ސަރުކާރުގެ އަމަލުތަކުގެ ސަބަބުން ބޭރުގެ ފަރާތްތަކުގެ މެދުގައި ރާއްޖޭގެ މާލީ އިދާރާގެ އިތުބާރު ގެއްލިއްޖެ: އަމީރު

ރުފިޔާ ކާޑަށް ބޭރުފައިސާގެ މުއާމަލާތްކުރުން ހުއްޓާލުމަށް ނިންމި މައްސަލައާ ގުޅިގެން މި ހިނގާދިޔަ ކަންތައްތަކުގައި ސަރުކާރުގެ އަމަލުތައް މިހާތަނަށް ފެނިގެންދިޔައީ، ރާއްޖޭގެ މާލީ ނިޒާމުގެ އިތުބާރު ގެއްލޭގޮތަށްކަމަށް މިދިޔަ ސަރުކާރުގެ ފިނޭންސް މިނިސްޓަރު އަލީ އަމީރު ވިދާޅުވެއްޖެއެވެ.

އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އަމީރު ވިދާޅުވީ، ރާއްޖޭގެ މާލީ ނިޒާމުގެ އިތުބާރު ގެއްލޭގޮތަށް ސަރުކާރުގެ އަމަލުތައް މިއަދު ހުރީތީ، އެމްޑީޕީން ކަންބޮޑުވާ ކަމަށާއި، ހައްސަކޮށް ޤައުމީ ބޭންކާ ގުޅުވައިގެން ފަތުރަމުންދާ ވާހަކަތަކާމެދު ނިހާޔަތަށް ކަންބޮޑުވާކަމަށެވެ.

އަމީރު ވިދާޅުވީ، ބޭންކް އޮފް މޯލްޑިވްސްއިން މާލީ ބަގާވާތެއް ގެނައުމަށް ރައީސުލްޖުމްހޫރިއްޔާ އާއި ވަޒީރުން ވާހަކަދެއްކެވުމަކީ އެކަމުގެ ސަބަބުން ހީވެސް ނުކުރާފަދަ ހާލަތަކަށް ރާއްޖޭގެ އިޤްތިސާދުގެ މިސްރާބު ހިނގައިދާނޭ ކަމެއް ކަމަށެވެ. އެކަމަކީ ބޭރުގެ މާލީ އިދާރާތަކުން ރާއްޖޭގެ ޤައުމީ ބޭންކަށް ކުރާ އިތުބާރު ގެއްލިގެންދާނޭ ފަދަ ކަމެއްކަމަށްވެސް އަމީރު ފާހަގަކުރެއްވިއެވެ. އަމީރު ވިދާޅުވީ ގަވަރުނަރު ބަދަލުކުރުމާ މިބާވަތުގެ ކަންކަމަކީ އިގްތިސާދީ ހާލަތު އޮތްގޮތުން މިވަގުތައް ކުރަން ހެޔޮނުވާވަރުގެ ކަންކަން ކަމަށެވެ.

އިގްތިސާދުގެ އެންމެ މުހިއްމު އެކެއްޗަކީ ކޮންފިޑެންސް. ބޭންކުގެ އިތުބާރު ގެއްލޭގޮތަށް ވާހަކަދެއްކުމަކީ އަޅުގަނޑުމެންގެ މާލީ ނިޒާމުގެ އިތުބާރު ގެއްލޭނޭ ކަމެއް.އަޅުގަނޑުމެން ހަނދާން ކުރަންޖެހޭނެ ޕީއެންސީ ހަރުގޭގައި މިހާރު ވާހަކަދައްކަނީ ޕީއެންސީގެ ރައީސެއްނޫންކަން. އެއީ ރާއްޖޭގެ އިއްޒަތްތެރި ރައީސުލްޖުމްހޫރިއްޔާ

އަމީރު ވިދާޅުވިއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޑީޕީގެ ރައީސް ޢަބްދުﷲ ޝާހިދު ވިދާޅުވީ، ފެނިގެންމިދިޔައީ ސަރުކާރުގެ ތެރޭގައި އޮންނަންޖެހޭ ގުޅުންތައް  އެއްވެސް ވަރަކަށް ނެތް މަންޒަރު ކަމަށާއި، އެތައް ގޮތަކުން ވިސްނިނަމަވެސް މިއީ ކަންބޮޑުވާންޖެހޭ ކަމެއްކަމަށެވެ.

