ނަފްސާނީ ދުޅަހެޔޮކަމާ ގުޅޭ ގޮތުން އަމްފާއިން ކުރިއަށްގެންދިޔަ ވެބިނާ ކާމިޔާބުކަމާ އެކު ނިންމާލައިފި

ދުނިޔޭގެ ނަފްސާނީ ޞިއްޙަތުގެ ދުވަހާ ގުޅުވައިގެން އޮސްޓްރޭލީއާ މޯލްޑިވްސް ފްރެންޑްޝިޕް އެސޯސިއޭޝަން (އަމްފާ) އިން ކުރިއަށްގެންދިޔަ ޚާއްޞަ ވެބިނާ ކާމިޔާބުކަމާއެކު ނިންމާލައިފިއެވެ.

"މައިންޑް މެޓާސް: ވާރލްޑް މެންޓަލް ހެލްތު ޑޭ 2026" ގެ ނަމުގައި ބޭއްވި މި ވެބިނާރު ކުރިއަށް ގެންގޮސްފައިވަނީ ރޭ 8:30 އިން 10:00 އަށެވެ. މި ހަރަކާތުގެ މައިގަނޑު މައުޟޫޢަކީ ނަފްސާނީ ޞިއްޙަތުގެ ދާއިރާގައި މަސައްކަތްކުރާ ފަންނީ މާހިރުންނާއި އެކަމުގެ ތަޖުރިބާ ލިބިފައިވާ ފަރާތްތަކުގެ ޙަޔާތުގެ ތަޖުރިބާގެ މުހިންމުކަމެވެ. ވެބިނާރު ފައްޓަވައިދެއްވީ ދިވެހިރާއްޖެއަށް ކަނޑައަޅުއްވާފައި ހުންނަވާ އޮސްޓްރޭލިއާގެ ހައި ކޮމިޝަނަރ ޑޭވިޑް ޖެސަޕް ރެކޯޑުކުރައްވާފައިވާ ބަޔާނަކުންނެވެ. އެ ބަޔާނުގައި ނަފްސާނީ ޞިއްޙަތުގެ ދާއިރާގައި މަސައްކަތް ކުރައްވާ ފަރާތްތަކުގެ އަގު ފާހަގަކުރައްވައި އަމްފާގެ މަސައްކަތްތަކަށް ތަޢުރީފު ކުރައްވާފައިވެއެވެ.

ވެބިނާރު މޮޑަރޭޓުކޮށްދެއްވީ ދިވެހިރާއްޖޭގެ ޤައުމީ ޔުނިވަރސިޓީގެ ބިހޭވިއަރަލް ސައިންސް ޑިޕާޓްމަންޓްގެ ސީނިއާ ލެކްޗަރާ ފާޠިމަތު ނަޙުލާއެވެ. ޕެނަލިސްޓުންގެ ގޮތުގައި ބައިވެރިވެވަޑައިގެންނެވީ އެ ޔުނިވަރސިޓީގެ ފެކަލްޓީ އޮފް ހެލްތު ސައިންސްގެ ޑީން ޑރ. ޢާއިޝަތު ޝާނޫރާއި ޤައުމީ ނަފްސާނީ ޞިއްޙަތުގެ މަރުކަޒުގެ ލީޑް ސޯޝަލް ވޯކަރ ފާޠިމަތު ސޯފިޔާ ރަޝީދާއި އެ މަރުކަޒުގެ ސީނިއާ ކޮންސަލްޓަންޓް ސައިކޭޓްރިސްޓް ޑރ. ޢާރިފް މުޙައްމަދެވެ.

ޕެނަލުގައި ވާހަކަފުޅު ދައްކަވަމުން ޑރ. ޢާރިފް ވިދާޅުވީ ފަރުވާއާ ގުޅޭ ނިންމުންތަކުގައި ބަލިމީހުންނާއި އެ މީހުން ބަލަހައްޓާ ފަރާތްތައް ބައިވެރިކުރުމަކީ ކޮންމެހެން ބޭނުންތެރި ކަމެއް ކަމަށެވެ. ޚިދުމަތްތައް ތަރައްޤީކުރުމާއި ބަލިތަކުން ރައްކާތެރިވުމާއި ހޭލުންތެރިކަން އިތުރުކުރުމުގެ އިތުރުން ނިޒާމުތައް ބިނާކުރުމުގައި ވެސް އެ ފަރާތްތަކުގެ ތަޖުރިބާ ހިމެނުން މުހިންމު ކަމަށް ވެސް އެ ބޭފުޅާ ވިދާޅުވިއެވެ.

ސޯޝަލް ވޯކަރ ފާޠިމަތު ސޯފިޔާ ރަޝީދު ފާހަގަކުރެއްވި ގޮތުގައި ނަފްސާނީ ދައްޗެއް ކުރިމަތިވާ ހިނދު އިންސާނާގެ ދިރިއުޅުމުގެ ތަފާތު ދާއިރާތަކަށް އޭގެ އަސަރު ފޯރައެވެ. އެ އަސަރުތަކަކީ ކެތްތެރިކަން އިތުރުކޮށްދޭ ނުވަތަ ހާސްކަން ބޮޑުކުރުވާ ކަންކަމަށް ވެދާނެ ކަމަށާއި އެހެންކަމުން ފަރުދީ މުޖުތަމަޢީ އަދި ޤައުމީ ފެންވަރުގައި ފިޔަވަޅު އެޅުން ލާޒިމުވާ ކަމަށް ވެސް ވިދާޅުވިއެވެ. ޕްރޮގްރާމްތަކާއި ފަރުވާގެ ނިޒާމުތައް ފަރުމާކުރާއިރު ނަފްސާނީ ދަތިތައް ތަޙައްމަލުކުރާ ފަރާތްތަކުގެ އަޑާއި ތަޖުރިބާ ހިމެނުމަށް ވެސް އޭނާ ބާރުއެޅުއްވިއެވެ.

މިދިޔަ އަހަރު ވެސް ދުނިޔޭގެ ނަފްސާނީ ޞިއްޙަތުގެ ދުވަހާ ގުޅުވައިގެން އަމްފާއިން ވެބިނާރެއް ބާއްވާފައިވާ އިރު މި އަހަރުގެ ދުވަސް ފާހަގަކުރުމުގެ ގޮތުން އެންމެ ފުރަތަމަ ހަރަކާތެއް ހިންގީ ވެސް އެ ޖަމިއްޔާއިންނެވެ.