ނަތަންޔާހޫ އދ. ގައި ވާހަކަދައްކަން ފެށުމުން ރާއްޖެ ހިމެނޭހެން ގިނަ ގައުމުތަކުން ހޯލުން ނުކުމެއްޖެ

އދ. ގެ އާންމު މަޖިލީހުގައި އިޒްރޭލުގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ތަގުރީރުކުރަން ފެށުމާ އެކު، ދިވެހިރާއްޖެ ހިމެނޭ ގޮތަށް 70 އަށް ވުރެ ގިނަ ގައުމެއްގެ މަންދޫބުން އިހުތިޖާޖުކޮށް ޖަލްސާކުރާ މާލަން ދޫކޮށް ނުކުމެއްޖެއެވެ.

އެމެރިކާގެ ނިއުޔޯކުގައި ހުންނަ އދ. ގެ މައި މަރުކަޒުގައި ކުރިއަށްދިޔަ އާންމު މަޖިލީހުގެ ޖަލްސާގައި ނަތަންޔާހޫ ވާހަކަދައްކަން ޕޯޑިއަމަށް އެރުމާ އެކު، ގިނަ އަދަދެއްގެ ގައުމުތަކުގެ ވަފުދުތަކުން ވަނީ ހޯލުން ނުކުމެ، އިޒްރޭލުން ފަލަސްތީނުގެ ޣައްޒާގައި ހިންގަމުންދާ ލާއިންސާނީ ގަތުލުއާންމާއި ހަނގުރާމައިގެ ޖަރީމާތަކާ ދެކޮޅަށް ވަރުގަދަ މެސެޖެއް ދީފައެވެ.

އެގޮތުން ދިވެހިރާއްޖޭގެ ވަފުދުން ވެސް ބައިވެރިވެ، ފަލަސްތީނުގެ ހައްގުގައި އަޑުއުފުލައި ނަތަންޔާހޫ ބޮއިކޮޓްކުރިއެވެ.

މަންދޫބުން ހޯލުން ނުކުމެގެން ދިޔަ ވަގުތު ރުޅިގަދަވެފައި ހުރެ ނަތަންޔާހޫ ވަނީ އެ ގައުމުތަކުގެ މަންދޫބުންނަކީ "ފިނޑިން" ކަމަށް ބުނެފައެވެ. އަދި އޭނާގެ ވާހަކައިގައި، ނިއުޔޯކުގެ މޭޔަރު ޒޮހްރާން މަމްދާނީ އޭނާއަކީ ހަނގުރާމައިގެ ކުށްވެރިއެއްގެ ގޮތުގައި ސިފަކުރެއްވުމުން އެކަމަށް ވަރަށް ބޮޑަށް ފާޑުކިޔައި، ގަތަރާއި ތުރުކީން އިޒްރޭލާ ދެކޮޅަށް ދޮގު ފަތުރާ ކަމަށް ބުނެ ތުހުމަތުކުރިއެވެ.

ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ގަތުލުއާންމު ދިފާއުކޮށް ނަތަންޔާހޫ ދެއްކި ވާހަކަތަކަށް ރައްދު ދެއްވަމުން މޭޔަރު މަމްދާނީ ވިދާޅުވީ، ނަތަންޔާހޫ އދ. ގެ ޕޯޑިއަމް ބޭނުންކުރީ އޭނާ ހިންގާ ގަތުލުއާންމު އޮއްބާލަން ކަމަށާއި، ނަމަވެސް އޭނާއަކީ ބައިނަލްއަގުވާމީ ޖިނާއީ ކޯޓު (އައިސީސީ) އިން ހައްޔަރުކުރުމުގެ އަމުރު ނެރެފައިވާ ހަނގުރާމައިގެ ކުށްވެރިއެއް ކަމުގެ ހަގީގަތް ބަދަލުނުކުރެވޭނެ ކަމަށެވެ. އަދި ގަތަރުން ވެސް ވަނީ ނަތަންޔާހޫގެ ތުހުމަތުތައް ދޮގުކޮށްފައެވެ.

އިޒްރޭލުގައި އޮންނަ އާންމު އިންތިޚާބާ ދިމާކޮށް ސިޔާސީ ކެމްޕޭނެއްގެ ގޮތުގައި ނަތަންޔާހޫ ކުރިއަށް ގެންދިޔަ މި ތަގުރީރާ ދިމާކޮށް، އދ. ގެ މައި އިދާރާ ބޭރުގައި ވެސް އެތައް ސަތޭކަ ބަޔަކު ވަނީ ފަލަސްތީނުގެ ހައްގުގައި އަޑުއުފުލައި، އިޒްރޭލަށް ހަތިޔާރު ދިނުން ހުއްޓާލުމަށް ގޮވާލައި ވަރުގަދަ މުޒާހަރާއެއް ކޮށްފައެވެ.