މެލޭޝިއާގެ ބޮޑުވަޒީރު އަންވަރު އިބްރާހީމް ރަސްމީ ދަތުރުފުޅެއްގައި ރާއްޖެ ވަޑައިގަންނަވަނީ

މެލޭޝިއާގެ ބޮޑުވަޒީރު އަންވަރު އިބްރާހީމް ރަސްމީ ދަތުރުފުޅެއްގައި ދިވެހިރާއްޖެއަށް ވަޑައިގަތުމަށް ހަމަޖެހިއްޖެއެވެ.

މައުލޫމާތު ލިބިފައިވާ ގޮތުގައި ބޮޑުވަޒީރު އަންވަރުގެ މި ދަތުރުފުޅު ތާވަލްކޮށްފައިވަނީ އިންޑިއާގައި ބޭއްވުމަށް ހަމަޖެހިފައިވާ ބްރިކްސް ސަމިޓަށްފަހުއެވެ. އެ ސަމިޓަށްފަހު ބޮޑުވަޒީރު އަންވަރު ރާއްޖެއަށް ކުރައްވާ ދަތުރުފުޅު އޮންނާނީ މިހިނގާ ސެޕްޓެމްބަރުމަހުގެ 14 ވަނަ ދުަވަހުއެވެ. މި ދަތުރުފުޅުގައި ދެ ދުވަހު އެމަނިކުފާނު ރާއްޖޭގައި މަޑުކުރައްވާނެއެވެ. މިއީ މެލޭޝިއާގެ ބޮޑުވަޒީރު ރާއްޖެއަށް ކުރައްވާ ފުރަތަމަ ރަސްމީ ދަތުރުފުޅެވެ.

ބޮޑުވަޒީރު އަންވަރުގެ މި ރަސްމީ ދަތުރުފުޅާ ގުޅޭގޮތުން ދިވެހި ސަރުކާރުން އަދި ރަސްމީކޮށް އެއްވެސް އެއްޗެއް ހާމަކޮށްފައެއް ނުވެއެވެ.

މި ދަތުރުފުޅަކީ، ބޮޑުވަޒީރު އަންވަރު އިބްރާހީމްގެ ދައުވަތަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިދިޔަ އަހަރު މެލޭޝިއާއަށް ކުރެއްވި ރަސްމީ ދަތުރުފުޅާ ގުޅިގެން ކުރައްވާ ދަތުރުފުޅެކެވެ.