އަސްލަމްގެ އިތުބާރު ނެތް މައްސަލަ ޕީޕީއެމް/ޕީއެންސީ ޕީޖީ ގްރޫޕުން މަޖިލީހަށް ހުށައަޅައިފި

ރައްޔިތުންގެ މަޖިލީހުގެ ރައީސް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމްގެ އިތުބާރު ނެތް މައްސަލަ ޕީޕީއެމް/ޕީއެންސީ ޕީޖީ ގްރޫޕުން މަޖިލީހަށް ހުށައަޅައިފިއެވެ.

މަޖިލީހުގެ 23 މެމްބަރަކު ސޮއިކޮށް ހުށައެޅި މި ގަރާރުގައި ބުނެފައިވަނީ އަސްލަމް ވަކި ޕާޓީއެއްގެ މަސްލަހަތު ކުރިއެރުވުމަށާއި، ދުސްތޫރުން މަތކޮށްފައިވާ ޒިންމާތަކއި ޚިލާފުވާ ގޮތަށް އަމަލު ކުރައްވާކަމަށެވެ.

އެ ގަރާރުގައިވާ ގޮތުން ގާނޫނު އަސާސީގެ 129 ވަނަ މާއްދާގެ (ރ) ގައި، ރައީސުލްޖުމްހޫރިއްޔާގެ ނައިބު ފިޔަވައި، ވަޒީރުންގެ މަޖިލީހަށް ރައީސުލްޖުމްހޫރިއްޔާ އައްޔަންކުރައްވާ އެހެން ބޭފުޅުންނަށް ރުހުން ހޯދުމަށް ފޮނުވަން ޖެހޭނެ ކަމަށް ބަޔާންކޮށްފައިވާ މައްދާގެ ދަށުން ރައީސް ޑރ.މުއިއްޒު 19 ނޮވެންބަރު 2023 ގައި، ވަޒީރުންގެ މަޖިލީހުގެ މެމްބަރުންގެ ގޮތުގައި އެ މަހުގެ 17 ވަނަ ދުވަހު ވަޒީރުންގެ ގޮތުގައި އައްޔަން ކުރެއްވި 22 ބޭފުޅުންގެ ނަން މަޖިލީހަށް ވަނީ ހުށައަޅާފައެވެ. ނަމަވެސް މަޖިލީހުގެ ރައީސް ގެ ހައިސިއްޔަތުން އަސްލަމް އެ މައްސަލައިގެ ރިޔާސަތުގައި އިންނަވައ، އަމަލު ކުރައްވާފައިވަނީ ރައްޔިތުންގެ މަޖިލީހުގެ ގަވާއިދުގެ 200 ވަނަ މާއްދާގެ (ބ)، (ޅ)، (އ) އާއި ޚިލާފަށް ކަން އެނގެން އޮތް ކަމަށް އެ ގަރާރުގައި ބުނެއެވެ.

ހުރިހާ ވަޒީރުންނަށް ރުހުން ދިނުމަށް ފެންނަ ކަމަށް 10 ޑިސެންބަރު 2023 ގައި ބޭއްވުނު ސަރުކާރުގެ މަސްއޫލިއްޔަތު އަދާ ކުރާ ކޮމިޓީން، އެ ބައްދަލުވުމަށް ހާޒިރުވި ހުރިހާ މެމްބަރުންގެ އިއްތިފާގުން ނިންމައި، އެ ރިޕޯޓް މަޖިލީހަށް ހުށައެޅި ކަމަށްވެސް ބަޔާނުގައި ވެއެވެ. މަޖިލީހުގެ ގަވާއިދުގައި އޮންނަ ގޮތުން އެ ރިޕޯޓާއި އެކު، މަޖިލީހުގެ ރައީސަށް މައްސަލަ އެޖެންޑާ ކުރެވެން އޮންނަ އެންމެ އަވަސް ޖަލްސާއެއްގައި އެ މައްސަލައެއް ހިމަނަން ވާނެ ކަމަށް ވަނީ ބަޔާންކޮށްފައެވެ. ނަމަވެސް އަސްލަމް އެ މައްސަލަ އެޖެންޑާ ކުރީ 2023 ވަނަ އަހަރުގެ 3 ވަނަ ދައުރުގެ 37 ވަނަ ޖަލްސާ އަށް ކަމަށާއި އެއީ އެ ރިޕޯޓު ލިބުނުތާ 8 ދުވަސް ފަސް ކަމަށް ވެސް ގަރާރުގައި ވެއެވެ.

އަސްލަމް ގެ އިތުބާރު ނެތް ކަމަށް ބުނެ މަޖިލީހަށް ހުށައެޅި ގަރާރުގައިވާ ގޮތުން، އެ ރިޕޯޓާއި މެދު އަމަލު ކުރަން ޖެހޭގޮތް މަޖިލީހުގެ ގަވާއިދުގައި ބަޔާންކޮށްފައިވީ ނަމަވެސް، އަސްލަމް އެ މައްސަލަ އަށް ބަހުސް ކުރުމަށް ފުރުސަތު ނުދިނުމުގެ އިތުރުން އެ މައްސަލަ އާއި ގުޅޭ ގޮތުން މެމްބަރުންގެ ވޯޓަކަށް ވެސް ނާއްސަވައެވެ. އަދި އެ ރިޕޯޓް އަނބުރާ ސަރުކާރުގެ މަސްއޫލިއްޔަތު އަދާ ކުރާ ކޮމިޓީ އަށް ފޮނުވާލި ކަމަށް ވެސް އެ ގަރާރުގައި ވެއެވެ.

