އިންތިޚާބީ މިނިވަން މެންބަރުންގެ މައްޗަށް އެންޓި ޑިފެކްޝަން ޤާނޫނުގައިވާ ހާލަތްތައް އަދި ނުހިނގާނެ: އީސީ

20 ވަނަ ރައްޔިތުންގެ މަޖިލީހަށް އަމިއްލަ ގޮތުން ވާދަކޮށްގެން އިންތިޚާބުވި މިނިވަން މެންބަރުންގެ މައްޗަށް އެންޓި ޑިފެކްޝަން ޤާނޫނުގައި ބުނާ ހާލަތްތައް އަދި ނުހިނގާނެކަމަށް އިލެކްޝަންސް ކޮމިޝަނުން ހާމަކޮށްފިއެވެ.

20 ވަނަ މަޖިލިސް އިންތިޚާބަށް އަމިއްލަ ގޮތުން ވާދަކުރައްވައި އިންތިޚާބު ކާމިޔާބު ކުރެއްވި 7 ކެންޑިޑޭޓަކު ވަނީ ވެރިކަން ކުރާ ޕީއެންސީއަށް ދާދިފަހުން ސޮއި ކުރައްވާފައެވެ.

އެކަމާއި ގުޅިގެން މިހާރު ތަސްދީޤްކޮށްފައިވާ އެންޓި ޑިފެކްޝަން ޤާނޫނު އެ ފަރާތްތަކުގެ މައްޗަށް ތަންފީޒު ކުރެވޭނެތޯ ނުވަތަ ނޫންތޯ އާއި، އެ މެންބަރުންގެ ގޮނޑި ގެއްލޭނެތޯ ބައެއް ފަރާތްތަކުން އަންނަނީ ސުވާލު އުފައްދަމުންނެވެ.

އެކަމާއި ގުޅިގެން، ދައުލަތު މީޑިޔާގެ ރޭގެ ރާއްޖެ މިއަދު ޕްރޮގްރާމްގައި އިލެކްޝަން ކޮމިޝަންގެ މެންބަރު ހަސަން ޒަކަރިއްޔާ ވިދާޅުވީ، އިންތިޚާބީ މެންބަރުން ޕާޓީއާކާ ގުޅުނު ހިސާބުން ކުރެވެން ފެށި ބަހުސްތަކާއި ގުޅިގެން އެކަމުގެ ޤާނޫނީ ދިރާސާތައް ކޮމިޝަންގެ ލީގަލް ޓީމުން ހެދިކަމަށެވެ.

އެގޮތުން ކުރެވުނު ދިރާސާ ތަކަށް އަލި އަޅުވާ ލައްވަމުން ޙަސަން ޒަކަރިއްޔާ ވިދާޅުވީ، އެންޓި ޑިފެކްޝަން ޤާނޫނުގެ 3 ވަނަ މާއްދާގައި މެންބަރަކު ވަކިވާ 3  ހާލަތެއް ބަޔާންކޮށްފައިވާ ކަމަށެވެ. އަދި އެ 3 ހާލަތުގައިވެސް ބަޔާންކޮށްފައި އޮތީ މެންބަރަކު އިންތިޚާބު ވުމަށް ފަހު، އިންތިޚާބީ ދައުރުގެ ތެރޭގައި އެފަދަ ކަމެއް ކުރުންކަން އޭނާ ފާހަގަކުރެއްވިއެވެ.

93 ދާއިރާއަށްވެސް އިންތިޚާބުވި މެންބަރުންގެ ދައުރު މި ފެށެނީ، އެބޭފުޅުން ހުވާ ކުރުމަށްފަހު މި ބާއްވާ ފުރަތަމަ ޖަލްސާ ބާއްވާ ހިސާބުން. އެހެންވީމާ ރައްޔިތުންގެ މަޖިލީހަށް އަމިއްލަ ގޮތުން ވާދަކޮށްގެން ހޮވުނު 11 މެންބަރުންގެ މިދެންނެވި އެންޓި ޑިފެކްޝަން ޤަނޫނުގެ 3 ވަނަ މާއްދާގެ މިބުނާ އެއްވެސް ހާލަތެއް އަދި ނުހިންގާ. އަދި އެ ޤާނޫނުގެ އިޙްތިޞާސްގެ ތެރެއަކަށް މިދެންނެވި ގޮތަށް އިންތިހާބު ކާމިޔާބުކުރެއްވި އެއްވެސް ބޭފުޅަކު ނުވަދޭ. އެހެންވީމަ ހުވާކުރުމަށްފަހު ބާއްވަ ފުރަތަމަ ޖަލްސާއިން ފެށިގެން އިންތިހާބުވި ބޭފުޅުން މިދެންނެވި ޤާނޫނުގެ ތެރެއަށް މިވަންނަނީ"

އީސީގެ މެންބަރު ހަސަން ޒަކަރިއްޔާ

މަޖިލިސް އިންތިޚާބުގައި އަމިއްލަ ގޮތުން އިންތިހާބުގައި ވާދަކޮށް ހޮވުނު 11 މެންބަރުންގެ ތެރެއިން ޕީއެންސީއާ ގުޅުނު 7 މެންބަރުންނަކީ؛

1) ޑރ. އަނާރާ ނަޢީމް – ހުރާ ދާއިރާ

2) ޙަސަން ޒަރީރު – މަތިވެރި ދާއިރާ

3) އަހްމަދު ޒަމީރު – މައްޗަންގޮޅި މެދު ދާއިރާ

4) އަޙްމަދު ރިޔާޒް – ތިމަރަފުށި ދާއިރާ

5) ޔާސީން ޢަބްދުالله - ނައިފަރު ދާއިރާ

6) ޢާޒިމް ޢަބްދުލް ޢަޒީޒް – ވިލިނގިލި ދާއިރާ

7) މުޙައްމަދު ރަޝީދު (ރަޝީދުބެ) - ނޮޅިވަރަމް ދާއިރާ