ސަރުކާރަށް ތާއީދުކުރާ މަޖިލީހެއް ހޮވައިފިނަމަ ރައީސް ޑރ.މުޢިއްޒު 60،000 ވަޒީފާ ހާސިލްކޮށްދެއްވާނެ: ޝަރީފް

ސަރުކާރާއި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ތަރައްގީގެ ސިޔާސަތަށް ތާއީދުކުރާ މަޖިލީހެއް ރައްޔިތުން ހޮވައިފިނަމަ، ޒުވާނުންނަށް ބޭނުންވާ 60،000 ވަޒީފާ ރައީސް ޑރ.މުޢިއްޒު ހާސިލްކޮށްދެއްވާނެ ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހީމް ޝަރީފް ވިދާޅުވެއްޖެއެވެ.

ރޭގައި ޕީއެންސީން އައްޑޫ ސިޓީގައި ކުރިއަށް ގެންދިޔަ މަޖިލިސް ކެމްޕޭންގެ ޖަލްސާގައި ވާހަކަފުޅު ދައްކަވަމުން އިބްރާހިމް ޝަރީފް ވިދާޅުވީ، ރާއްޖޭގައި ވެރިކަން ކުރެއްވި ހުރިހާ ވެރިންނާއި އެކުވެސް މަސައްކަތް ކުރުމުގެ ފުރުސަތު ލިބިލެއްވި ކަމަށާއި އޭގެ ތެރެއިންވެސް ރައީސް ޑރ.މުޢިއްޒު އަކީ "ރޮކެޓް ސްޕީޑް" ގައި މަސައްކަތް ކުރައްވާ, ރާއްޖެ ތަރައްގީގެ އާ ހަރުފަތަކަށް ގެންގޮސްދޭނެ ބޭފުޅެއް ކަމަށެވެ.

ރައްޔިތުން އެންމެ އުންމީދު ކުރާ ކަމަކީ ޒުވާނުންނަށް ވަޒީފާގެ ފުރުސަތުތައް ފަހިވެގެން ދިޔުންކަން ފާހަގަކުރައްވާ ޝަރީފް ވިދާޅުވީ، ކުރިއަށް އޮތް 5 އަހަރުގެ ތެރޭގައި ދިވެހި ރާއްޖޭގައި ގާތްގަނޑަކަށް 60،000 ވަޒީފާ ބޭނުންވާނެ ކަމަށެވެ. އަދި އެ ވަޒީފާ ބޭނުންނުވާ ކަމަށް ރައްޔިތުން ބުނި ނަމަވެސް އެއީ ހަގީގަތެއް ނޫން ކަމަށާއި، ކުރިއަށް އޮތް 5 އަހަރަށް ބޭނުންވާ 60،000 ވަޒީފާ، ރައީސް ޑރ.މުޢިއްޒު އެކިކަހަލަ މަޝްރޫއުތައް ހިންގަވައިގެން އުފައްދަވާނެ ކަމަށެވެ.

" ރައީސް ޑރ.މުޢިއްޒުގެ ތަސައްވުރު، އިގްތިސާދީ ތަސައްވުރު، ތަރައްގީގެ ތަސައްވުރު ހަގީގަތަކަށް ހަދާނޭ ރައްޔިތުންގެ މަޖިލީހެއް ތިޔަ ބޭފުުން ހޮއްވަވައި ދެއްވައިފިނަމަ އަޅުގަނޑަށް ޔަގީން ދިވެހި ރާއްޖޭގެ ޒުވާނުންނަށް ބޭނުންވާ 60،000 ވަޒީފާ ކުރިއަށް އޮތް 5 އަހަރު ތެރޭގައި އެކި  އެކި މަޝްރޫއު ތައް ހިންގަވައިގެން، އިގްތިޞާދީ ތަރައްގީގެ ކަންކަން ތަންފީޒު ކުރައްވައިގެން މި އިންނެވި މުޢިއްޒު ހާސިލްކޮށްދެއްވާނެ."

ޝަރީފް ވިދާޅުވިއެވެ.

ޝަރީފް ވިދާޅުވީ، މި ކަންކަމުގެ އިތުރުން، އައްޑޫ ސިޓީގެ ރައްޔިތުން ބޭނުންވާ ކަންކަން ވެސް ރައީސް ޑރ.މުޢިއްޒު ހާސިލްކޮށްދެއްވާނެ ކަމަށާއި، މިފަދައިން ކަން ކުރުމަށްޓަކައި ރައްޔިތުން ފުރުސަތު ދެއްވައިފިނަމަ ޔަގީނުންވެސް އެކަންކަން ރައީސް ޑރ.މުޢިއްޒު ހާސިލްކޮށްދެއްވާނެ ކަމާއި މެދު އެއްވެސް ޝައްކެއް ނެތް ކަމަށެވެ.

އެހެންކަމުން ޝަރީފް ވަނީ، ސިޔާސީ ހަތުރުވެރިކަމާއި ހަމަނުޖެހުމަށް ފުރުސަތު ނުދީ، މި ފަހަރު ރައީސް ޑރ.މުޢިއްޒު އަށް އެއްބާރުލުން ދެއްވާނެ މަޖިލީހެއް ހޮވުމަށް އެދިވަޑައިގެންފައެވެ.