މަނާ 21 ބޭހެއްގެ ލިސްޓް އާއްމުކޮށް، އެ ބޭނުންކުރާ ފަރާތްތަކަށް އެމްއެފްޑީއޭގެ އިންޒާރު: "ހީވެސް ނުކުރާފަދަ ބޮޑު ސިއްޙީ ނުރައްކަލެއް ކުރިމަތިވެދާނެ"

ރާއްޖެއަށް ހުއްދަނެތި ބޭސް އެތެރެކޮށް، އޮންލައިން ޕްލެޓްފޯމްތަކާއި އާދައިގެ ފިހާރަތަކުގައި ވިއްކަމުންދާ މައްސަލާގައި މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ކަންބޮޑުވުން ފާޅުކޮށް، އިންޒާރު ދީފިއެވެ.

ސިއްޙަތާއި އާއިލާއާއި އިޖްތިމާއީ ރައްކާތެރިކަމާ ބެހޭ ވުޒާރާގެ ދަށުން ހިނގަމުންދާ އެމްއެފްޑީއޭ އިން ނެރުނު އިޢުލާނެއްގައި ބުނެފައިވަނީ، ބޭހާބެހޭ ޤަވާއިދާއި ސިއްޙީ ޚިދުމަތް ދިނުމުގެ ޤާނޫނުގެ ދަށުން ރާއްޖެއަށް ބޭސް އެތެރެކުރެވޭނީ އެ އޮތޯރިޓީގައި ރަޖިސްޓްރީވެފައިވާ ފަރާތްތަކަށް އެކަނި ކަމަށެވެ. އަދި އެތެރެކުރާ ބޭހަކީ އެ އޮތޯރިޓީގެ 'އެޕްރޫވްޑް ޑްރަގް ލިސްޓް' ގައި ހިމެނޭ ބޭހަކަށް ވާންޖެހޭނެ ކަމަށްވެސް ބުނެފައިވެއެވެ.

ނަމަވެސް ބޭސް އެތެރެކުރުމުގެ ހުއްދަ ނެތް ފަރާތްތަކުން ތަފާތު ވައްތަރުގެ ބޭސްތައް ރާއްޖެއަށް އެތެރެކޮށް ވިޔަފާރިކުރަމުންދާކަން ފާހަގަކުރެވިފައިވާ ކަމަށް އެ އޮތޯރިޓީން ބުނެފައިވެއެވެ. އޭގެ ތެރޭގައި އެންމެ ގިނައިން ވިއްކާ ކަމަށް ފާހަގަވީ 21 ބާވަތެއްގެ ބޭހުގެ ލިސްޓެއްވެސް އެ އޮތޯރިޓީން ވަނީ އާންމުކޮށްފައެވެ.

އެމްއެފްޑީއޭ އިން ބުނި ގޮތުގައި، މިގޮތަށް އެތެރެކުރާ ބޭސްތަކަކީ އޭގައި ހިމެނޭ މާއްދާތައް ކަށަވަރު ކުރެވިފައިވާ ތަކެއްޗެއް ނޫނެވެ. އަދި އެއީ އޭގެ ފެންވަރާއި ރައްކާތެރިކަން ބަލާފައި ނުވާ ތަކެތި ކަމަށްވާތީ، އެފަދަ ބޭސް ބޭނުންކުރުމުން "ހީވެސް ނުކުރާފަދަ ބޮޑެތި ސިއްޙީ ނުރައްކަލަކާ" ކުރިމަތިލާން ޖެހިދާނެ ކަމުގެ ބިރު އެބައޮތް ކަމަށް އެ އިދާރާއިން މައުލޫމާތުދެއެވެ.

އެމްއެފްޑީއޭގެ އިއުލާނުގައި އިތުރަށް ބުނެފައިވަނީ، ހުއްދަނެތި ބޭސް އެތެރެކޮށް، ވިއްކާ އަދި އިޝްތިހާރުކުރާ އޮންލައިން ޕޭޖުތަކާއި ފިހާރަތަކާމެދު ގާނޫނީ ގޮތުން ފިޔަވަޅު އަޅަމުން ގެންދާނެ ކަމަށެވެ.

މިކަމާ ގުޅޭ އެއްވެސް މައުލޫމާތެއް ސާފުކުރަން ބޭނުންވާނަމަ، އެ އޮތޯރިޓީގެ މެޑިސިން ހޮޓްލައިން ނަންބަރު 7200321 އަށް ގުޅުމަށް ވަނީ އެދިފައެވެ.