20 އަތޮޅުގެ މަންދޫބުންނާއެކު ޖަމިއްޔަތުއް ސަލަފުގެ މަދަނީ ޖަމުޢިއްޔާ ތަކުގެ މަހާސިންތާ މިއަދު ފަށަނީ!
20 އަތޮޅުގެ މަންދޫބުންނާއެކު ޖަމިއްޔަތުއް ސަލަފުގެ މަދަނީ ޖަމުޢިއްޔާ ތަކުގެ މަހާސިންތާ މިއަދު ފަށަން ތައްޔާރު ވެއްޖެއެވެ.
މިއަދުން ފެށިގެން މިމަހު 3 ވަނަ ދުވަހުގެ ނިޔަލަށް އއ.މަތިވެރީގައި އޮންނަ މި މަހާސިންތާގެ ޝަރަފުވެރި މެހެމާނަކީ ސިޓީސް ލޯކަލް ގަވާމަންޓް އެންޑް ޕަބްލިކް ވާކްސް މިނިސްޓަރު އާދަމް ޝަރީފް ޢުމަރެވެ.
މިފަދަ މަހާސިންތާއެއް ބޭއްވުމުގެ މަގްސަދަކީ ރާއްޖޭގައި އުފެދިފައިވާ ޖަމިއްޔާތަކުގެ ގުޅުންތައް ބަދަހިކޮށް އެއް ބަޔަކު އަނެއް ބަޔަކު ތައާރަފުވެ ޖަމިއްޔާތަކުގެ މެދުގައި ގުޅުން ބަދަހި ކުރުން ކަމަށް ސަލަފުން ބުނެއެވެ.
އަދި ހޭލުންތެރިކުރުވުމުގެ މަސައްކަތުގައި ޖަމިއްޔާތަކުގެ ބައިވެރިވުން ބޮޑުކޮށް އެ މަސައްކަތުގައި ހަރަކާތްތެރިވާނެ ލީޑަރުން އުފައްދައި، ޖަމިއްޔަތުއް ސަލަފާއި ގުޅިގެން ދީނީ އަދި އިޖްތިމާއީ މައިދާނުގައި އެއް އަމާޒަކަށް ވާސިލުވުމަށް މަސައްކަތް ކުރުމަކީވެސް މިފަދަ ވޯކްޝޮޕެއް ބޭއްވުމުގެ މަޤްޞަދެއް ކަން ސަލަފުން ބުނެއެވެ.
"މަދަނީ ޖަމިއްޔާތަކުގެ މަހާސިންތާ" ގައި ރާއްޖޭގެ 20 އަތޮޅުން މަންދޫބުން ބައިވެރިވާ ކަމަށް ސަލަފުން މައުލޫމާތު ދެއެވެ. އެގޮތުން ކޮންމެ އަތޮޅަކުން އެއް ޖަމިއްޔާ މި މަހާސިންތާ ގައި ބައިވެރިވާއިރު މި ޖަމިއްޔާތަކަކީ ރަށު ފެންވަރުގައާއި އަތޮޅު ފެންވަރު ގައި އެކި ހަރަކާތްތައް ރާއްވާ ހިންގާ އަދި ތަފާތު އެކި ދާއިރާތަކުން ފާހަގަކޮށްލެވޭ މަސައްކަތްތަކެއް ކުރަމުން އަންނަ ޖަމިއްޔާތަކެއް ކަން ސަލަފުން ފާހަގަކުރެއެވެ.
މީގެ އިތުރުން ސަލަފުން ބުނީ، މި މަހާސިންތާ ގައި ޖަމިއްޔާތައް ގުޅިގެން އެކުގައި މަސައްކަތް ކުރާނެ ގޮތްތަކެއް ކަނޑައެޅިގެންދާނެ ކަމަށާ، މަހާސިންތާގައި ތަފާތު ދާއިރާތަކުން ފާހަގަކޮށްލެވޭ އެކި ބޭފުޅުން ވަޑައިގެން ސެޝަންތައް ނަންގަވައިދެއްވާނެ ކަމަށެވެ.
އެ ގޮތުން ލީޑާޝިޕް، ޓީމް ބިލްޑިން، މުޖްތަަމައުގެ މީހުންނާއި މުއާމަލާތް ކުރާނެ ގޮތް އަދި ރާއްޖޭގެ ދީނީ ހޭލުންތެރިކަމުގެ ތާރީހަށް ހާއްސަ ސެޝަންތައް ކުުރިއަށް ގެންދެވޭނެ ކަމަށް ބުނެފައިވެއެވެ.
ހަމައެހެންމެ ޝަރުއީ އިލްމުގެ މުހިންމު ކަމާއި ގުޅޭ ހާއްސަ ސެޝަނެއް ވެސް ކުރިއަށް ގެންދަން ނިންމާފައިވާ ކަން ފާހަގަކޮށްފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
