ދެ އަހަރުން ދަށުގެ ކުދިންގެ ކާނާގައި ހަކުރު މަދުކުރަންވީ މިހެންވެ

އިންސާނާގެ ހަށިގަނޑު ހެދިބޮޑުވަމުން އަންނަ ދުވަސްވަރު، ހާއްސަކޮށް ހަޔާތުގެ ފުރަތަމަ 1,000 ދުވަހަކީ އޭނާގެ މުސްތަގުބަލުގެ ދުޅަހެޔޮކަމަށް ނުހަނު މުހިންމު ދުވަސްތަކެކެވެ. ދާދިފަހުން ކުރެވުނު ދިރާސާއަކުން ދައްކާގޮތުގައި، އުމުރުން ދެ އަހަރު ފުރުމުގެ ކުރިން ކާނާގައި ހަކުރު ބޭނުންކުރާ މިންވަރު މަދުކުރުމަކީ، އޭގެ އެތައް އަހަރެއް ފަހުންވެސް ސިކުނޑީގެ ދުޅަހެޔޮކަމަށް އެހީތެރިވެދޭ ކަމެކެވެ.

ދިރާސާގެ އަސާސް: އިނގިރޭސިވިލާތުގެ "ނެޗުރަލް އެކްސްޕެރިމެންޓް"

މި ދިރާސާ ބިނާކޮށްފައިވަނީ ދެވަނަ ބޮޑު ހަނގުރާމައަށްފަހު އިނގިރޭސިވިލާތުގައި ހަކުރު ކޮންޓްރޯލްކޮށްގެން ދޫކުރި ދުވަސްވަރަށެވެ. ސެޕްޓެމްބަރު 1953 ގައި ހަކުރު ކޮންޓްރޯލްކުރުން ހުއްޓާލުމާއެކު، މީހުން ހަކުރު ބޭނުންކުރާ މިންވަރު ދުވާލަކު 41 ގްރާމުން 80 ގްރާމަށް  އިސާހިތަކު އިތުރުވެގެން ދިޔައެވެ. ހޮންކޮންގް ޔުނިވަރސިޓީ އޮފް ސައިންސް އެންޑް ޓެކްނޮލޮޖީގެ ސައިންސްވެރިން ވަނީ 'ޔޫކޭ ބަޔޯބޭންކް' ޕްރޮޖެކްޓްގައި ހިމެނޭ ގާތްގަނޑަކަށް 65,000 މީހުންގެ މައުލޫމާތު ދިރާސާކޮށްފައެވެ.

މި ދިރާސާގެ ނަތީޖާތަކުން ދައްކާގޮތުގައި، ހަކުރު ކޮންޓްރޯލްކޮށްފައި އޮތް ދުވަސްވަރު ތުއްތުކުދިންގެ ގޮތުގައި ތިބި މީހުންނަށް، މުސްކުޅިވުމުން ހަނދާން ނެތޭ ބަލި ނުވަތަ ޑިމެންޝިއާ ޖެހުމުގެ ފުރުސަތު 23 އިންސައްތަ ދަށެވެ. އަދި މިފަދަ މީހުންނަށް ބަލިޖެހޭ އުމުރު، އެހެން މީހުންނަށްވުރެ ދެ އަހަރާއި ބައި ލަސްވެގެންދާކަން ފާހަގަކުރެވުނެވެ.

މީގެ ކުރީގެ ދިރާސާތަކުން ވެސް ވަނީ ކުޑައިރު ހަކުރު ގިނައިން ބޭނުންކުރުމަކީ ފަހުން ހަކުރުބައްޔާއި ލޭގެ ފިއްތުން އިތުރުވުމާ ގުޅުންހުރި ކަމެއްކަން ދައްކާފައެވެ.

”އަޅުގަނޑުމެންގެ ހޯދުންތަކުން ދައްކަނީ ހަޔާތުގެ ކުރީކޮޅު ހަކުރު ބޭނުންކުރުން މަދުކުރުމަކީ ސިކުނޑީގެ ދުޅަހެޔޮކަމަށް ދާއިމީ ފައިދާތަކެއް ކުރާނެ ކަމެއްކަން،" ދިރާސާގައި ބައިވެރިވި ޖިއާޒެން ޒެންގް ވިދާޅުވިއެވެ. މި ހޯދުންތައް މިހާރު ވަނީ 'ނިއުރޮލޮޖީ' ޖާނަލްގައި ޝާއިއުކޮށްފައެވެ.

މާހިރުންގެ ރައުޔު

މި ދިރާސާއަކީ ޝައުގުވެރި ހޯދުމެއް ނަމަވެސް، ބައެއް މާހިރުން ފާހަގަކުރައްވާ ގޮތުގައި މިއީ އޮބްޒަވޭޝަނަލް ނުވަތަ ބަލައިގެން ކުރެވިފައިވާ ދިރާސާއެކެވެ. އެހެންކަމުން، ހަމައެކަނި ހަކުރު މަދުކުރުމުން ޑިމެންޝިއާ ހުއްޓުވޭނެކަން ކަށަވަރުކޮށް ބުނަން އަދި ދައްޗެވެ. އެގޮތުން މިފަދަ ދިރާސާކުރާ މީހެއް ކަމަށްވާ ރޭޗަލް ރިޗަޑްސަން ވިދާޅުވީ، 1940 އާއި 1950 ގެ އަހަރުތަކުގައި މީހުން އުޅުނު ގޮތާއި މިހާރުގެ އާދަކާދަތަކާ ވަރަށް ތަފާތު ކަމަށެވެ. އެގޮތުން އެ ދުވަސްވަރު ކުދިންނަށް އަމިއްލަ ކާނާ ދޭން ފަށާ އުމުރު އަވަސްވުން ފަދަ ކަންކަމަކީ ނަތީޖާއަށް އަސަރުކޮށްފާނެ ކަންކަމެވެ.

އެސްޓަން ޔުނިވަރސިޓީގެ ޕްރޮފެސަރ އިއަން މެއިޑްމެންޓް ވިދާޅުވި ގޮތުގައި، 80 އަހަރު ކުރީގެ ކަމެއް މިހާރުގެ ސިއްހަތާ ގުޅުވާއިރު، އެ ދެމެދުގައި ހިނގާފައިވާ އެހެން ގިނަ ކަންތައްތަކަކަށް ވެސް ބަލަންޖެހޭނެއެވެ.

އަލްޒައިމަރސް ރިސާޗް ޔޫކޭގެ ޑރ. ސާރާ ރޮޑްރިގޭޒް ފާހަގަކުރެއްވި ގޮތުގައި، ސިކުނޑީގެ ދުޅަހެޔޮކަން ދެމެހެއްޓުމަށްޓަކައި ސިއްހަތަށް ފައިދާހުރި، މިންހެޔޮ ކާނާއެއް ބޭނުންކުރުމަކީ އެންމެ މުހިންމު ކަންތަކެވެ. އަދި ސިއްހީ އާދަތަކަށް ހެޔޮ ބަދަލެއް ގެނައުމަކީ އެއްވެސް އިރަކު ލަސްވެފައިވާ ކަމެއް ނޫނެވެ.