ތަފާސްހިސާބު ތަކާއެކު ސައީދު ހާމަކުރެއްވީ ފާއިތުވި އަހަރުތަކަށްވުރެ ބޭންކުތަކުން ޑޮލަރު ދޫކުރާ މިންވަރު އިތުރުވެފައިވާކަން

ރާއްޖޭގައި ޑޮލަރުގެ ތާށިކަން އޮތް ކަމަށް ބުނެ އިދިކޮޅު ފަރާތްތަކުން ފަތުރަމުންދާ ވާހަކަތަކަކީ ހަޤީޤަތާ ޚިލާފު ދޮގު ވާހަކަތަކެއްކަން ހާމަކޮށްދެއްވުމަށް، އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސަޢީދު ތަފާސްހިސާބުތައް އާންމުކުރައްވައިފިއެވެ.

ކަޅު ބާޒާރުގައި ޑޮލަރުގެ އަގު މައްޗަށް ގޮސް، ތަކެތީގެ އަގު އިންތިހާއަށް ބޮޑުވެފައިވާ ކަމަށް ވިދާޅުވެ، ދިހަ ދުވަހުގެ ތެރޭ ރޭޓް 19ރއަށް، އަދި މަސްދުވަސްތެރޭ 17ރއަށް ޑޮލަރުގެ އަގު ތިރިކުރުމަށް ކުރީގެ ރައީސް އަދި އެމްޑީޕީގެ ޗެއާޕާސަން މުހައްމަދު ނަޝީދު ވަނީ ސަރުކާރަށް ގޮވާލައްވާފައެވެ.

މިކަމާ ގުޅިގެން މީސްމީޑިއާގައި އާންމުކުރެއްވި ވީޑިއޯއެއްގައި ސަޢީދު ވަނީ، ކުރީގެ އެމްޑީޕީ ސަރުކާރުގެ ދުވަސްވަރާ އަޅާބަލާއިރު މިހާރު ރަސްމީ ރޭޓުގައި ޑޮލަރު ދޫކުރާ މިންވަރު އެތައް ގުނައެއް އިތުރުވެފައިވާކަން ހާމަކުރައްވާފައެވެ.

ވަޒީރު ސަޢީދު ވިދާޅުވީ، އިދިކޮޅު ފަރާތްތަކުން މިފަދަ ދޮގު ވާހަކަތައް ދައްކަނީ މާކެޓުގައި ނުތަނަވަސްކަން އުފައްދައި، ކަޅު ބާޒާރަށް ހިތްވަރުދީ، އިޤްތިޞާދަށް ނުރައްކާ ކުރުމުގެ މަޤްޞަދުގައި ކަމަށެވެ. އަދި މިއީ ސިޔާސީ ބޭނުމަކަށް މީހުން ޖަމާކުރުމަށް ކުރާ ކަމެއް ނަމަވެސް، ރައްޔިތުންނަށް މިއަދު ހަޤީޤަތް އެނގޭނެ ކަމަށް އޭނާ ވިދާޅުވިއެވެ.

ސަޢީދު ހާމަކުރެއްވި ތަފާސްހިސާބުތަކަށް ބަލާއިރު:

ބޭންކު ކާޑުތައް: 2021 ވަނަ އަހަރު ކާޑުތަކުން މަހެއްގެ މައްޗަށް އެވަރެޖްކޮށް 10 މިލިއަން ޑޮލަރު ބޭނުންކުރިއިރު، މިހާރު އެ އަދަދު ވަނީ 39 މިލިއަން ޑޮލަރަށް އުފުލިފައެވެ.

ވިޔަފާރިތަކުގެ ޓީޓީ: 2021 ވަނަ އަހަރު ބޭންކުތަކުން ވިޔަފާރިތަކަށް މަހަކު އެވަރެޖްކޮށް ދޫކުރީ 6.7 މިލިއަން ޑޮލަރެވެ. ނަމަވެސް މިހާރު އެ އަދަދު ވަނީ 26.6 މިލިއަން ޑޮލަރަށް އިތުރުވެފައެވެ. މިއީ ކުރީގެ ސަރުކާރުގައި ބޭންކު މެދުވެރިކޮށް ހެދި 5 އިންސައްތައިގެ ބަދަލުގައި 30 އާއި 40 އިންސައްތައާ ދެމެދުގެ ކުރިއެރުމެކެވެ.

ދަރިވަރުންގެ ކިޔެވުން: 2021 ގައި ދަރިވަރުންގެ ކިޔެވުމަށް ބޭންކުން 1.9 މިލިއަން ޑޮލަރު ސަޕޯޓު ދިންއިރު، މިހާރު އެ އަދަދު ވަނީ ގާތްގަނޑަކަށް 4 މިލިއަން ޑޮލަރަށް އިތުރުވެފައެވެ.

ބޭސްފަރުވާ (މެޑިކަލް): 2021 ގައި ބޭސްފަރުވާއަށް ދޫކުރީ 1 ލައްކަ 59 ހާސް ޑޮލަރެވެ. 2023 ގައި އެ އަދަދު 3 ލައްކައިގައި ހުރިއިރު، މިހާރު ރަސްމީ ރޭޓުގައި މަހަކު ގާތްގަނޑަކަށް 3 މިލިއަން ޑޮލަރު ދޫކުރެއެވެ.

