ފެނަކައިގެ ޚިޔާނާތް: ސައީދުގެ ޅިޔަނެއްގެ ކުންފުންޏަކާއެކު 90 އެއްބަސްވުން, 31.1 މިލިއަން ރުފިޔާ

ފެނަކައިގެ ކުރީގެ މެނޭޖިން ޑިރެކްޓަރު އަހްމަދު ސައީދުގެ އާއިލީ މީހުންގެ ކުންފުނިތަކަށް އުސޫލުން ބޭރުން މަޝްރޫއުތައް ހަވާލުކޮށް އެތައް މިލިއަން ރުފިޔާއެއް ދީފައިވާކަން ހާމަވެއްޖެ އެވެ.

އެކަން ހާމަވީ ފެނަކަ ކޯޕަރޭޝަންގެ ހާއްސަ އޮޑިޓް ރިޕޯޓްގަ އެވެ. އެ ކުންފުނިން 2021 ވަނަ އަހަރުން ފެށިގެން 2023 ވަނަ އަހަރުގެ ނިޔަލަށް ހިންގާފައިވާ މާލީ މުއާމަލާތްތަކާއި ގުޅޭ ތަފްސީލް ހިމަނާ އާންމުކޮށްފައިވާ ރިޕޯޓްގައިވާ ގޮތުން އޭރު އެމްޑީގެ މަގާމުގައި ހުރި ސައީދުއާ ގުޅުންހުރި ކުންފުނިތަކާއެކު 92 އެއްބަސްވުމެއް ވަނީ ހަދާފަ އެވެ.

މި އެއްބަސްވުންތަކުގެ އަގު 49.7 މިލިއަން ރުފިޔާ އަށް ވުރެ މައްޗެވެ. އޮޑިޓް ރިޕޯޓްގައިވާ ގޮތުން އެ ކުންފުނިތަކަށް ފެނަކައިން 31،124،418 ރުފިޔާ ވެސް ވަނީ ދޫކޮށްފައެވެ.

އެގޮތުން ސައީދުގެ ޅިޔަނުންގެ އަމިއްލަ ނަމުގައި ރަޖިސްޓްރީކޮށްފައިވާ ދެ ކުންފުންޏަކާ އެކު ވަނީ 90 އެއްބަސްވުމެއް ހަދާފަ އެވެ.  އަނެއް ދެ އެއްބަަސްވުން ހެދީ ސައީދުގެ ޅިޔަނެއްގެ ދަރިފުޅުގެ ހިއްސާ އޮންނަ ކުންފުންޏަކާ އެކު އެވެ.

ކުންފުންޏަކުން ހިންގި އެންމެ ބޮޑު ޚިޔާނާތް

އޮޑިޓް ރިޕޯޓްގައިވާ ގޮތުން ފެނަކަ އިން ވަނީ ވާދަވެރި ބީލަމުގެ އުސޫލުން ބޭރުން 1.3 ބިލިއަން ރުފިޔާގެ އެއްބަސްވުން އެ މުއްދަތުގައި ހަދާފައިވެ އެވެ.

އޮޑިޓް ރިޕޯޓްގައިވާ ގޮތުން މި މުއްދަތުގައި 2,239,640,958 (ދެ ބިލިއަން ދުއިސައްތަ ތިރީސް ނުވަ މިލިއަން ހަ ލައްކަ ސާޅީސް ހާސް ނުވަސަތޭކަ ފަންސާސް އަށެއް) ރުފިޔާގެ އެއްބަސްވުން ފެނަކައިން ހަދާފައިވެ އެވެ. އޭގެ ތެރެއިން 1,373,126,496 (އެއް ބިލިއަން ތިން ސަތޭކަ ހަތްދިހަ ތިން މިިލިއަން އެއް ލައްކަ ސައްބީސް ހާސް ހަތަރު ސަތޭކަ ނުވަދިހަ ހައެއް) ރުފިޔާގެ މުދަލާއި ހިދުމަތް ހޯދުމަށް ހަވާލުކޮށްފައި ވަނީ އާންމު ބީލަމުގެ އުސޫލުން ބޭރުން ކަމަށް ވަނީ ބުނެފަ އެވެ.

މި އެއްބަސްވުންތައް ހެދީ ދެތީން ފަރާތަކުން އަގު ހޯދައިގެން ކަމަށް ވެސް ވަނީ ބުނެފަ އެވެ.

އޮޑިޓްގައިވާ ގޮތުން އާންމު ބީލަމުގެ އުސޫލުން ބޭރުން ހޯދާފައިވާ މުދަލާއި ހިދުމަތްތަކަށް ބަލާއިރު 439 އެއްބަސްވުމެއްގެ ދަށުން ހޯދި މުދަލާއި ހިދުމަތް ހިމެނެ އެވެ. އެއީ ކަރަންޓް ކޭބަލް ގަތުމާއި ޖަނަރޭޓަރު ސެޓްތައް ގަތުމާއި ޓްރާސްފޯމަރު ގަތުމާއި ފެނާއި ނަރުދަމާގެ މަޝްރޫއުތަކުގެ އެކި މަސައްކަތްތައް ހެދި އެއްބަސްވުން ކަމަށް ވަނީ ބުނެފަ އެވެ.

މީގެ އިތުރުން މި ކަންކަމަށް މަގުފަހި ކުރުމަށް ކުންފުނީގެ އުސޫލުތަކަށް ބަދަލު ގެނެސް ގަވާއިދު ވެސް ވަނީ ބަދަލުކޮށްފައި ކަަމަށް އޮޑިޓް ރިޕޯޓްގައިވެ އެވެ.