މިދިޔަ އަހަރު ކޯޓްތަކުން 20،442 މައްސަލަ ނިންމި: އުއްތަމަފަނޑިޔާރު

މިދިޔަ އަހަރު ކޯޓްތަކުން 20،442 މައްސަލަ ނިންމާފައިވާ ކަމަށް އުއްތަމަ ފަނޑިޔާރު އުއްތަމަފަނޑިޔާރު ޢަބްދުލްޣަނީ މުޙައްމަދު މިރޭ ވިދާޅުވެއްޖެ އެވެ.

އުއްތަމަފަނޑިޔާރު މިހެން ވިދާޅުވީ "ޤަޟާޢީ އަހަރު 2026" އިފްތިތާޙު ކުރުމަށް މިރޭ ބޭއްވި ރަސްމިއްޔާތުގަ އެވެ. އުއްތަމަ ފަނޑިޔާރު ވިދާޅުވި ޝަރުއީ ދާއިރާއިން 2025 ވަނަ އަހަރާއި ކުރިމަތިލީ ކުރީ އަހަރު ނުނިމި އޮތް 13,351 މައްސަލައާ އެކު އެވެ. އަދި މިދިޔަ އަހަރު އެކަނިވެސް ރާއްޖޭގެ އެކިކަންކޮޅުން 20,899 މައްސަލަ އަލަށް ހުށައެޅުނެވެ.

އެހެން ކަމުން މިދިޔަ އަހަރު ފަނޑިޔާރުން ވަނީ 34,242 މައްސަލާގައި ގާނޫނީ ގޮތުން ފުރިހަމަ ކުރަން ޖެހޭ ކަންކަން ފުރިހަމަކޮށް މަސައްކަތްތައް ކުރިއަށް ގެންގޮސްފައި ކަމަށް ވިދާޅުވި އެވެ. އަދި މިދިޔަ އަހަރުގެ ތެރޭގައި 20,442 މައްސަލާގައި ހުކުމްކޮށްފައިވާ ކަމަށް ވިދާޅުވި އެވެ.

އުއްތަމަފަނޑިޔާރު ވަނީ މި އަހަރު ޝަރުއީ ދާއިރާއިން ހާސިލުކުރަން ބޭނުންވާ އެންމެ މުހިންމު އެއް ލަނޑުދަނޑިއަކީ ގިނަ ދުވަސްވެފައިވާ މައްސަލަތައް ނިންމާ ބެކްލޮގް ފިލުވާލުން ކަމުގައި ވިދާޅުވެފަ އެވެ.

ޣަނީ ވިދާޅުވި ގޮތުގައި މިވަގުތު ވަރަށް ގިނަ ދުވަސްވެފައިވާ މައްސަލަތައް އެބަހުއްޓެވެ. އެގޮތުން މައްސަލަ ނުނިމި އަހަރަށް ވުރެ ގިނަ ދުވަސްވެފައިވާ 13,032 މައްސަލަ އެބަ އޮތް ކަމުގައި ވިދާޅުވި އެވެ.

"2026 ވަނަ އަހަރު ޝަރުއީ ދާއިރާއިން ހާސިލުކުރަން ބޭނުންވާ އެންމެ މުހިންމު އެއް ލަނޑުދަނޑިއަކީ އިންސާފު ލަސްވެފައިވާ މައްސަލަތަކަށް އަމާޒުކޮށްގެން ހާއްސަ މަސައްކަތްތަކެއް ކޮށް އެ މައްސަލަތަކުގައި އިންސާފު ގާއިމު ކުރުން,"

އެހެން ކަމުން މި މައްސަލަތަކުގައި އިންސާފު ގާއިމުކުރުމަކީ ވަރަށް އިސްކަން ދޭން ބޭނުންވާ ކަމެއްގައި ވިދާޅުވި އެވެ. އަދި ވިދާޅުވީ މި މައްސަލަތަކަށް އިންސާފު ގާއިމުކުރާނީ މި އަހަރު އަލަށް ރަޖިސްޓްރީވާނެ ކަމަށް ލަފާކުރެވޭ 21,000 ހާސް މައްސަލަ ވެސް މަޑުޖެހުމެއް ނެތި ކުރިއަށް ގެންދެވޭނެ ގޮތަށް ރާވައިގެން ކަމަށެވެ.

އެކަމަށް މަގުފަހި ކުރުމަށްޓަކައި ވަކި ޓާސްކު ފޯހެއް މި މަހުގެ 10 ވަނަ ދުވަހު އެކުލަވާލެވޭނެ ކަމުގައި ވިދާޅުވި އެވެ. އަދި ވިދާޅުވީ ޓާސްކު ފޯހުގެ ކޮންމެ މަސައްކަތެއްވެސް ކުރިއަށް ގެންދެވޭނީ ވަރަށް ހަރުދަނާކަމާ އެކު ކަމަށެވެ.

"އެ ޓާސްކްފޯހުގެ ފަރާތުން މީގެ ތެރެއިން ކޮންމެ މައްސަލައެއް ނުނިމި އޮތް ސަބަބު, ސީދާ އެ މައްސަލަ ހަވާލުކުރެވިފައިވާ މެޖިސްޓްރޭޓް, ގާޒީ, ފަނޑިޔާރުގެ ގާތުގައި އަހާ, ނުނިމި އޮތް ސީދާ ސަބަބު ރަނގަޅަށް ސާފުކޮށް އެ މައްސަލަ ކުރިއަށް ގެންގޮސް ދިނުމުގައި އެހީތެރިވެދޭނެ," އުއްތަމަފަނޑިޔާރު ވިދާޅުވި އެވެ.

އުއްތަމަފަނޑިޔާރު ވިދާޅުވީ މި މައްސަލަތަކުގެ ތެރެއިން ބަންދުގައި ތިބި މީހުންގެ މައްސަލަތަކަށްވެސް ދާއިމީ ހައްލު އަންނާނެ ކަމަށެވެ.