ޢަބްދުއްރަޙީމްގެ ސްޕީޑް ބާރުކަމުން އެއާ އަރާ ހަމަކުރުމަށް އަޅުގަނޑަށް އުނދަގޫ ވެގެން މިއުޅެނީ: ޒިޔާދު
ރައްޔިތުންގެ މަޖިލީހުގެ ރައީސް، އަބްދުއްރަޙީމް އަބްދުالله، މަޖިލީހުގެ މަސައްކަތްތައް ކުރިއަށް ގެންދަވާ ހަލުއި ދުވެލީގެ ސަބަބުން، އެއާއި އަރާ ހަމަކުރެއްވުމަށް، އުނދަގޫތަކެއް ކުރިމަތިވަމުންދާ ކަމަށް އިދިކޮޅު އެމްޑީޕީއަށް ނިސްބަތްވެވަޑައިގަންނަވާ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާގައި ފަތުރުވެރިކަމާއި ބެހޭ ގާނޫނަށް ހުށަހެޅިފައިވާ އިސްލާހަށް ބަހުސް ކުރައްވަމުން ޒިޔާދު ވިދާޅުވީ، ބިލަކީ ފައިދާ ހުރި ބިލެއް ކަމެއް ނުވަތަ ނޫންކަމަށް ކަނޑައެޅޭ މިންވަރަށް ބިލާބެހޭ މައުލޫމާތު އަދި ހޯދިފައި ނުވާ ކަމަށެވެ.
އެގޮތަށް ދިމާވީ، މަޖިލީހުގެ ރައީސް މަޖިލީހުގެ މަސައްކަތްތައް ކުރިއަށް ގެންދަވާ ސްޕީޑާ އަރާ ހަމަ ނުކުރެވޭތީ ކަމަށް އޭނާ ވިދާޅުވިއެވެ.
އެގޮތުން، އޭނާ ވިދާޅުވީ ހަތަރު ކޮމިޓީއެއްގައި އޭނާ މަސައްކަތް ކުރައްވަމުންދާ ކަމަށެވެ. އަދި ކޮމިޓީގެ މަސައްކަތްތައް ކުރިއަށް ގެންދަވަމުން މަޖިލީހުގެ ޖަލްސާތަކުގައި ބައިވެރިވަމުން ދާއިރު، މަޖިލީހުގެ ރައީސް، މަސައްކަތްތައް ކުރިއަށް ގެންދަވާ ސްޕީޑާ އެއްވަރަށް އޭނާއަށް އަރާ ހަމަ ނުކުރެވޭ ކަމަށެވެ.
އެގޮތުން، އިއްޔެ އާއި އޭގެ ކުރިންވެސް މުހިންމު ދެ ބިލެއްގެ މަސައްކަތް މަޖިލީހުގައި ކުރިއަށް ދިޔައިރު ބަހުސް ކުރެއްވުމުގެ ފުރުސަތު ލިބި ނުލައްވާ ކަމަށާ، އެގޮތަށް ކަން ދިމާވީ ތައްޔާރު ނުވެވޭތީ ނޫންކަމަށާ، އެހެނެއް ކަމަކު ކޮމިޓީގެ މަސައްކަތުގައި އުޅެމުން ވަގުތު ނުދެވުމުން އޭނާ ވިދާޅުވިއެވެ.
އިއްޒަތްތެރި ރައީސް މަޖިލީހުގެ މަސައްކަތް ތިޔަ ގެންދަވާ ސްޕީޑުން، މަޖިލީހުގައި މިތިބަ ޒުވާން މެންބަރުންނަށް ފޮޮލޯ ކުރެވުނަސް އަޅުގަނޑަށް ތަންކޮޅެއް ދަތިވޭ އެ ސްޕީޑުގައި މަސައްކަތްކުރަން. އެއީދެން މައްސަލައެއް އަނެންހެން އޮތީކީއެއްނޫން އެހެން ނަމަވެސް، ރޭގަނޑަށް އެޖެންޑާ ތަންކޮޅެއް ލަހުން ލިބުނީމަ އަޅުގަނޑުމެން ހޭލައިގެން ތައްޔާރުވެލަން ތަންކޮޅެއް ދަތި… ސްޕީޑް އިއްޒަތްތެރި ރައީސްގެ މާ ބޮޑަށް ތަފާތުވެގެން މިއުޅެނީ. ބާރުވެގެން މިއުޅެނީ
ވައިކަރަދޫ ދާއިރާގެ މެންބަރު ހުސައިން ޒިޔާދު
މިއާއެކު ޒިޔާދު ވިދާޅުވީ، މަޖިލީހުގެ ރައީސްގެ ސްޕީޑް ބާރު ނަމަވެސް، ސަރުކާރުގެ ސްޕީޑު ދަނީ ވަރަށް “ސްލޯ” ކޮށް ކަމަށެވެ. އެގޮތުން، 3 މަސް ދުވަހުގެ ތެރޭގައި މަޖިލީހުގެ ރައީސް ކުރައްވާފައިވާ މަސައްކަތާއި މި ސަރުކާރުން 9 މަސް ދުވަހުގެ ތެރޭގައި ކުރެވުނު މަސައްކަތާ ނުބައްދަލު ކަމަށް އޭނާ ވިދާޅުވިއެވެ.
“ވަރަށް ބާރު ސްޕީޑުގައި ތިޔަ ކުރިއަށް ގެންދަވަނީ. އަޅުގަނޑު އުއްމީދުކުރަން ނަތީޖާ ރަނގަޅުވާނެ ކަމަށް”
ވައިކަރަދޫ ދާއިރާގެ މެންބަރު ހުސައިން ޒިޔާދު
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