މީގެ އިތުރުންވެސް ވަޒީރުންނަށް ރުހުން ދިނުމުގެ މައްސަލައިގައި މަޖިލީހގެ ރައީސް ގެ ހައިސިއްޔަތުން އަސްލަމް އަމަލު ކުރައްވާފައިވަނީ މަޖިލީހުގެ ގަވާއިދާއި ގާނޫނު އަސާސީގެ 70 ވަނަ މާއްދާ އާއި 75 ވަނަ މާއްދާ އާއި ވެސް ކަނޑައެޅިގެން ޚިލާފަށް ކަމަށް ޕީޕީއެމް/ޕީއެންސީ ޕީޖީ ގްރޫޕް ގެ ގަރާރުގައި ވެއެވެ.

ރައީސް ޑރ.މުއިއްޒުގެ ސަރުކާރަށް ދެމަސް ވެގެން ދިޔައިރުވެސް މި ސަރުކާރުގެ ކެބިނެޓުގައި ހިމެނޭ ވަޒީރުނަށް މަޖިލީހުން ރުހުން ދީފައެއް ނުވެއެވެ.

ރައީސް ޑރ.މުއިއްޒުގެ ސަރުކާރަށް އިދިކޮޅު އެމްޑީޕީ އާއި ދަ ޑިމޮކްރެޓްސް އިން ރުހުން ނުދޭ މައްސަލަ ހޫނު ވެފައިވާއިރު މިކަމާއި ގުޅިގެން މިއަދު ބޭއްވުނު 19 ވަނަ ރައްޔިތުންގެ މަޖިލީހުގެ ދައުރުން ބޭއްވުނު ހާއްސަ ޖަލްސާގެ ތެރެއިން، މަޖިލިސް ތެރޭގައި ވަނީ ހަމަ ނުޖެހުން ތަކެއްވެސް ހިނގާފައެވެ. މިގޮތުން މި ސަރުކާރުގެ ވަޒީރުންނަށް ރުހުން ދިނުން އެޖެންޑާ ކޮށްފައިވާއިރު މިކަމާއި ގުޅިގެން ބަހުސް ކުރި އިރު މަޖިލިސް ތެރޭގައި އެވަގުތުވެސް މެމްބަރުން ވަނީ އަޑު ގަދަކޮށްފައެވެ.

އޭގެ ފަހުން މަޖިލީހުގެ ތަޅުން ހޫނުވެ، ސަރުކާރު ހިންގާ ޕީޕީއެމް/ޕީއެންސީގެ މެމްބަރުން ވަނީ މަޖިލިސް ތެރޭގައި އަޑުގަދަކޮށް، މަޖިލީހަށް ވަދެވެން ހުރި ދޮރުތައް އެތެރެއިން ބަންދު ވެސް ކޮށްފައެވެ. މި މައްސަލައިގެ ތެރެއިން މެމްބަރުންގެ ތެރޭގައި ހިނގި ހަމަނުޖެހުންތަކެއްގައި، ކަނޑިތީމު ދާއިރާގެ މެމްބަރު އަބްދުالله ޝަހީމް އަބްދުލްހަކީމް އަށް އަނިޔާވެ، ޝަހީމް އަށް ލިބުނު އަނިޔާ ތަކަށް ފަރުވާ ކުރުމަށް އެމްބިއުލާންސް އަށް އަރުވައިގެން ހޮސްޕިޓަލަށް ގެންގޮސްފައި ވާއިރު, އޭނާގެ ބޮލަށް އަނިޔާ ވެފައިވާ ކަމަށް މައުލޫމާތު ލިބެއެވެ.

ވަޒީރުންނަށް ރުހުން ނުދޭން ނިންމައި، ދަ ޑިމޮކްރެޓްސް އިން ނެރުނު ބަޔާނެއްގައި ބުނީ މި ނިންމުން ނިންމާފައިވަނީ އެ ޕާޓީގެ ޕީޖީން ބޭއްވި މަޝްވަރާ ބައްދަލުވުމެއްގައި ބައިވެރިވި މެންބަރުންގެ އިއްތިފާގުން ކަމަށެވެ. އިދިކޮޅުން ރުހުން ނުދޭން ނިންމި ވަޒީރުންގެ ތެރޭގައި ހިމެނެނީ އެޓާނީ ޖެނެރަލް އަހްމަދު އުޝާމްއާއި ފޮރިން މިނިސްޓަރ މޫސާ ޒަމީރުއާއި އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުގެ އިތުރުން ހައުސިން މިނިސްޓަރ ޑރ.ހައިދަރުއެވެ.

މި މައްސަލަ އާއި ގުޅިގެން އާންމުން ވެސް މަޖިލީހުގެ ބޭރަށް އެއްވެ އިހުތިޖާޖް ކުރިކަން ފާހަގަ ކޮށްލަންޖެހެއެވެ.