ގައުމީ ގުރްއާން މުބާރާތް: އެއްވަނައަށް އަންނަ ބައިވެރިއަކަށް ދެން 175،000 ރުފިޔާ ލިބޭނެ

ގައުމީ ގުރްއާން މުބާރާތުގެ ވަނަތަކަށް އިސްލާމިކް މިނިސްޓްރީން ދޭނެ އިނާމުތައް އިތުރުކޮށް ފައިސާގެ އިނާމް މިއަދު ރަސްމީކޮށް އިއުލާނު ކޮށްފި އެވެ.

ގުރުއާން ކިޔެވުމުގެ ގައުމީ މުބާރާތަކީ، ރާއްޖޭގައި ބާއްވާ އެންމެ އަގުބޮޑު އަދި އެންމެ ގިނަ އިނާމު ދެވޭ މުބާރާތަށް ހެދުމަކީ ސަރުކާރުގެ ވައުދެކެވެ. އެ ވައުދާއި އެއްގޮތަށް އެ މުބާރާތަށް ރައީސުލްޖުމްހޫރިއްޔާ ދެއްވާ އިނާމާއި އިސްލާމިކް މިނިސްޓްރީން ދެމުންދާ އިނާމުތައް ބޮޑުކޮށް ވަނީ އިއުލާނުކޮށްފަ އެވެ.

އެގޮތުން މިއަހަރުން ފެށިގެން، ގުރުއާން ކިޔެވުމުގެ ގައުމީ މުބާރާތުގައި ނުބަލާ ކިޔެވުމުގެ ބައިން މުޅި މުބާރާތުން 1 ވަނަ، ބަލައިގެން ކިޔެވުމުގެ ބައިން މުޅި މުބާރާތުން 1 ވަނަ، އަދި ޙާފިޡުންގެ ބައިން މުޅި މުބާރާތުން 1 ވަނަ ހޯދާ ބައިވެރިއަކަށް އެ ބައިވެރިއަކު ތައުލީމް ހާސިލްކުރަން ބޭނުން ދާއިރާއަކުން ޕީއެޗްޑީއާއި ހަމަޔަށް ބޭނުން ގައުމަކުން ތައުލީމް ހާސިލް ކުރުމަށް ރައީސުލްޖުމްހޫރިއްޔާގެ ހާއްސަ ސްކޮލާޝިޕެއް ދިނުމަށް ވަނީ ނިންމާފަ އެވެ.

އަދި ތިން ބައިން އެއްވަނަ ހޯދާ ބައިވެރިންނާއި، މުއައްސަސާތަކުގެ ބައިން މުޅި މުބާރާތުން އެއްވަނަ ހޯދާ ފަރާތްތަކަށް އެއްލައްކަ ރުފިޔާގެ ފައިސާގެ އިނާމަކާއި ޝަރަފުގެ ފިލައެއް ވެސް ދިނުމަށް ވަނީ ނިންމާފަ އެވެ.

އިސްލާމިކް މިނިސްޓްރީން ވަނީ އެ މިނިސްޓްރީން މި މުބާރާތަށް ދޭނެ އިނާމުތައް އިތުރުކޮށް ފައިސާގެ އިނާމް އާންމުކޮށްފަ އެވެ.

އެގޮތުން ކީރިތި ގުރުއާން ކިޔެވުމުގެ ގައުމީ ގުރުއާން މުބާރާތުން ޙާފިޒުންގެ ގޮފިންނާއި ނުބަލާ ކިޔެވުމުގެ ގޮފިންނާއި ބަލައިގެން ކިޔެވުމުގެ ގޮފިން އެއް ވަނައަށް އަންނަ ބައިވެރިއަކަށް 75,000.00ގެ ފައިސާގެ އިނާމު ދޭން ވަނީ ނިންމާފަ އެވެ. އެހެން ކަމުން މުޅި މުބާރާތުން އެއްވަނައަށް އަންނަ ބައިވެރިއަކަށް ފައިސާގެ އިނާމުގެ ގޮތުގައި 175,000 ރުފިޔާ ލިބޭނެ އެވެ.

ކޮންމެ ގޮތްޕަކުން 2 ވަނައަށް އަންނަ ބައިވެރިއަކަށް އިސްލާމިކް މިނިސްޓްރީން 50,000 ގެ ފައިސާގެ އިނާމު އަދި ކޮންމެ ގޮތްޕަކުން 3 ވަނައަށް އަންނަ ބައިވެރިއަކަށް 35,000ގެ ފައިސާގެ އިނާމު ދޭނެ އެވެ.

މީގެ އިތުރަށް އުމްރާ ދަތުރުތައް ވެސް ހިމެނޭ ކަަމަށް އެ މިނިސްޓްރީން ބުންޏެވެ.