަނަވަސް ބޭފުޅަކު 65 އަހަރުން މަތިވީމާ އެ ލިބޭ އެލަވަންސް ނުލިބިގެން އުޅުނީމާ ގަބޫލެއް ނުކުރެވޭ އެއީ އިޚްލާސްތެރި ވާހަކައެއް ކަމަކަށް

ހެންވޭރު ދެކުނު ދާއިރާގެ މެންބަރު ހުސައިން އިމްރާން⁩ ލަތީފް (އިއްމު)

އިމްރާން ވިދާޅުވީ، ސަރުކާރުން ދޭ އެހީތައް ލިބެންޖެހޭނީ އޭގެ ހައްގުވެރި ފަރާތަށް ކަމަށެވެ.

އަޅުގަނޑުމެން މިއުޅެނީ ހައްގުވާ ފަރާތަށް އެއްޗެއް ކަނޑާކަށް ނޫން. އަޅުގަނޑުމެންގެ ސަރުކާރަކުން އަދި މި މަޖިލީހުގައި މިތިބަ އަޅުގަނޑުމެންގެ އެއްވެސް މެންބަރަކު، ހައްގުވާ އެއްވެސް ފަރާތަކަށް ލިބޭ އެންސްޕާ އާސަންދަ  ކަނޑާކަށް ވޯޓެއް ނުދޭނެ. އަޅުގަނޑުމެން މި މަސައްކަތް ކުރަނީ ހައްގުވެރިންނަށް އެ ހައްގެއް ދާއިމީކޮށް ލިބޭނެ މަގެއް ތަނަވަސްކުރަން.

ހެންވޭރު ދެކުނު ދާއިރާގެ މެންބަރު ހުސައިން އިމްރާން⁩ ލަތީފް (އިއްމު)

އެގޮތުން އިމްރާން ވަނީ އާސަންދައާއި އެންސްޕާއަށް ކަނޑައަޅާ ބަޖެޓް މަދު މަސްތަކެއްގެ ތެރޭގައި ހުސްވާކަން ފާހަގަކުރައްވައި، އެހެން އެކަން ވާން ބޭނުން ނުވާކަމަށް ވިދާޅުވެފައެވެ. އަދި ވަށާޖެހޭ ގޮތަކަށް ބޭނުން ޖެހިފައިވާ ފަރާތްތަކަށް އެއްވެސް ދަތިކަމެއް ނެތި، އެހީ ލިބޭނެ މަގު ތަނަވަސް ކޮށްދިނުމަކީ ސަރުކާރުގެ މަގުސަދު ކަމަށްވެސް ވިދާޅުވިއެވެ.