ގައުމު ހަލާކުކޮށް ގައުމުގެ ހަރުމުދާ ވިއްކަން އަޅުގަނޑުމެން ނުނިކުންނާނަން: ޢާޒިމާ
ގައުމު ހަލާކުކޮށް ގައުމުގެ ހަރު މުދާ ވިއްކަން ނުނިކުންނަވާނެ ކަމަށް ޕީއެންސީގެ ފަރާތުން މާލޭގެ މޭޔަރު ކަމަށް ވަދަކުރައްވާ ކުރީގެ ބަންޑާރަ ނާއިބު އާއިޝަތު އާޒިމާ ޝަކޫރު ވިދާޅުވެއްޖެއެވެ.
މާފަންނުގެ ރައްޔިތުންނަށް ހާއްސަކޮށްގެން ރޭ ކުރިއަށް ގެންދިޔަ ކެމްޕެއިން ޖަލްސާގައި އާޒިމާ ވިދާޅުވީ ބަލާލި ކޮންމެ ދިމާއަކުންވެސް ނިމިދިޔަ ފަސް އަހަރުގެ ތެރޭގައި ފެންނަމުން ދިޔައީ ގައުމު ފަނާކުރެވެމުން ދިޔަތަން ކަމަށެވެ. އެގޮތުން ބަޖެޓާއި، ގައުމުގެ މާލިއްޔަތާއި، ގައުމުގެ ދަރިންނާއި އަދި އިޖުތިމާއީ ފޭރާންވެސް ހަލާކުވެގެން ދިޔަކަމަށްވެސް އާޒިމާ ވިދާޅުވިއެވެ.
އަދި އެކަން ކަމާއި ޚިލާފަށް، އަދުގެ ސަރުކާރާއިއެކު، ޢާޒިމާ ޓީމު ނުކުންނެވީ ދިވެހިންގެ ދިވެހި ރާއްޖެ ކަށަވަރުކޮށް، ރާއްޖޭގެ މިނިވަންކަމާއި ދިވެހި ގައުމިއްޔަތުގެ ގައުމިއްޔަތު ހިފަހައްޓައި ޅަ ކުދިންގެ މުސްތަގްބަލް ޔަގީންކޮށް ދިނުމަށް ކަމަށް އޭނާ ވިދާޅުވި އެވެ.
އެހެންކަމުން އޭނާ ވަނީ މި ސަރުކާރުން ފަށާފައިވާ ތަރައްގީގެ ދަތުރު އަދި ގައުމިއްޔަތުގެ ދަތުރު ދެބައިވިޔަ ނުދެއްވުމަށާއި ގައުމުގެ މާލެ އެއްދިމާލަށް އަދި އަނެއްބައި އެހެން ދިމާލަކަށް ދިޔާަ ނުދިނުމަށް އެދިފައެވެ. އަދި އެހެން ވެއްޖެ ނަމަ، މައްސަލަތަކެއް ހައްލު ނުކުރެވޭނެ ކަމަށް ވިދާޅުވިއެވެ.
"މާލެ އެއް ދިމާލަށް، ގައުމު އަނެއް ދިމާލަށް ގެންގޮސްގެން އަޅުގަނޑުމެންގެ މައްސަލަތައް ހައްލު ނުވާނެ. ގަބޫލު ކުރައްވާ މި ގައުމުގެ މިނިވަންކަމުގެ ވާހަކައަކީ ސީރިއަސް ވާހަކައެއް. އަޅުގަނޑުމެން މި ހީކުރާ ވަރަށް ވުރެ ސީރިއަސް ވާހަކައެއް."
ޢާއިޝަތު ޢާޒިމާ ޝަކޫރު
އާޒިމާ އިތުރަށް ވިދާޅުވީ ވިދާޅުވީ އޭނާ އާއި ދެން ތިއްބެވި ޕީއެންސީގެ ކެންޑިޑޭޓުން ނުކުންނެވީ ސަރުކާރުގެ ކެންޑިޑޭޓުންގެ ގޮތުގައެވެ. އަދި އޭނާ ގާތުގައި ސަރުކާރު ކެންޑިޑޭޓަކަށް ވޯޓު ދޭންވީ ކީއްވެތޯ ބައެއް މީހުން އަހާކަން ފާހަގަކުރައްވައި އާޒިމާ ވިދާޅުވީ ސަރުކާރުގެ ކެންޑިޑޭޓަކަށް ވޯޓު ދޭންވީ ސަރުކާރުގެ ކެންޑިޑޭޓުންނަނީ ގައުމު ދެކެ ލޯބިވާ މީހުންނަށް ވާތީ ކަމަށެވެ.
"އަޅުގަނޑުމެން ނުނިކުންނާނެ ގައުމު ހަލާކު ކުރާކަށް. އަޅުގަނޑުމެން ނުނިކުންނާނެ ގައުމުގެ ހަރު މުދާ ވިއްކާކަށް. އަޅުގަނޑުމެން ނުނިކުންނާނެ ގައުމުގެ ގައުމިއްޔަތު ވިއްކާކަށް."
ޢާއިޝަތު ޢާޒިމާ ޝަކޫރު
މާލޭ މޭޔަރ ކަމަށް ޖުމުލަ 5 ކެންޑިޑޭޓުން ބައިވެރިވާއިރު, އެ އިންތިޚާބު ބޭއްވުމަށް ހަމަޖެހިފައިވަނީ އަންނަ ހޮނިހިރު ދުވަހުއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
