ދައުލަތުގެ ބެލުމުގެ ދަށުގައި ތިބޭ ކުދިންނަށް ޢީދުގެ އުފާ ފޯރުކޮށްދިނުމަށް ޚާއްސަ ހަރަކާތްތަކެއް ބާއްވައިފި

ދައުލަތުގެ ބެލުމުގެ ދަށުގައި ތިބޭ ކުދިންނާއި ނުކުޅެދުންތެރިކަން ހުންނަ ފަރާތްތަކަށް ޢީދުގެ އުފާވެރިކަން ފޯރުކޮށްދިނުމަށް ޚާއްސަ ހަރަކާތްތަކެއް މިއަދު ކުރިއަށް ގެންގޮސްފިއެވެ.

މިއީ ޔޫއޭއީގެ އެމިރޭޓްސް ރެޑް ކްރެސެންޓުން ފިތުރު ޒަކާތުގެ ގޮތުގައި އިސްލާމިކް މިނިސްޓްރީއަށް ހަދިޔާކުރި ފައިސާ، މިނިސްޓްރީ އޮފް ސޯޝަލް އެންޑް ފެމިލީ ޑެވަލޮޕްމެންޓާ ހަވާލުކުރުމާ ގުޅިގެން އޭގެ އެހީގައި ކުރިއަށް ގެންދިޔަ ހަރަކާތެކެވެ.

މި ހަރަކާތްތަކުގެ ތެރެއިން، ދައުލަތުގެ ބެލުމުގެ ދަށުގައި ކުދިން ބަލަހައްޓާ މަރުކަޒުތަކުގައި ތިބި ކުދިންނަށް ވަނީ ޢީދު ހެދުމާއި ޢީދު ހަދިޔާ ހަވާލުކޮށްފައެވެ. މީގެ އިތުރުން، އެ އެހީގައި ރީދަ ވީއްލުމާއި ކާބޯތަކެތީގެ ޕެކޭޖުވެސް އެކުދިންނަށް ބަހާފައިވެއެވެ.

މިނިސްޓްރީ އޮފް ސޯޝަލް އެންޑް ފެމިލީ ޑިވަލޮޕްމަންޓުން ބުނިގޮތުގައި، މި މަސައްކަތުގެ މައިގަނޑު އަމާޒަކީ އެއްވެސް ކުއްޖަކު ބާކީނުކޮށް، މުޖުތަމައުގެ އެންމެހާ ކުދިންވެސް ޢީދުގެ އުފަލުގައި ޝާމިލުކުރުމެވެ. މިއީ އެ ކުދިންގެ ނަފްސާނީ ދުޅަހެޔޮކަމަށާއި އުފާވެރިކަމަށް އިސްކަންދީގެން ކުރިއަށްގެންދިޔަ ހަރަކާތެކެވެ.

މި ދީލަތި އެހީތެރިކަމަށްޓަކައި ޔޫއޭއީ ސަރުކާރަށާއި، އެމިރޭޓްސް ރެޑް ކްރެސެންޓުގެ އިތުރުން މިނިސްޓްރީ އޮފް އިސްލާމިކް އެފެއާޒަށް މިނިސްޓރީއިން ވަނީ އިޚްލާޞްތެރިކަމާއެކު ޝުކުރު އަދާކޮށްފައެވެ.

މިއަދު ކުރިއަށްދިޔަ މި ހަރަކާތްތަކުގެ ސަބަބުން، މަރުކަޒުތަކުގައި ތިބި ކުދިންނަށާއި ނުކުޅެދުންތެރިކަން ހުންނަ ފަރާތްތަކަށް ޢީދުގެ ފޯރިއާއި އުފާވެރިކަން ވަނީ ވަރަށް ގާތުން ތަޖުރިބާކުރެވިފައެވެ.