އަންނަ ހަފްތާގައި ކުއަޑްގެ ބައްދަލުވުމެއް ބާއްވަނީ

އެމެރިކާ، ޖަޕާން، އޮސްޓްރޭލިއާ އަދި އިންޑިއާ ގުޅިގެން އުފައްދާފައިވާ އިއްތިހާދު ކުއަޑްގެ ބައްދަލުވުމެއް ޖުލައި 1 ގައި އެމެރިކާގައި ބޭއްވުމަށް ނިންމައިފިއެވެ.

ވޮޝިންޓްނަގައި މި ބައްދަލުވުން އިންތިޒާމްކުރައްވަނީ އެމެރިކާގެ ޚާރިޖީ ވަޒީރު މާކޯ ރޫބިއޯ ކަމަށް އެމެރިކާގެ ސްޓޭޓް ޑިޕާޓްމަންޓުން ވަނީ ބުނެފައެވެ. މި ބައްދަލުވުމަކީ އިންޑޯ ޕެސިފިކް ސަރަހައްދަކީ އެންމެންނަށްވެސް ހުޅުވާލެވިފައިވާ ސަރަހައްދެއްކަން ކަށަވަރުކުރުމަށް އެގައުމުން ކުރަމުންދާ މަސައްކަތް އިތުރު ކުރުމަށް ބާއްވާ ބައްދަލުވުމެކެވެ.

ޗައިނާގެ އަމަލުތަކަށް އަމާޒުކޮށްގެން މިދިޔަ ޖެނުއަރީ 21 ވަނަ ދުވަހު ބޭއްވި ކުއަޑްގެ ބައްދަލުވުމަކީ ރޫބިއޯ މަގާމާއި ހަވާލުވެވަޑައިގަތުމަށްފަހު ބޭއްވި ފުރަތަމަ ރަސްމީ ބައްދަލުވުމެވެ. އެހެންކަމުން ކުއަޑްގެ މަސައްކަތްތަކަކީ އެމެރިކާގެ މިހާރުގެ ރައީސް ޑޮނަލްޑް ޓްރަމްޕްގެ ޚާރިޖީ ސިޔާސަތުގައި ވަރަށް އިސްކަމެއް ދެ ކަމެއްކަން ދޭހަވެއެވެ.

ޗައިނާއިން ޕެސިފިކް ސަރަހައްދަށް އަތްގަދަކުރުމަށް ކުރަމުންދާ މަސައްކަތާއި ދެކޮޅަށް ތެދުވާ މި 4 ޤައުމުން ކުރާ މަސައްކަތުގެ މުހިއްމުކަން ޗައިނާއިން އަންގައިދިނުމަކީވެސް ޖެނުއަރީ މަހު ބޭއްވި ބައްދަލުވުމުގެ އެއް ބޭނުންކަމަށް މުހައްލިލުން ދެކެއެވެ. ކުއަޑްގެ 4 ޤައުމުގެ ވެރިންގެ ބައްދަލުވުމެއްވެސް މިއަހަރުގެ ފަހުކޮޅު އިންޑިއާގެ ދިއްލީގައި ބޭއްވުމަށް ޤައުމުތަކުން ދަނީ މަސައްކަތްކުރަމުންނެވެ.