ހުޅުމާލެއިން ދޫކުރި ގޯތިތަކުގައި ވިޔަފާރި ބޭނުމަށް ކަންކަން ކުރެވޭނެ ގޮތް ހަދަނީ
ހުޅުމާލެއިން ދޫކުރި ގޯތިތަކުގައި ވިޔަފާރި ބޭނުމަށް ކަންކަން ކުރެވޭނެ ގޮތް ހަމަޖައްސަން ނިންމާފައިވާ ކަމަށް ސަރުކާރުން މިރޭ ހާމަކޮށްފި އެވެ.
ސަރުކާރުން އެ ނިންމުން ހާމަކުރީ ހުޅުމާލެ ފޭސް ދޭއްގައި ތަރައްގީކޮށްފައިވާ ހިޔާ ޓަވަރުތަކުގައި އިތުރު ލިފްޓްތައް ހަރުކޮށް ނިންމުން ފާހަގަކުރުމަށް މިރޭ ބޭއްވި ހަފްލާއެއްގައި ކޮންސްޓްރަކްޝަން މިނިސްޓަރު ދެއްކެވި ވާހަކަފުޅުގަ އެވެ.
މިނިސްޓަރު މުއްތަލިބު ވިދާޅުވީ ހުޅުމާލޭގައި ފޯރުކޮށްދޭ ކޮންމެ ހިދުމަތަކީ އެޗްޑީސީގެ ބިމަކުން ފޯރުކޮށްދޭނެ ހިދުމަތަކަށްވާން ނުޖެހޭ ކަމަށެވެ. ހުޅުމާލޭގައި އެޗްޑީސީގެ ގިނަ ބިންތަކެއް މިހާރު ނެތްކަން ފާހަގަކޮށް މިނިސްޓަރު ވިދާޅުވީ ހުޅުމާލެ ދެ ފޭސް އިން އާންމުންނަށް ދެހާހަށްވުރެ ގިނަ ގޯތި ދޫކޮށްފައިވާ ކަމަށެވެ.
ނަމަވެސް ބިންތަކުގައި އިމާރާތްކުރާއިރު ވަރަށް ބޮޑަށް "ތަޅުއެޅިފައި" ވާ ކަމަށެވެ. އެ ބިންތަކުގައި އިމާރާތް ކުރަން ޖެހެނީ ހަމައެކަނި ދިރިއުޅުމަށް ކަމަށާ ނަމަވެސް އެއީ ރަނގަޅު ގޮތެއް ނޫން ކަމަށް ވިދާޅުވި އެވެ.
އަދި ވިދާޅުވީ އެ ބިންތަކުގައި ޕްރީސުކޫލާއި ކްލިނިކާއި ޝޮޕިން ކޮންޕްލެސްތައް ތަރައްގީކުރަން ފުރުސަތު ފަހިކޮށްދޭން ޖެހޭނެ ކަމަށެވެ. އެއީ މާލޭގައި ވެސް އެ ފުރުސަތު އޮތްގޮތް ކަމުގައި ވިދާޅުވި އެވެ.
"އަޅުގަނޑުމެން އެބަޖެހެއޭ ރައްޔިތުންނަށް ދޫކޮށްފައިވާ ބިންތަކުގައި ވިޔަފާރީގެ އުސޫލުން ތަރައްގީކޮށްގެން އެ ބިންތަކުން ފައިދާ ހޯދާ, މިތަނުގައި ދިރިއުޅޭ ރައްޔިތުންނަށް ހިދުމަތް ލިބޭނެ ގޮތްވެސް ތަނަވަސްކޮށްދޭން,"
މިނިސްޓަރު ވިދާޅުވީ މިކަމުން ބިންތައް ލިބިފައިވާ މީހުންނަށް ފައިދާވުމާއި މުޅި މުޖްތަމައުއަށް ފައިދާވާނެ ކަމަށެވެ. އަދި އިގްތިސާދަށް އަންނާނެ ހެޔޮ ބަދަލުތައް ފާހަގަ ކުރެއްވި އެވެ.
"ސަރުކާރުން މަސައްކަތް ކުރާނީ ރައްޔިތުންނަށް ފަސޭހަކަމާ ލުއިކަމާ ތަނަވަސްކަން ލިބޭނެ ގޮތަށް އެ ބިންތައް އެކަށީގެންވާ ގޮތެއްގައި ބޭނުންކުރެވޭނެ ގޮތްތަކެއް ތަނަވަސްކޮށްދެވޭތޯ," މުއްތަލިބު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
