ވިޒިޓް މޯލްޑިވްސްގެ އަގު ވެއްޓޭތީ އެމްބެސެޑަރުކަމުން 2 އޮފް އަސް ސަސްޕެންޑުކޮށްފި
ދިވެހި ބޭންޑު، 2 އޮފް އަސްއާއި ބެހޭ ގޮތުން ދައުރުވަމުންދާ ނޭދެވޭ ވާހަކަތަކާއި، ކުރެވޭ އެކި ތުހުމަތުތަކުގެ ސަބަބުން ވިޒިޓް މޯލްޑިވްސް ކޯޕަރޭޝަންގެ އަގުވެއްޓި، ނަން ހުތުރުވަމުންދާތީ އެ ކުންފުނިން 2 އޮފް އަސް އެމްބެސެޑަރު ކަމުން ވަގުތީ ގޮތުން ސަސްޕެންޑުކޮށްފިއެވެ.
2 އޮފް އަސް ވިޒިޓް މޯލްޑިވްސްގެ އެންބެސެޑަރަކަށް ހަމަޖައްސާފައިވަނީ މިދިއަ އަހަރުގެ ޖުލައި މަހުގެ 7 ވަނަ ދުވަހެވެ. އެ އެމްބެސެޑާޝިޕް ބާތިލުކުރިކަން އަންގައި މިދިޔަ މަހު 22 ގައި ވީއެމްސީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝިއުރީ، 2 އޮފް އަސްގެ ލަވަކިޔުންތެރިޔާ އަހްމަދު އަދުހަމްއަށް ވަނީ ސިޓީއެއް ފޮނުވާފައިކަމަށް މައުލުމާތުލިބެއެވެ.
އެ ސިޓީގައި 2 އޮފް އަސްއާ ގުޅޭ ގޮތުން ފެތުރެމުންދާ ނޭދެވޭ ވާހަކަތަކުގެ ނޭދެވޭ އަސަރު ވިސިޓް މޯލްޑިވްސްއަށް ކުރަމުންދިޔުމުގެ ސަބަބުން، އިންޓާނަލް ރިވިއުއެއް ކުރިއަށް ގެންގޮސް، ވީއެމްސީގެ މެނޭޖްމަންޓުން މި އެންބެސެޑާޝިޕް ސަސްޕެންޑުކުރަން ނިންމާފައިވާކަމަށް ބުނެފައިވެއެވެ.
އަދި މިއާއިއެކު، ސިޓީ ފޮނުވި ތާރީހުން ފެށިގެން ވިޒިޓް މޯލްޑިވްސް އެމްބެސެޑަރު ކަމަށް ދައްކައިގެން ނުވާނެކަމަށާއި، އެކުންފުނީގެ ނަމާއި ލޯގޯ އައި ބްރޭންޑިން އަދި އެއްވެސް އިންޓެލެކްޗުއަލް ޕްރޮޕަޓީއެއް ބޭނުންކޮށްގެން ނުވާނެކަމަށާއި އަދި ވީއެމްސީއާ ގުޅޭ މުއާމަލާތްތަކާއި ޕްރޮމޯޝަންތަކާއި އެ ނޫނަސް އެއްވެސް ހަރަކާތެއްގައި ބައިވެރިވެގެން ވެސް ނުވާނެކަމަށް އަންގާފައިވެއެވެ.
2 އޮފް އަސްއަށް މަކަރާއި ހީލަތުގެ ތުހުމަތުތަކެއް ވަނީ އައިސްފައެވެ. އަދި އެ ބޭންޑަށް ލިބޭ ފައިސާއަށް ވާނުވާ ނޭނގޭ ކަމަށް ތުހުމަތުކޮށް، މިދިޔަ މަހުގެ ތެރޭގައި އެ ބޭންޑުގެ ގިނަ އަދަދެއްގެ މެމްބަރުން ވެސް ވަނީ ވަކިވެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