ބޭރަށް ދާ ފަރާތްތައް: 2021 ގައި ބޭރަށްދާ ފަރާތްތަކަށް 1.5 މިލިއަން ޑޮލަރު ދޫކުރިއިރު، މިހާރު ބޭންކުން 10 މިލިއަން ޑޮލަރު ދޫކުރެއެވެ.

ބޭރަށް ވަޑައިގަންނަވާ ބޭފުޅުންނަށް ޑޮލަރު ބޭންކުން މެދުވެރިކޮށް ދޭ އަދަދު މިހިރީ. އެމް.އެމް.އޭއިންވެސް، އަދި ބޭންކް އޮފް މޯލްޑިވްސް އިންވެސް ދުވަހަކުވެސް މީގެކުރިން ޑޮލަރު ދޫކޮށް ނުކުރާ އަދަދަށް ޑޮލަރު ދޫކުރަނީ.

އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސަޢީދު

ސަޢީދު އިތުރަށް ވިދާޅުވީ ބައެއް ނޫސްތަކުން ލިޔާ ހެޑްލައިންތަކާއި، އަދި ކޮންމެ ދުވަހަކު، ބްލެކްމާކެޓްގައި ޑޮލަރުގެ އަގު ހުރި މިންވަރު ހާމަކުރައްވައި ނަޝީދު ފަދަ ބޭފުޅުން ކުރާ ޕޯސްޓްތަކުގެ ސަބަބުން ބްލެކް މާކެޓް ރޭޓް މަތި ކުރުމަށް ހިތްވަރު ލިބޭ ކަމަށެވެ.

އެކަމަށް (ބްލެކް މާކެޓްގައި ޑޮލަރުގެ އަގު މަތިކުރުމަށް) ހިތްވަރު މިދެނީ މިދަންނަވާ ނިއުސްޕޭޕަރތަކުގެ ހެޑްލައިންނާ އަދި މިހާރު ވަކިން ހާއްސަކޮށް މި ހަމަ ރާއްޖޭގެ ވެރިކަން ކުރައްވާ ތިއްބެވި ބޭފުޅުން، ހެނދުނު އެއްބޭފުޅަކު ހަވީރު އަނެއްބޭފުޅަކު ރޭޓް މިސެޓްކުރައްވަނީ.

އިޤްތިޞާދީ ތަރައްޤީއާއި ބެހޭ ވަޒީރު މުޙައްމަދު ސަޢީދު

”މިކަންކަން މިގޮތަށް ނުކުރައްވާށޭ. މި ޑޮލަރުގެ ރޭޓް ރަސްމީ ރޭޓަށް މި މިވެނި ވަރަކަށް ތިރިކުރަން، ދިހަ ދުވަހޭ ފަނަރު ދުވަހޭ ވިދާޅުވި ވަގުތު ދެއްވާއިރު، ރައީސް ނަޝީދުގެ ވެރިކަމުގަ އެމްއެމްއޭގެ ދޮރާށިން ފެށިގެންގޮސް މި މަސްމާރުކެޓާ ހަމަޔަށް ކިއު ދަމާލާފައި ޑޮލަރު ނުލިބިގެން…. (ވެރިކަން) ނިމިގެން ދިޔަ އިރުގަ ގާތްގަނޑަކަށް ސަތާރަ ރުފިޔާގައި ބްލެކް މާކެޓް ރޭޓު ހުރީ އޭރުގަ.“ ސަޢީދު ވިދާޅުވިއެވެ.

ވަޒީރު އިތުރަށް ފާހަގަކުރެއްވި ގޮތުގައި، ރައީސް ޑރ. މުޙައްމަދު މުޢިއްޒުގެ ސަރުކާރުން ވަނީ ކުރީގެ ސަރުކާރުން ދިވެހި ރައްޔިތުންގެ ބޮލުގައި އެޅުވި 1.2 ބިލިއަން ޑޮލަރުގެ ބޮޑު ލޯނުވެސް މި ދަތި ހާލަތުގައި ދައްކާފައެވެ. އަދި ރަހުނުކޮށްފައި ހުރި ސްކޫލްތަކާއި ހޮސްޕިޓަލްތައް ސަލާމަތްކޮށް، އެއަރޕޯޓް ޓާމިނަލް ހުޅުވައި، ވިޔަފާރި ބަނދަރުގެ މަސައްކަތް ބާރަށް ކުރިއަށްދާކަން އޭނާ ފާހަގަކުރެއްވިއެވެ.

އިދިކޮޅު ފަރާތްތަކުން ފައިސާ ޗާޕުކޮށްގެން އިޤްތިޞާދު ޚަރާބުކުރި ނަމަވެސް، މި ސަރުކާރުން ތަކެތީގެ އަގު ކޮންޓްރޯލްކޮށް، ކާޑުގެ ބާވަތްތަކާއި ތެލާއި ގޭސް މެދުނުކެނޑި ލިބޭނެ އިންތިޒާމު ހަމަޖައްސާފައިވާ ކަމަށް ސަޢީދު ވިދާޅުވިއެވެ. އެހެންކަމުން، ޤައުމުގެ އިޤްތިޞާދަށް ނުރައްކާވާ ފަދަ ވާހަކަތައް ނުދެއްކުމަށް ވަޒީރު ވަނީ އިލްތިމާސްކުރައްވާފައެވެ.