ރައްޔިތުންގެ ނަމުގައި، ޖަމީލް އާއި މަލީހުއަށް ވާހަކަދެއްކުމުގެ ހައްޤު ލިބިގެންވޭތޯ އަދުރޭ ސުވާލު އުފައްދަވައިފި

ދިވެހި ރައްޔިތުންގެ ނަމުގައި މަލީހު އާއި ޑރ.ޖަމީލުއަށް ވާހަކަދެއްކުމުގެ ހައްޤު ލިބިގެންވޭތޯ، ޕީއެންސީގެ ޗެއާޕާސަން އަދި ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ (އަދުރޭ) ސުވާލު އުފައްދަވައިފިއެވެ.

މަލީހު އާއި ޑރ.ޖަމީލް، ރައީސް ޑރ.މުއިއްޒު އަށާއި، ސަރުކާރަށް ނިސްބަތްވެ ވަޑައިގަންނަވާ ބޭފުޅުންނަށް އަމާޒުކޮށް ދައްކަމުންގެންދާ ވާހަކަތަކާ ގުޅޭގޮތުން ޕީއެންސީން މިރޭ ބޭއްވި ޖަލްސާގައި ވާހަކަދައްކަވަމުން އަދުރޭ ވިދާޅުވީ، ޑިމޮކްރަސީއެއްގައި ތާއީދު އޮންނަކަން އެނގެނީ ރައްޔިތުން ނަގާ ވޯޓުން ކަމަށާއި، މިހާތަނަށް ފެނިގެންދިޔަ އިންތިހާބުތަކުން މަލީހު އާއި ޖަމީލުއަށް އެކަން ދެއްކިފައި ނެތްކަމަށެވެ.

ޑރ.ޖަމީލަކީ ސަރުކާރުގެ ވަރަށް މަތީ މަޤާމުތަކެއް ފުރުއްވާފައިވާ ބޭފުޅެއްކަން ފާހަގަކުރައްވަމުން އަދުރޭ ވިދާޅުވީ، އެންމެފަހުން ވިލިމާލެ ދާއިރާގެ މެމްބަރުކަމަށް ކުރިމަތިލައިގެން އެ ދާއިރާގެ ރައްޔިތުންގެ ތާއީދެއް ނުލިބުނު ކަމަށެވެ. ހަމަ އެގޮތަށް މަލީހް އަމިއްލަ ރަށަށް ލައިގެންވެސް އެކަށީގެންވާ ވަރާ ގާތަށްވެސް ވޯޓު ނުލިބުނުކަމަށް އަދުރޭ ވިދާޅުވިއެވެ.

ލީޑަރަކު ލީދަރަކަށް ވަނީ ފަހަތުގައި މީހުން ތިބީމައި. އިހުލާސްތެރި ބަޔަކު ތިބީމައި ލީޑަރަކަށް ވަނީ. އެ ލީޑަރެއްގެ އަގު ހިފަހައްޓައިދޭނެ ބަޔަކު ތިބީމައި ލީޑަރަކަށް ވަނީ

ޕީއެންސީގެ ޗެއާޕާސަން އަދި ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ (އަދުރޭ) ވިދާޅުވިއެވެ.

އަދުރޭ ވިދާޅުވީ ރައްޔިތުންގެ ނަމުގައި މަލީހު އާއި ޑރ.ޖަމީލަށް ވާހަކަދެއްކުމުގެ އެއްވެސް ހައިސިއްޔަތެއް މިއަދު ނެތްކަމަށެވެ. މި ޖަލްސާގައި އެ ދެބޭފުޅުންނަށް އަމާޒުކުރައްވައި އަދުރޭ ވިދާޅުވީ، މަލީހަކަސް އަދި ޑރ.ޖަމީލަކަސް "ސިޔާސީ ކުޅިބައި" އެމަނިކުފާނާ އެއް ފެންވަރަކަށް އަތުރަން ނޭނގޭނެ ކަމަށާއި، އޭގެ އެއް ހެތްކަކީ، މިއަދު ރައީސް ކަމުގެ މަޤާމުގައި ޑރ.މުއިއްޒު ހުންނެވުން ކަމަށެވެ.

މި ރޭގެ ޖަލްސާގައި އަދުރޭ، މަލީހު އާއި ޑރ.ޖަމީލަށް ބަހުގެ ހަމަލާތަކެއް ފޮނުވާލާފައިވާއިރު، އެ ދެ ބޭފުޅުންވެސް ސިޔާސީގޮތުން އެންމެބޮޑަށް ފާޑުވިދާޅުވަމުން ގެންދަވަނީ، އަދުރޭގެ އިތުރުން އެމަނިކުފާނުގެ ދަރިކަލުން އަދި މި ސަރުކާރުގެ ޓޫރިޒަމް މިނިސްޓަރު އިބްރާހިމް ފައިސަލް އަށްކަން ފާހަގަކޮށްލެވެއެވެ.