ކުޅިވަރު ތަރައްޤީ ކުރުމުގެ ވައުދުތަކަކީ، ހަމައެކަނި ދައްކާ ހުސް ވާހަކަތަކެއް ނޫން: ރާފިއު

ކުޅިވަރު ތަރައްޤީކުރުމަށް ވާ ވައުދުތަކަކީ ހަމައެކަނި ދައްކާ ހުސް ވާހަކަތަކެއް ނޫންކަމަށާއި، އެކަންކަން ހަޤީގަތަކަށް ހަދައި އަމަލީގޮތުން އެކަން ދައްކާނޭކަމަށް ކުޅިވަރާ ބެހޭ ވަޒީރު، ޢަބްދުﷲ ރާފިޢު ވިދާޅުވެއްޖެއެވެ.

މޯލްޑިވްސް ސްޕޯޓްސް އެވޯޑް 2024 ހަފްލާގައި ވާހަކަދައްކަވަމުން ވަޒީރު ވިދާޅުވީ، ކުޅިވަރުގެ ކަންކަން ތަރައްޤީކޮށް ކުރިއެރުވުމަށް ވެފައިވާ ވައުދުތަކަކީ ހަމައެކަނި ދައްކާ ވާހަކަތަކެއް ނޫން ކަމަށާއި، އެ ވައުދުތައް ފުއްދަމުންދާކަމަށެވެ.

އެގޮތުން ދިވެހި ތާރީޚުގައި ފުރަތަމަ ފަހަރަށް ގައުމީ ފެންވަރުގެ ކުޅުންތެރިންނާއި އޮފިޝަލުންނަށް ސިއްހީ އިންޝުއަރެންސް ޚިދުމަތް ތައާރަފްކުރެވިފައިވާކަން ވަޒީރު ފާހަގަކުރެއްވިއެވެ. މިއީ ގިނަ ދުވަސްތަކެއް ވަންދެން ދިވެހިރާއްޖޭގެ ކުޅިވަރުގެ އާއިލާއިން އެދި އެދި ތިބި ކަމެއް ކަމަށާއި، މީގެ ސަބަބުން މާލީ ބުރަކަން ކުޑަވެ، ކުޅިވަރުގެ ޒަރީއާއިން ގައުމަށް ޚިދުމަތް ކުރާ ފަރާތްތަކަށް ސިއްހީ ރައްކާތެރިކަން ކަށަވަރުވެގެންދާނޭކަމަށް ވަޒީރު ރާފިޢު ވިދާޅުވިއެވެ.

ވަޒީރު ވިދާޅުވީ މި ސަރުކާރުން ކުޅުންްތެރިންނަށާއި ކުޅިވަރު އޮފިޝަލުންނަށް ފަހި ވާނޭހެން ކަންކަން ތިންތިޒާމް ކުރަމުންގެންދާކަމަށެވެ. އެގޮތުން އެފަރާތްތަކަށް ދެވޭ އެލަވަންސްވެސް މިހާރު އިތުރު ކުރެވިފައިވާކަން ފާހަގަކުރެއްވިއެވެ.

ޓީމުތަކުގެ ކުޅުންތެރިންނާއި އޮފިޝަލުންނަށް ދެވޭ އެލަވަންސް ފަސްހާސް ރުފިޔާއިން ހަތްހާސް ރުފިޔާއަށް މިހާރު ވަނީ އިތުރު ކުރެވިފައި.މިއީ އެފަރާތްތަކުގެ މަސައްކަތާއި ސާބިތުކަން ބަލައިގަނެ، ކުޅިވަރުތަކުގައި ކުރިއަށް ދިއުމަށް ހިތްވަރު ދިނުމަށް ސަރުކާރުން ދޭ ސަމާލުކަން ހާމަކޮށްދޭ އަލިގަދަ ހެތްކެއް

ކުޅިވަރާ ބެހޭ ވަޒީރު ރާފިއު

ވަޒީރު ރާފިއު ވިދާޅުވީ ކުޅިވަރުގެ ވަސީލަތްތައް ގާއިމުކުރުމުގެ މުހިއްމު ވައުދުތަކުގެ ތެރެއިން ރާއްޖޭގެ އެކި ސަރަހައްދުތަކުގައި ކުރިއަށްދާކަމަށެވެ. އެގޮތުން 1200 މީހުންގެ ޖާގައިގެ ޒަމާނީ ފެންވަރުގެ ވަސީލަތްތައް ފުރިހަމަ 16 މަލްޓި ސްޕޯޓްސް ކޮމްޕްލެކްސްގެ މަސައްކަތް މިހާރުވެސް ކުރިއަށްދާކަމަށެވެ. މި ވަސީލަތްތަކަކީ ގައުމީ އަދި ބައިނަލްއަގުވާމީ ފެންވަރުގެ މުބާރާތްތައް ބޭއްވޭ ފެންވަރަށް ތަރައްޤީ ކުރެވިގެންދާ ތަންތަންކަން ފާހަގަކުރެއްވިއެވެ.

މި ސަރުކާރުން ކުޅިވަރު ކުރިއެރުވުމަށް ކުރެވުނު އެންމެ މުހިންމު އެއް މަސައްކަތަކީ ކުޅިވަރުގެ ގާނޫނަށް މުހިންމު ބަދަލުތަކެއް ގެނައުން ކަމަށާއި، އެގޮތުން އިސްލާހުތަކުގެ ސަބަބުން މުޅި ރާއްޖޭގެ ކުޅިވަރު ހަރަކާތްތައް ފުޅާވެ، އެކި އަތޮޅުތަކުގައި ތިބި ކުޅުންތެރިންނަށް ކަންކަން ރޭވިފައިވާ ނިޒާމެއްގެ ތެރެއިން ކުރިއަށް ދިއުމުގެ ފުރުސަތުތައް އިތުރުވެގެންވެސް ދާނެ ކަމަށެވެ.

ކުޅިވަރަކީ ވަކި ސަރަހައްދަކަށް ހަނިވެފައިވާ ކަމަކަށް ވެގެން ނުވާނެކަން ފާހަގަކުރައްވަމުން ވަޒީރު ރާފިއު ވަނީ ކޮންމެ އަތޮޅެއްގައިވެސް ހުނަރުވެރި ކުޅުންތެރިން އެބަ ތިބިކަން ފާހަގަކޮށް ސަރުކާރުގެ މަސްއޫލިއްޔަތަކީ އެ ހުނަރުތައް ކުރިއަރުވައި، އެކަށީގެންވާ ނިޒާމެއްގެ ތެރެއިން ކަންކަން ކުރިއަށް ގެންދިއުންކަމަށް ވިދާޅުވެ ވާހަކަދައްކަވާފައެވެ.