ގިނަވެގެން އަހަރެއް ތެރޭގައި މަގޫދޫގެ އެއާޕޯޓު ނިންމާނަން: ރައީސް

ފ. މަގޫދޫގެ އެއާޕޯޓުގެ މަސައްކަތް ގިނަވެގެން އަހަރެއްގެ ތެރޭގައި ނިންމަވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިހާރު ފ. އަތޮޅަށްކުރައްވަމުން ގެންދާވާ ދަތުރުފުޅުގެ ތެރެއިން ރައްޔިތުންގެ ބައްދަލުވުމުގައި ރައީސް ވިދާޅުވީ، މިއަދު މަގޫދޫގައި ފެށި މަޝްރޫއުތަކާއި ހިނގަމުންދާ މަޝްރޫއުތަށް އެއްވެސް ކަހަލަ މަޑުޖެހުމެއްނެތި ކުރިޔަށް ގެންގޮސް ނިންމަވާނެ ކަމަށެވެ. އަދި އެ މަޝްރޫއުގެ ތެރޭގައި މަގޫދޫ އެއާޕޯޓުގެ މަސައްކަތް ވެސް ހިމެނޭ ކަމުގައި ރައީސް ފާހަގަކުރެއްވިއެވެ.

އަދި އެ އެއާޕޯޓަކީ އެމަނިކުފާނުގެ ވަޢުދުފުޅެއްކަން ފާހަގަކުރައްވަމުން ރައީސް ވަނީ އެ ވަޢުދުފުޅާ އެއްގޮތަށް އެ އެއާޕޯޓުގެ މަސައްކަތް ނިންމަވާނެކަން ފާހަގަކުރައްވާފައެވެ. އެގޮތުން ވީހާ ވެސް އަވަހަކަށް އެ އެއާޕޯޓުގެ މަސައްކަތް ނިންމެވުމަށް މަސައްކަތްކުރައްވާކަން ފާހަގަކުރައްވަމުން ރައީސް ވިދާޅުވީ، އަންނަ އަހަރުގެ ސެޕްޓެމްބަރު މަހާ ހަމައަށް ދާއިރަށް މަގޫދޫގެ އެއާޕޯޓުގެ މަސައްކަތް ނިންމަވާނެ ކަމަށެވެ.

އަޅުގަނޑުމެން ސަރުކާރުން އެތައް ސަތޭކަ މަޝްރޫއެއް [އެމްޓީސީސީއާ] ހަވާލުކޮށްފިން. މި ހުރިހާ މަސައްކަތަކަށް ބަލާފައި ތާރީހަކަށް ތިޔަބޭފުޅުން އެދިލައްވާތީ، ޓްރާންސްޕޭރަންޓްކޮށް މަޝްރޫއު ކުރިއަށް ގެންދަން ބޭނުންވާތީ މިގޮތަށް މި ދަންނަވަނީ. މިހާރު އޮތް ހިސާބުން އެގްރީމަންޓާ އެއްގޮތަށް ކުރިއަށް ގެންގޮސް ނިންމާލުމަށް ގިނަވެގެން 12 މަސް ދުވަހުގެ ތެރޭގައި މަޝްރޫއު ނިންމައި ދޭނަން

ރައީސް ޑރ. މުޙައްމަދު މުޢިއްޒު

ރައީސް އެފަދައިން ވިދާޅުވިއިރު، މަގޫދޫ އެއާޕޯޓަކީ މިދިޔަ ސަރުކާރުން ނިމެންދަނިކޮށް 2023 ވަނަ އަހަރުގެ އޮގަސްޓު މަހުގެ ތެރޭގައި އެމްޓީސީސީއާ ނިންމަން ހަވާލުކުރި މަޝްރޫއެކެވެ.

އެ މަޝްރޫއުގެ މަސައްކަތްތައް މަޑުޖެހުމުގެ ސަބަބުން އާންމުންގެ ކަންބޮޑުވުންތައް ފާޅުކޮށްފައިވާއިރު، އެ އެއާޕޯޓުގެ ވަރަށް ގިނަ މަސައްކަތްތަކެއް ނިމިފައިވާކަން ފާހަގަކުރެވެއެވެ. އެގޮތުން ރަންވޭގެ ބޮޑު ބައެއްގެ އޭބީސީ އަޅައި ނިމި، ޕަސިންޖާ ޓާމިނަލް އަދި ފަޔާ ޓްރަކް އަދި އޭޓީސީ ޓަވަރުގެ ސްޓަރްކްޗާގެ މަސައްކަތްތައް ވަނީ ނިމިފައެވެ.

އެ އެއާޕޯޓުގެ މަޝްރޫއުގައި 1،800 މީޓަރު ދިގު، 30 މީޓަރުގެ ފުޅާ ރަންވޭއެއް އަޅާއިރު، ޓެކްސީވޭ، އޭޕްރަން، އަދި ފަޔަޕެޑް / ރޯޑް ހެދުމާއި ޕަސެންޖާ ޓާމިނަލެއް ހެދުމަށް ވަނީ ހަމަޖެހިފައެވެ. މީގެ އިތުރުން ކޮންޓްރޯލް ޓަވަރާ އެކު ފަޔާ ސްޓޭޝަނެއް ހެދުމަށް ވަނީ ހަމަޖެހިފައެވެ. އެއާޕޯޓު ތަރައްގީ ކުރަނީ ޖެޓު ވެސް ޖެއްސޭ ފެންވަރަށެވެ. މި މަޝްރޫއުގެ ދަށުން 42.6 ހެކްޓަރުގެ ބިން ހިއްކައި، 2،098 މީޓަރު ބޮޑު ހިލަ ރިވެޓްމަންޓް ޖަހައި 1،400 މީޓަރުގެ ޖީއޯބޭގް ރިވެޓްމަންޓް ޖެހުން ހިމެނެއެވެ.

އެ އެއާޕޯޓުގެ މަސައްކަތްތައް ކުރިޔަށްދާއިރު، އެ ރަށުން ގާތްގަޑަކަށް 10 މިނެޓުން ލޯންޗުގައި ދެވޭ ފ. ނިލަންދޫގައި ވެސް އެއާޕޯޓެއް ތަރައްގީކުރުމުގެ މަސައްކަތް ދަނީ ކުރަމުންކަން ފާހަގަކުރެވެއެވެ.