މޯލްޑިވިއަންގެ ޝެޑިއުލް ދަތުރުތައް މުއްޔަށް ފަށައިފި

ޤައުމީ އެއާލައިން މޯލްޑިވިއަންގެ ޝެޑިއުލް ދަތުރުތައް މ.މުލީ އެއާޕޯޓަށް އިއްޔެ ފަށައިފިއެވެ.

މުލީ އެއާޕޯޓް ހުޅުވާފައިވަނީ މިހިނގާ މެއިމަހުގެ 20 ވަނަ ދުވަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. މުލީ އެއާޕޯޓްގެ ހިދުމަތް ރަސްމީކޮށް ފެށުމުގެ ކުރިންވެސް ރީޖަނަލް އެެއާޕޯޓުން ވަނީ މުލީ އެއާޕޯޓް ކޮމާޝަލް އޮޕަރޭޝަންތަކަށް މިމަހުގެ 8 ވަނަ ދުވަހު ހުޅުވާލާފައެވެ. އެއާއެކު މިމަހު 15 ވަނަ ދުވަހުން ފެށިގެން ރާއްޖޭގެ ޑޮމެސްޓިކް އެއާލައިންތަކަށް މުލީ އެއާޕޯޓަށް ދަތުރުތައް ބޭއްވުމުގެ ފުރުސަތު ލިބިގެންދާނެއެވެ.

މޯލްޑިވިއަނުން އިއްޔެ ވަނީ ޝެޑިއުލް ދަތުރުތައް މުއްޔަށް ފަށާފައެވެ. މި ދަތުރުތަކުގެ ފުރަތަމަ ފްލައިޓް ވީއައިއޭއިން މުއްޔަށްދިއުމަށް ފުރާފައިވަނީ، 15:30 ގައެވެ. އަަދި އެ ފްލައިޓް މުލިން ވީއައިއޭއަށް ދިއުމަށް ނައްޓާލީ 16:45 ގައެވެ. މި ދަތުރުތައް ކޮންމެ ހޮނިހިރު ދުވަހަކު ބޭއްވުމަށް އެ އެއާލައިނުން ވަނީ ތާވަލްކޮށްފައެވެ.

މުލީ އެއާޕޯޓާ ގުޅޭގޮތުން ރައީސް ޑރ.މުއިއްޒު ވިދާޅުވެފައިވަނީ އެ އެއާޕޯޓް ވެގެންދާނީ މުލީގެ އިތުރުން އަތޮޅުގެ ތަރައްޤީއަށްވެސް މުހިއްމު އެއާޕޯޓެއްގެ ގޮތުގައެވެ.

މުލީ އެއަރޕޯޓުގެ އަމަލީ މަސައްކަތް 2021 ވަނަ އަހަރުގެ އޮގަސްޓްމަހު ފަށައި، 2023 ވަނަ އަހަރުގެ މެދުތެރޭގައި ޚިދުމަތްދޭން ރާވާފައި އޮތް ނަމަވެސް، އެކި ސަބަބުތަކާހުރެ އެއާޕޯޓުގެ މަސައްކަތްތައް ލަސްވީ އެވެ.

މިއީ މުލަކަ އަތޮޅުގައި ތަރައްގީ ކުރި ފުރަތަމަ އެއާޕޯޓެވެ. 1200 މީޓަރު ދިގު އަދި 30 މީޓާރު ފުޅާ ރަންވޭއަކާއެކު ތަރައްގީކޮށްފައިވާ މި އެއަޕޯޓުގެ މަޝްރޫއަށް ސަރުކާރުން 221 މިލިއަނަށްވުރެ ގިނަ ރުފިޔާ ހަރަދުކޮށްފައިވެ އެވެ.