މިހާރު ވެސް ރާއްޖެއަށް ބޭނުންވާ ވަރަށް ޓެކްސް ނަގާ: ސިޔާމް

މިހާރު ވެސް ރާއްޖެއަށް ބޭނުންވާ ވަރަށް ޓެކްސް ނަގާ ކަމަށް ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހުމަދު އަހުމަދު ސިޔާމް (ސަން ސިޔާމް) ވިދާޅުވެއްޖެއެވެ.

ޓީޖީއެސްޓީއާއި ޑިޕާޗާ ޓެކްސް އަދި ގްރީން ޓެކްސް ބޮޑުކުރަން ސަރުކާރުން  ހުށަހަޅާފައިވާ ބިލަށް މަޖިލީހުގެ މިއަދުގެ ޖަލްސާގައި ބަހުސް ކުރައްވަމުން، ސިޔާމް ވިދާޅުވީ، ރާއްޖޭގެ ޓެކްސް މިހާރުވެސް ވަރަށް ބޮޑު ކަމަށެވެ.

އެގޮތުން ދުނިޔޭގެ އެންމެ ކުރިއަރާފައިވާ ގައުމުތަކުގެ ތެރޭގައި ހިމެނޭ ދުބާއި، ސިންގަޕޫރު ފަދަ ގައުމު ތަކުގައި ނަގަމުންދާ ޓެކްސްއަށްވުރެ ރާއްޖޭގައި ނަގަމުންދާ ޓެކްސް ބޮޑު ކަމަށެވެ.

މިހެން އަޅުގަނޑުމެން ޓެކސް ނަގާ ކަމަށް ވަންޏާ ރާއްޖޭގެ އިގްތިޞާދު ހަލާކުވެގެން ހިނގައިދާނެ. ނިކަމެތިވެގެން ހިނގައިދާނެ. ޓެކްސް ނަގަނީ ރައްޔިތުންގެ ބޭނުންތައް ފުއްދައިދީ، ރައްޔިތުންގެ ފައިދާއަށް. އަޅުގަނޑުމެން މިހާރުވެސް އެބަ ޓެކސް ނަގަމު ރާއްޖޭގެ ރައްޔިތުންނަށް ބޭނުންވާ ވަރަށް. އަޅުގަނޑުމެންނަށް 5 ބިލިއަން ޑޮލަރު އެބަލިބޭ ޓެކްސްގެ ގޮތުގައި. އެއަށްވުރެވެސް ގިނަ

މިއާއެކު ސިޔާމް ވިދާޅުވީ، ފާއިތުވި އަހަރުތަކުގައިވެސް ޓެކްސް އެއް ދުވަހުން އަނެއް ދުވަހަށް ބޮޑުކުރަމުން އައިސްފައިވާ ކަމަށެވެ. އަދި، ޓެކްސް ނަގަމުން ގޮސް މިއަދު ރާއްޖެ ވެފައިވަނީ ދުނިޔޭގެ އެންމެ މަތީ ފެންވަރުގައި ޓެކްސް ނަގާ ގައުމުތަކުގެ ތެރޭގައި ކަމަށް ސިޔާމް ވިދާޅުވިއެވެ.

”މި ގައުމަށް ލާރި ވެސް ލިބޭ. މި ގައުމަކީ ސައުތު އީސްޓް އޭޝިއާގައި އޮތް އެންމެ ހަގީގަތުގައި ބުނާނަމަ އެންމެ މުއްސަނދި ގައުމު ވެސް މެ، ޓެކްސްގެ ބޮލަކަށް ޖެހޭ މިންވަރުން ބަލާނަމަ،" ސިޔާމް ވިދާޅުވިއެވެ.

ސިޔާމް އިތުރަށް ވިދާޅުވީ، ރާއްޖެއަށް ޓެކްސްގެ ގޮތުގައި 5 ބިލިއަން ޑޮލަރު ލިބޭ ނަމަ، އޭގެ ތެރެއިން 2 ބިލިއަން ޑޮލަރު ”ކަނޑަށް އަޅާލާ“ ކަމަށެވެ. އަދި އިތުރަށް 10 ގުނައަށް ޓެކްސް ދެއްކިޔަސް ނުވަތަ 100 ގުނަ ޖެއްސިޔަސް، 1،000 ގުނަ ޖެއްސިޔަސް އެއަކުން ކުރާނެ ރާހަތެއް ނޯންނާނެ ކަމަށް އޭނާ ވިދާޅުވިއެވެ.

އެހެންކަމުން ކުރަން އޮތް ކަމަކީ ޚަރަދު ކުޑަކުރުން ކަމަށްވެސް އޭނާ ވިދާޅުވިއެވެ.