ޝާހިދު ވިދާޅުވީ ސްކޭމްތަކާ އެނޫންވެސް ކަންކަމާ ގުޅިގެން މިއަދު ރައްޔިތުންގެ މެދުގައި ޤައުމީ ބޭންކާމެދު އޮންނަ އިތުބާރާމެދު ސުވާލު އުފެދިފައިވާކަމަށެވެ.  އެފަދަ ވަގުތެއްގައި ޤައުމުގެ ރައީސާ، ވަޒީރުންނާ ނިކުމެ ބޭންކްގެ ސީއީއޯ އިސްތިއުފާ ދޭންޖެހޭނޭކަމަށް ވިދާޅުވުމަކީ ޤައުމިއްޔަތަށް ހުރި ގެއްލުމެއްގެ ގޮތުގައި ޝާހިދު ސިފަކުރެއްވިއެވެ.

ރާއްޖޭގެ ވަލިއްޔުލްއަމްރު ނިކުމެ ވަޑައިގެން މި ދަންނަވަނީ އެބަ ބަގާވާތެއްކުރެޔޭ. އަޅުގަނޑުމެން އެބަ ވިސްނާލަންޖެހޭ އެ ބޭންކުގެ އެންމެބޮޑު ހިއްސާދާރަކީ ސަރުކާރު. ސަރުކާރުގެ ކޮންޓްރޯލް އޮތް ބޭންކަކުން ސަރުކާރާ އިދެކޮޅަށް ބަގާވާތެއްކުރާކަން އެންމެ މަތީ ވެރިޔަކު ވިދާޅުވާ ހިސާބުން ނުރައްކަލަށް އެ ފުރޮޅިގެން އެދަނީ ހަމައެކަނި އެ ބޭންކުގެ ޗީފް އެގްޒެކްޓިވް އޮފިސަރެއް ނޫން. ބޭންކުގެ ބޯޑު މެމްބަރުންނެއްނޫން. މިއަދު އެ ބޭންކުގައި ވަޒީފާ އަދާކުރާ ހުރިހާ މުއައްޒަފުންނާ ދިމާލަށްވެސް އެ ދިއްކުރެވެނީ ވަރަށް ވަރުގަދަ އިނގިއްޔެއް. ބޭންކްގަ މަސައްކަތްކުރާ ހުރިހާ މުއައްޒަފުން އެ ފުރޮޅާލެވެނީ ވަރަށްބޮޑު ނުރައްކަލަކަށް.

ޝާހިދު ވިދާޅުވިއެވެ.

ރުފިޔާ ކާޑަށް ޑޮލަރު ދޫކުރުމުގައި ބޭންކުން ނިންމި ނިންމުމަށް ސަރުކާރުން އަމަލުކުރިގޮތާމެދު އިދިކޮޅު އެމްޑީޕީން ކަންބޮޑުވުން ފާޅުކޮށްފައިވާއިރު، ސަރުކާރުން ބުނަމުންދަނީ ރާއްޖޭގެ އިޤްތިސާދު މިހާލަތަށް ވެއްޓުނީ އެމްޑީޕީން މިދިޔަ ފަސްއަހަރު ވެރިކަންކުރި ގޮތުންކަމަށެވެ. އެގޮތުން އެމްޑީޕީވެރިކަމުގައި ގެންގުޅުނު މާލީ ސިޔާސަތުގެ ދޯހަޅިކަން ސަރުކާރުން ފާހަގަކުރެއެވެ.