އާރުޑީސީ މައްސަލާގައި މޫކޭ ދިރިއުޅޭގެއަށް ފުލުހުން ވަދެ, އިލެކްޓްރޯނިކް ސާމާނުތަކެއް ގެންގޮސްފި

ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ހިޔާނާތުގެ މައްސަލައާ ގުޅިގެން ރޭގެ ވަގުތެއްގައި އެކުންފުނީގެ ކުރީގެ މެނޭޖިންގ ޑިރެކްޓަރު މޫސާ އަލިމަނިކް (ވަޑި މޫކޭ) ދިރިއުޅުއްވާގެއަށް ފުލުހުންވަދެ އިލެކްޓްރޯނިކް ސާމާނުތަކެއް ގެންގޮސްފިއެވެ.

މިކަން ފުލުހުންވެސް ވަނީ ޔަގީންކޮށްދީފައެވެ. ފުލުހުން ބުނީ އާރުޑީސީއާ ގުޅޭގޮތުން ފުލުހުން ތަހުގީގުކުރަމުންގެންދާ މައްސަލައިގެ ތަހުގީގުގެ ބޭނުމަށް މޫކޭ ދިރިއުޅުއްވާ ތަނުން އިލެކްޓްރޯނިކްސް އައިޓަމްތަކެއް ގެންގޮސްފައިވށާނޭ ކަމަށެވެ. މޫކޭގެ އިތުރުން ފުލުހުން ވަނީ އާރުޑީސީގެ ސީއެފްއޯ ޔާސިރުއާ ގުޅުންހުރި ދެ ތަނެއްވެސް ބަލައި އިލެކްޓްރޯނިކް އައިޓަމްތަކެއް ގެންގޮސްފައެވެ. ނަމަވެސް ގެންދިޔައީ ކޮންކޮން އެއްޗިއްސެއްކަމެއް ފުލުހުން ހާމަކޮށްފައެއް ނުވެއެވެ.

މޫކޭ ދިރިއުޅުއްވާގެއިން ފުލުހުން އިލެކްޓްރޯނިކް އައިޓަމްތަކެއް ގެންގޮސްފައިވާއިރު، ރޭ އެމްޑީޕީން ބޭއްވި ޖަލްސާގައި އޭނާ ވަނީ ސަރުކާރަށާއި ތަހުގީގީ އިދާރާތަކަށް އަމާޒުކޮށް ވަރަށްބޮޑަށް ފާޑުވިދާޅުވެ ވާހަކަދައްކަވާފައެވެ. މިގޮތުން ރޭގެ ޖަލްސާގައި މޫކޭ ވަނީ އެފަރާތްތަކުން މަސައްކަތް ކުރައްވަނީ ރައީސް އަންގަވާގޮތެއްގެ މަތިން ސީދާ ސިޔާސީ ބޭނުންތަކަށް ފަހިވާގޮތަށް އިދިކޮޅު ފަރާތްތަކަށް ބިރުދެއްކުމުގެ ނިޔަތުގައިކަމަށް މޫކޭ ވަނީ ސިފަކުރައްވާފައެވެ.

ފުލުހުން އަންނަނީ އާރުޑީސީ ހިޔާނާތާގުޅޭ މައްސަލައެއް ތަހުގީގުކުރަމުންނެވެ. އެގޮތުން ފުލުހުން ވަނީ މިދިޔަ އަހަރުގެ ނޮވެމްބަރުމަހު އާރުޑީސީ އޮފީހަށްވަދެ މައްސަލައާ ގުޅޭ މައުލޫމާތު ހޯދުމަށް ގިނަ އަދަދެއްގެ ލިޔެކިޔުންތައް ގެންގޮސްފައެވެ. އާރުޑީސީ ހިޔާނާތުގެ މައްސަލައާ ގުޅޭގޮތުން ފުލުހުން މީގެ ކުރިން ބުނެފައިވަނީ ކުންފުނީގެ ފައިސާ، މުއައްޒަފުންގެ އަމިއްލަ އެކައުންޓުތަކަށް ވަދެފައިވާކަމަށާއި، މިގޮތުން އެ މުއައްޒަފުންގެ އެކައުންޓްތަކަށް ވަދެފައިވާ ފައިސާގެ އަދަދު 11 މިލިއަން ރުފިޔާއަށް އަރާކަމަށެވެ.