އުނގޫފާރުގައި ހިނގި ކަރަންޓުގެ ހާދިސާއާއި ގުޅިގެން ފެނަކަ ޖޫރިމަނާކޮށްފި

މިދިޔަ މެއި މަހުގެ 23 ވަނަ ދުވަހު ރ. އުނގޫފާރުގައި، މަގުބައްތިއެއް ކައިރީ އޮތް ފެން ކޯރެއްގެ ތެރޭގައި ކުޅެން ތިބި ކުދިން ތަކެއް ކަރަންޓްގައި ޖެހި އެއްކުއްޖަކު ނިޔާވި ހަދިސާގައި ފެނަކައިގެ އިހުމާލުކޮށް ކަމަށް ނިންމައި، ޔުޓިލިޓީ ރެގިއުލޭޓަރީ އޮތޯރިޓީން އެ ކުންފުނި ޖޫރިމަނާކޮށްފިއެވެ.

ޔުޓިލިޓީ ރެގިއުލޭޓަރީ އޮތޯރިޓީން ބުނީ، އުނގޫފާރުގައި ކުޑަކުދިންތަކެއް ކަރަންޓުގައި ޖެހި ހިނގައިދިޔަ ހިތާމަވެރި ހާދިސާގެ މަޢުލޫމާތު އެ އޮތޯރިޓީއަށް ލިބުނީ މީސް މީޑިއާގެ ޒަރިއްއާއިން 24 މެއި 2024 ވަނަ ދުވަހުކަމަށާއި، މައުލޫމާތު ލިބުމާއެކު މި މައްސަލައިގެ ތަހްޤީޤު ފެށިކަމަށެވެ.

ކަން ހިނގައިދިޔަ ގޮތާއި މި ހާދިސާ ހިނގަން މެދުވެރިވި ސަބަބު އުނގޫފާރު ކައުންސިލުންނާއި ފެނަކަ މެދުވެރިކޮށް ސާފު ކުރިކަމަށް އެ އޮތޯރިޓީން މައުލޫމާތު ދެއެވެ.

އޮތޯރިޓީން ބުނީ، މިމައްސަލައިގެ ތަޙްޤީގުން ފާހަގަވިގޮތުގައި މި މައްސަލަ ދިމާވަން މެދުވެރިވި ސަބަބަކީ، މަގު ބައްތިތަކުގައި ހުންނަންޖެހޭ ސަލާމަތީ އިކުއިޕްމަންޓްތަކުގެ ތެރޭގައި ހިމެނޭ އާރތު ލީކް ސަރކިޓް ބްރޭކަރ (އީ.އެލް.ސީ.ބީ) އާއި މިނިއޭޗަރ ސަރކިޓް ބްރޭކަރ (އެމް.ސީ.ބީ) ހަރުކުރެވިފައިވާނުވާ މަގު ބައްތިތަކަށް ފެނަކަ ކޯޕަރޭޝަން ލިމިޓެޑުން ކަރަންޓު ދިނުން ކަމަށެވެ. އަދި ފެނަކައިން ކަރަންޓުގެ ޚިދުމަތް ދެމުންގެންދާ ވަރަށް ގިނަ ރަށްތަކުގެ މަގު ބައްތިތަކުގައި އީ.އެލް.ސީ.ބީ ހަރުކުރެވިފައިނުވާކަން ވެސް ތަހުގީގަށް ފާހަގަވިކަމަށް ޔުޓިލިޓީ ރެގިއުލޭޓަރީ އޮތޯރިޓީން ފާހަގަކުރިއެވެ.

މިހާދިސާ ހިނގަން މެދުވެރިވި މައިގަނޑު ސަބަބކީ އެ ރަށުގެ މަގުބައްތިތަކަށް ކަރަންޓް ދިނުމުގައި ހުންނަންޖެހޭ ސަލާމަތީ ކަންކަމާމެދު ފެނަކަ ކޯޕަރޭޝަން ލިމިޓެޑުގެ އިހުމާލުވުމުން ކަމަށް އެ އޮތޯރިޓީގެ ތަހުގީގަށް ސާބިތުވެފައިވާތީ ޔުޓިލިޓީ ރެގިއުލޭޓަރީ އޮތޯރިޓީގެ ޤާނޫނުގެ ދަށުން ފެނަކަ ވަނީ 50,000 ރުފިޔާއިން ޖޫރިމަނާ ކޮށްފައެވެ.

މި ފައިސާ ސަރުކާރު ބަންދު ނޫން 30 ދުވަހުގެ ތެރޭގައި އެ ދެއްކުމަށް ފެނަކައަށް އަންގާފައިވާ ކަމަށާއި، މިފަދަ ހާދިސާތަކުން ރައްކާތެރި ވުމަށްޓަކައި ފެނަކަ ކޯޕަރޭޝަން ލިމިޓެޑުން ކަރަންޓުގެ ޚިދުމަތް ފޯރުކޮށްދޭ ރަށްރަށުގެ ތެރެއިން، މަގު ބައްތި ތަކުގައި އާރތު ލީކް ސަރކިޓް ބްރޭކަރ  އާއި މިނިއޭޗަރ ސަރކިޓް ބްރޭކަރ ހަރުނުކޮށް ހުރި ނަމަ، އެ ތަކެތި ސަރުކާރު ބަންދު ނޫން 30 ދުވަހުގެ ތެރޭގައި ހަރުކޮށް މަގު ބައްތިތަކުގެ ރައްކާތެރިކަން ކަށަވަރު ކުރުމަށް ވެސް އެ އޮތޯރިޓީން ވަނީ އަންގާފައެވެ. އަދި މި މުއްދަތުގެ ތެރޭގައި އެކަން އިސްލާހު ނުކުރެވިއްޖެނަމަ، އެކަންކޮށް ނިމެންދެން މަގުބައްތިތަކުން ކަރަންޓުގެ ޚިދުމަތް މެދުކަނޑާލުމަށް ވެސް ފެނަކައަށް އެންގިފައިވާ ކަމަށް ޔުޓިލިޓީ ރެގިއުލޭޓަރީ އޮތޯރިޓީން މައުލޫމާތު ދެއެވެ.

އުނގޫފާރުގައި ހިނގި މި ހާދިސާ އާއި ގުޅިގެން އުމުރުން 18 އަހަރާއި، 12 އަހަރާއި 8 އަހަރުގެ ކުއްޖަކަށް އުނގޫފާރު ހޮސްޕިޓަލުން ފަރުވާދިނެވެ.  އޭގެ ތެރެއިން 12 އަހަރާއި 8 އަހަރުގެ ދެކުދިން ފަރުވާއަށް ފަހު ދޫކޮށްލިއިރު، 18 އަހަރުގެ ކުއްޖާ ވަނީ އައިޖީއެމްއެޗްގައި ވެންޓިލޭޓަރުގައި ފަރުވާދެމުންދަނިކޮށް މިދިޔަ ޖޫން މަހުގެ 8 ވަނަ ދުވަހު ނިޔާވެފައެވެ.