އެހީތަކަށް އެދުމަށް ފަސޭހަކޮށްދިނުމަށް ހެންވޭރު ޓާމިނަލްގައި ހެލްޕް ޑެސްކެއް

ދައުލަތުގެ ވެލްފެއާ އެހީތަކަށް އާއްމުނަށް ވީހާވެސް ފަސޭހަގޮތެއްގައި އެދުމުގެ ފުރުސަތު ފަހިކޮށްދިނުމުގެ ގޮތުން ނޭޝަނަލް ސޯޝަލް ޕްރޮޓެކްޝަން އޭޖެންސީ، އެންސްޕާއިން ހާއްސަ ހެލްޕް ޑެސްކެއް ހެންވޭރު ފެރީ ޓާމިނަލްގައި ގާއިމްކޮށްފިއެވެ.

ސަރުކާރުން ވަނީ އެންސްޕާއިން ދެމުން އަންނަ ބައެއް މުހިންމު ހިދުމަތްތައް ރައްޔިތުންނަށް ފަސޭހަކޮށްދިނުމުގެ ގޮތުން ވަންގަވް މެދުވެރިކޮށް ހުށަހެޅޭނެ އިންތިޒާމް ހަމަޖައްސާފައެވެ. އެގޮތުން ތެރަޕީއަށް އެދި ހުށަހެޅުމާއި، ނުކުޅެދުންތެރިކަން ހުންނަ ފަރާތްތަކަށް ދޭ އެލަވަންސްގެ އިތުރުން އެކަނިވެރި މައިންނަށްދޭ އެލަވަންސް ފަދަ ހިދުމަތްތައް ވަނީ، ވަންގަވް މެދުވެރިކޮށް ހުށަހެޅޭނެ އިންތިޒާމް ހަމަޖައްސާފައެވެ.

ވަންގަވް މެދުވެރިކޮށް އެ ހިދުމަތްތަކަށް އެދުމުގައި ކޮންމެވެސް ވަރެއްގެ ދަތިތަކެއް ހުރުމުން ރައްޔިތުންގެ ޝަކުވާއަށް ބަލައި، އެންސްޕާއިން ވަނީ ހެންވޭރު ފެރީ ޓާމިނަލްގައި ހާއްސަ ހެލްޕް ޑެސްކެއް ގާއިމްކޮށްފައެވެ. އެންސްޕާއިން ބުނީ އެ ހެލްޕް ޑެސްކަށް ޒިޔާރަތްކުރުމުން ހިދުމަތްތަކަށް ރަޖިސްޓަރ ވުމާއި އެނޫންވެސް ދަތިވާ ކަންކަމުގައި އެހީތެރިވެދޭނޭކަމަށެވެ.

އެގޮތުން ރަޖިސްޓްރީ ވުުމުގެ އިތުރުން ވަންގަވް މެދުވެރިކޮށް ފޯމް ފުރުމާއި އެނޫންވެސް ބޭނުންވާ ކަންކަމުގައި ވަގުތުން އެހީތެރިވެދޭނެއެވެ.

ހެލްޕް ޑެސްކްގެ ހިދުމަތް ސަރުކާރު ބަންދުނޫން ކޮންމެ ދުވަހެއްގެ ހެނދުނު 8 ކުން ހަވީރު 4 ޖެހުމާ ހަމަޔަށް ލިބޭނޭކަމަށް އެންސްޕާއިން ވަނީ ބުނެފައެވެ.

އެންސްޕާއިން ދެމުން އަންނަ ބައެއް ހިދުމަތްތައް ރައްޔިތުންނަށް ލިބޭލެއް ލަސްވުމަކީ ރައްޔިތުންގެ ވަރަށްބޮޑު ޝަކުވާއަކަށް ވެފައި އޮންނަ ކަމެކެވެ. އެގޮތުން ތެރަޕީ ފަރުވާއަށް ފޯމުތައް ލައިގެން އެންސްޕާގެ ޖަވާބަކަށް އެދި ދިގު އިންތިޒާރެއް ކުރަންޖެހުމަކީ ރައްޔިތުންގެ ވަރަށްބޮޑު ޝަކުވާއަކަށް ވެފައި އޮންނަ ކަމެކެވެ.

އެންސްޕާގެ ސީއީއޯ ހީނާ ވަލީދު ވިދާޅުވެފައިވަނީ އެ އިދާރާގެ ހިދުމަތްތައް ވަން ގަވް ފަދަ ޑިޖިޓަލް ޕްލެޓްފޯމެއްގެ ތެރެއިން މުއާމަލާތްތައް ހިނގަން ފެށުމުން ރައްޔިތުންނަށް ހިދުމަތްދިނުމަށް މީގެކުރިން ހޭދަވާ ވަގުތަށް ކުޑަވެ، އަވަހަށް ހިދުމަތް ފޯރުކޮށްދެވިގެންދާނޭކަމަށެވެ.

ރައީސް އިބްރާހިމް މުހައްމަދު ސޯލިހް ސަރުކާރުގައި ނުކުޅެދޭ ފަރާތްތަކަށް ހާއްސަކޮށް ޑިޖިޓަލް ޕޯޓަލެއް ގާއިމްކުރިނަމަވެސް، ރައްޔިތުންނަށް އެ ޕޯޓަލް ބޭނުންކުރުމުގައި ދަތިއުނދަގޫ ކަންތައްތަކެއް ހުރުމާއެކު އެމްޑީޕީ ސަރުކާރުންވެސް އެ ޕޯޓަލްގެ ބޭނުން ހިފަމުން ގޮސްފައިނުވާކަން ފާހަގަކޮށްލެވެއެވެ.