ތާއީދު ކުރަނީ ދެ އިންތިހާބު އެއްދުވަހެއްގައި ބޭއްވުމަށް: ފުއާދު

ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމަކީ ޤައުމަށް އެންމެ ފައިދާހުރި ގޮތްކަމަށް އިލެކްޝަން ކޮމިޝަންގެ ކުރީގެ ރައީސް ފުއާދު ތައުފީގު ވިދާޅުވެއްޖެއެވެ.

ރާއްޖެއިން ތައިލެންޑަށް ކަނޑައަޅުއްވާފައި ހުންނަވާ ސަފީރުގެ މަޤާމުގައި މިހާރު ހުންނެވި ފުއާދު "އެމްއެމްޓީވީ" އަށް ދެއްވި ބަސްދީގަތުމެއްގައި ވިދާޅުވީ، ތާއީދުކުރެވެނީ ދެ އިންތިހާބު އެއްދުވަހެއްގައި ބެއްވުމަށްކަމަށެވެ. އެގޮތުން ދެ އިންތިޚާބު އެއް ދުވަހެއްގައި ބޭއްވުމުން މުޅި ގައުމަށް އޭގެ ފައިދާ ލިބިގެންދާނެ ކަމަށް ފުއާދު ވިދާޅުވިއެވެ.

އިލެކްޝަންސް ކޮމިޝަނުގެ ރައީސްކަމުގެ މަޤާމު ބެލެހެއްޓެވި އެންމެ މަޤްބޫލު ރައީސްކަމަށް ގިނަ ބަޔަކު އިއްތިފާގުވާ ފުއާދު ވިދާޅުވީ، ދެ އިންތިހާބު ދެމެދުގައި އޮންނަ ހަމަސް މިހާރު ފާހަގަކުރެވެނީ، ހަނގުރާމައެއްގެ ގޮތުގައިކަމަށެވެ. އެގޮތުން އެ ހަމަސްދުވަސް ދަނީ ޤައުމަށް އެންމެ އުފެއްދުންތެރިގޮތުގައި ނޫންކަމަށް ފުއާދު ފާހަގަކުރެއްވިއެވެ.

ދެ އިންތިހާބު ދެމެދު އޮންނަ ހަ މަސް މިހާރު ވެފައި މި އޮތީ ހަނގުރާމައިގެ ހަ މަހަށް. ސަރުކާރަށް ޖެއްސުން ކުރުމުގެ ހަ މަހަށް. ދެ އިންތިބު އެއް ދުވަހެއްގައި ބާއްވަންވީ އެ ހަ މަސް ދުވަހު ސަރުކާރަކަށް މަޖިލީހުގެ އެއްބާރުލުން ނުލިބޭތީ އެ މައްސަލަ ހައްލުކުރަން.

ފުއާދު ވިދާޅުވިއެވެ.

ފުއާދު އިތުރަށް ވިދާޅުވީ، މީގެ ކުރިން އެމްޑީޕީ ސަރުކާރުގައި ވެސް މިކަމާ ގުޅޭ މަޝްވާރާތަކެއް ކުރެވުނު ކަމަށާއި ނަމަވެސް، މަޖިލީހުގެ ސުޕަ މެޖޯރިޓީ ލިބިމުން އެކަން އެމްޑީޕީއިން ވަނީ ހަނދާން ނައްތާލީކަމަށެވެ.

ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމުގެ ބިލް ދާދިފަހުން ރައްޔިތުންގެ މަޖިލީހުން ވަނީ ފާސްކޮށްފައެވެ. ނަމަވެސް މި ބަދަލު ގާނޫނުއަސާސީއަށް ގެނޭވޭނީ ރައްޔިތުންގެ މެދުގައި އާންމު ވޯޓެއް ބާއްވައި އެކަމަށް އަޣުލަބިއްޔަތު ލިބިގެންނެވެ. އެގޮތުން، އަންނަ އޭޕްރިލް މަހު ސަރުކާރުން ވަނީ ފެންނަ ނުފެންނަ ވޯޓެއް ރައްޔިތުންގެ މެދުގައި ބޭއްވުމަށް ނިންމައިފައެވެ.

ސަރުކާރުން ފާހަގަކުރާ ގޮތުގައި ރިޔާސީ އިންތިޚާބާއި މަޖިލީސް އިންތިޚާބު އެއް ދުވަހެއްގައި ބޭއްވުމުން އިންތިޚާބު ތަކަށް ކުރަން ޖެހޭ ޚަރަދު ކުޑަވެގެން ދާނެއެވެ.

އިދިކޮޅު އެމްޑީޕީން މީގެ ކުރިން ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްދުވަހެއްގައި ބޭއްވުމުގެ ވާހަކަ ކުރިން ދެއްކިނަމަވެސް، ސަރުކާރުން އެކަން ކުރަން މަސައްކަތް ފެށުމާއެކު އެ ޕާޓީގެ ރާގު ވަނީ ބަދލުވެފައެވެ. އެގޮތުން މިހާރު އެމްޑީޕީން ބުނަމުންދަނީ ދެ އިންތިހާބު އެއްދުވަހެއްގައި ބާއްވަން ސަރުކާރުން އުޅެނީ ރައްޔިތުންގެ ބާރު ކަނޑުވާލުމަށް ކަމަށެވެ.