ކެލާ ފަޅު ތެރޭގައި ރިސޯޓް ތަރައްޤީކުރުމުގެ ޕްރޮޖެކްޓަށް ބޮޑު އިސްކަމެއް ދޭނަން: ރައީސް ޑރ.މުއިއްޒު

ކެލާ ފަޅު ތެރޭގައި ރިސޯޓް ތަރައްޤީކުރުމުގެ ޕްރޮޖެކްޓަށް ބޮޑު އިސްކަމެއް ދެއްވާނެ ކަމަށް ރައީސުލް ޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސުލްޖުމްހޫރިއްޔާ މިހެން ވިދާޅުވީ ހއ. އަތޮޅަށް ކުރައްވާ ދަތުރުފުޅުގެ ތެރެއިން އެއަތޮޅު ކެލާގެ ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ. އެގޮތުން އެމަނިކުފާނު ވަނީ ކެލާއަކީ ފަތުރުވެރިކަން ފުޅާކުރެވޭނެ ފުރުޞަތު އޮތް ރަށެއްކަން ފާހަގަކުރައްވާ ކެލާގެ ފަޅުތެރޭގައި ފަތުރުވެރިކަމުގެ ބޮޑު މަޝްރޫޢުއެއް ހިންގަވައިދެއްވާނެކަމަށް ވިދާޅުވެފައެވެ.

ރައީސް ޑރ.މުއިއްޒު ވިދާޅުވީ ކެލާގެ އިތުރުން، މި ސަރަޙައްދުގެ ޒުވާނުންނަށްވެސް މި މަޝްރޫއުގެ ސަބަބުން ރަށާއި ކައިރީގައި ވަޒީފާ އަދާކޮށްގެން އާމްދަނީ ހޯދޭނެ ފުރުޞަތު ފަހިވެގެންދާނެ ކަމަށެވެ. އަދި އެމަނިކުފާނު ވަނީ މިހާރު އެ ރަށުގައި ފަށާފައިވާ ޓުއަރިޒަމް ޒޯންގެ މަސައްކަތްވެސް އަވަސްކޮށްދެއްވާނެކަމަށް ވެސް ވިދާޅުވެފައެވެ.

"ފަޅު ތެރޭގައި ރިސޯޓް ތަރައްޤީކުރުމުގެ ޕްރޮޖެކްޓަށް ބޮޑު އިސްކަމެއް ދޭނަން. އިކޮނޮމިކް ކައުންސިލްގައި މަޝްވަރާކޮށް އެކަމަށް މަގުފަހިކޮށް، ޙަޤީޤަތަކަށްވާތަން ފެންނާނެ."

ރައީސް ޑރ.މުއިއްޒު ވިދާޅުވިއެވެ.

މީގެ އިތުރުންވެސް ރައީސް ޑރ.މުއިއްޒު ވިދާޅުވީ ކެލާއަކީ ދަނޑުވެރިކަން ކުރާ ރައްޔިތުން އުޅޭ ރަށެއްކަމަށާއި އެހެންކަމުން، ދަނޑުވެރިކަން ރަށުގައި ފުޅާކުރުމަށް ޕްރޮގްރާމެއް ހިންގަވާނެ ކަމަށެވެ. ރައީސް ޑރ.މުއިއްޒު ވަނީ ރާއްޖޭގައި އުފައްދާ ބާވަތްތައް ފުޅާ ދާއިރާއެއްގައި ރިސޯޓްތަކަށް ސަޕްލައި ކުރުމުގެ މަސައްކަތް ގެންދަން ބޭނުންފުޅުވާ ކަމަށް ވެސް ވިދާޅުވެފައެވެ.

"ރާއްޖޭގައި އުފައްދާ ބާވަތްތައް ރާއްޖޭގައި އުފައްދާ ރިސޯޓްތަކަށް ސަޕްލައި ކުރުމުގެ މަސައްކަތް ވަރަށް ފުޅާކޮށް ގެންދަން ބޭނުން. މި ރަށް ވެގެންދާނެ އެކަމުގައި މުހިންމު ރަށަކަށް. އެގްރިކަލްޗަރ މިނިސްޓްރީ މެދުވެރިކޮށް އެކަން އިސްކަންދޭ މަސައްކަތްތެއްގެ ގޮތުގައި މިރަށުގައި ގެންދާނަން."

ރައީސް ޑރ.މުއިއްޒު ވިދާޅުވިއެވެ.

މީގެ އިތުރުންވެސް، ރައީސް ޑރ.މުއިއްޒު ވަނީ ހެން ރަށްތަކޭ އެއްގޮތަށް، ކެލާގައިވެސް މަޑުޖެހިފައިވާ މަސައްކަތްތައް އަވަސްކުރުމަށް ސަރުކާރުން ޚާއްސަ އިސްކަން ދޭނެ ކަމުގެ ޔަގީންކަން ކެލާގެ ރައްޔިތުންނަށް އަރުވާފައެވެ. މިގޮތުން ރައީސް ޑރ.މުއިއްޒު ފާހަގަކުަރެއްވި ކަންކަމުގެ ތެރޭގައި ރަށުގެ ސިއްހީ ހާލަތު ރަނގަޅުކުރުމާއި ގެދޮރުވެރިކަމުގެ މަޝްރޫއު ހިންގުމުގެ އިތުރު ސުކޫލާއި ޒުވާނުންނަށް ކުޅިވަރު ކުޅެވޭނެ ފެސިލިޓީ ރަށުގައި ގާއިމު ކުރުން ހިމެނެއެވެ.