ނުކުޅެދުންތެރިކަން ހުންނަ ފަރާތްތަކުގެ ޙައްޤުތަކާ ގުޅޭ އޮޕްޝަނަލް ޕްރޮޓޮކޯލްގައި ރާއްޖެއިން ބައިވެރިވުމަށް ނިންމައިފި

ނުކުޅެދުންތެރިކަން ހުންނަ މީހުންގެ ޙައްޤުތައް ރައްކާތެރިކުރާ ބައިނަލްއަޤުވާމީ މުޢާހަދާގެ އޮޕްޝަނަލް ޕްރޮޓޮކޯލްގައި ރާއްޖެއިން ބައިވެރިވުމަށް ފެނިވަޑައިގަންނަވާ ކަމަށް ވަޒީރުންގެ މަޖިލީހުން ނިންމަވައިފިއެވެ.

ރައީސް އޮފީހުން ހާމަކުރި ގޮތުގައި މި ނިންމެވުން އައީ މި މަހުގެ 20 ވީ އާދިއްތަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި ޞިއްޙަތާއި ޢާއިލާއާ ބެހޭ ވުޒާރާއިން ހުށަހެޅުއްވި ކަރުދާހާ މެދު މަޝްވަރާކުރެއްވުމަށް ފަހުގައެވެ. ޤާނޫނުއަސާސީގެ 93 ވަނަ މާއްދާގެ (ހ) ގެ ދަށުން މިފަދަ ކަންކަމުގައި ރައްޔިތުންގެ މަޖިލީހުގެ ރުހުން ބޭނުންވާތީ އެ ރުހުން ހޯއްދެވުމަށް މަޖިލީހަށް ހުށަހެޅުއްވުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ނިންމަވައިފައެވެ.

ރާއްޖެއިން 5 އެޕްރީލް 2010 ގައި ނުކުޅެދުންތެރިކަން ހުންނަ ފަރާތްތަކުގެ ޙައްޤުތަކާ ބެހޭ މައި މުޢާހަދާ ތަޞްދީޤުކޮށްފައި އޮތް ނަމަވެސް އެ މުޢާހަދާގެ އޮޕްޝަނަލް ޕްރޮޓޮކޯލްގައި މިހާތަނަށް ބައިވެރިވެފައެއް ނުވެއެވެ. އިންސާނީ ޙައްޤުތަކާ ގުޅޭ ބައިނަލްއަޤުވާމީ ނިޒާމުތަކުގެ ތެރެއިން ރާއްޖެ ރިވިއު ކުރެވުނު އިރު މި ޕްރޮޓޮކޯލް ވީ އެންމެ އަވަހަކަށް ތަޞްދީޤުކުރުމަށް ގިނަ ރިކޮމެންޑޭޝަންތަކެއް ލިބިފައިވެއެވެ.

މި ޕްރޮޓޮކޯލްގެ ދަށުން މައިގަނޑު ދެ ނިޒާމެއް ޤާއިމުކުރެވެއެވެ. ފުރަތަމަ ނިޒާމަކީ ޤައުމެއްގެ ދާޚިލީ ޤާނޫނީ މަރުޙަލާތައް ފުރިހަމަކުރުމަށް ފަހު ޙައްޤެއް ގެއްލިފައިވާ ކަމަށް ބެލެވޭ ޙާލަތެއްގައި ވަކިވަކި ފަރުދުންނަށް ނުވަތަ ބަޔަކަށް އދ. ގެ ކޮމިޓީއަށް ޝަކުވާ ހުށަހެޅޭ ނިޒާމެކެވެ. ދެވަނައީ އިންކުއަރީ ނިޒާމެވެ. މި ނިޒާމުގެ ދަށުން މެންބަރު ޤައުމަކުން ނިޒާމީ ސިފައެއްގައި ޙައްޤުތަކަށް އަރައިގެންފައިވާ ކަމަށް އިތުބާރުހުރި ގޮތަކަށް ތުހުމަތު ކުރެވޭ ނަމަ އެކަމާ ގުޅިގެން ތަޙުޤީޤު ހިންގުމުގެ ބާރު އދ. ގެ ކޮމިޓީއަށް ލިބިދެއެވެ.

މި ޕްރޮޓޮކޯލްގެ މައިގަނޑު މަޤުޞަދަކީ ނުކުޅެދުންތެރިކަން ހުންނަ ފަރާތްތަކުގެ ޙައްޤުތައް ރައްކާތެރިކުރާ މުޢާހަދާ ފުރިހަމައަށް ތަންފީޒުކުރުން ހަރުދަނާކޮށް ބައިނަލްއަޤުވާމީ ފެންވަރުގައި މެންބަރު ޤައުމުތައް ޒިންމާދާރުކުރެވޭނެ ނިޒާމެއް އެކަށައެޅުމެވެ.