މަޖިލީހުގެ ތަޅުމުން މެންބަރުން ނެރުނީ ގަވާއިދާ ހިލާފަށް: ނާޒިލް
ލިޔުންތެރިޔާ
ޚަދީޖާ އަރުފާ
ރައްޔިތުންގެ މަޖިިލިސް މި އަހަރަށް ހުޅުވުމުގެ ގޮތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ރިޔާސީ ބަޔާން އިއްވަވަން ފެއްޓެވުމުން، މަޖިލީހުގައި އަޑުގަދަކޮށް އިހުތިޖާޖުކުރި އެމްޑީޕީގެ މެންބަރުން ތަޅުމުން ނެރުނީ މަޖިލީހުގެ ގަވާއިދާ ހިލާފަށް ކަމަށް އެމްޑީޕީގެ ޕީޖީ ލީޑަރު އަދި ހިތަދޫ ދެކުނު ދާއިރާ އިބްރާހީމް ނާޒިލް ވިދާޅުވެއްޖެ އެވެ.
މިއަދުގެ ޖަލްސާގައި ރައީސް މުއިއްޒު ރިޔާސީ ބަޔާން އިއްވަވަން ފެއްޓެވުމާއެކު އެމްޑީޕީގެ ބައެއް މެންބަރުން މަޖިލީހުގެ ތަޅުމުގައި އިހުތިޖާޖުކޮށް އަޑު ގަދަ ކުރަން ފެށުމުން ރިޔާސަތުން ވަނީ މަޖިލީހުގެ ގަވާއިދަށް ހުރުމަތްތެރިކޮށް ހިތުމަށް މެންބަރުންނަށް ނަސޭހަތްތެރިވެ ވަޑައިގެންފަ އެވެ.
ނަމަވެސް، އެ މެންބަރުން ވަނީ، މަޖިލީހުގެ ތަޅުމުގައި އަޑުގަދަކުރައްވައި ނިޒާމު ގެއްލުވާލަން މަސައްކަތް ކުރައްވާފައެވެ. އެއާއެކު ރިޔާސަތުންވަނީ އެމްޑީޕީގެ ނުވަ މެންބަރެއްގެ ނަން އިއްވާފައެވެ.
އެގޮތުން ނަން އިއްވި މެންބަރުންނަކީ
ގަލޮޅު ދެކުނު ދާއިރާ - މީކާއީލު އަޙްމަދު ނަސީމް
ހަނިމާދޫ ދާއިރާ - ޢަބްދުލްޣަފޫރު މޫސާ
ވައިކަރަދޫ ދާއިރާ - ޙުސައިން ޒިޔާދު
ހިތަދޫ ދެކުނު ދާއިރާ - އިބްރާހީމް ނާޒިލް
ކެޔޮދޫ ދާއިރާ - މުޙައްމަދު ނިއުޝާދު
މަރަދޫ ދާއިރާ - އަޙްމަދުދީދީ
ތޮއްޑޫ ދާއިރާ - ޙުސައިން ސަމީރު
ކެންދޫ ދާއިރާ - މަޢުރޫފް ޛާކިރު
ގަލޮޅު އުތުރު ދާއިރާ - މުޙައްމަދު އިބްރާހީމް (ކުޑޫ)
ރިޔާސަތުން ނަން އިއްވުމުންވެސް އެ މެންބަރުން ވަނީ މަޖިލީހުގެ ތަޅުމުން ނުކުންނަން ދެކޮޅުހައްދަވާފައެވެ. އެހެންކަމުނަ، މެންބަރުން ނުކުންނަންދެން ޖަލްސާ މެދުކަނޑާލުމަށްފަހު އަބްދުއްރަހީމް އާއި ރައީސް މުއިއްޒު ރިޔާސަތު ދޫކުރައްވައި ވަޑައިގެންނެވި އެވެ.
އެފަހުން ދެން ޖަލްސާ ފަށާފައިވަނީ އެ މެންބަރުން މަޖިލީހުގެ ތަޅުމުން ނެރުމަށްފަހުގައެވެ.
އެކަން ހިނގައިދިޔަ ގޮތާއި ގުޅިގެން މީޑިއާއަށް މައުލޫމާތު ދެއްވަމުން ނާޒިލް ވިދާޅުވީ، ރިޔާސަތުގައި އެއްވެސް ބޭފުޅަކު ނެތީސް، އޭނާ އާއި އެމްޑީޕީ މެންބަރުން މަޖިލީހުގެ ތަޅުމުން ނެރުނީ ގަވާއިދާ ޚިލާފަށް ކަމަށެވެ. އަދި އެ ނެރެން އުޅުމުގެ ތެރެއިން އޭނާގެ ފަޔަށް އަނިޔާވި ކަމަށްވެސް ވިދާޅުވިއެވެ.
”މަޖިލީހުގެ ސެކިޔުރިޓީން ގާތު އަޅުގަނޑު ދެންނެވިން، މަޖިލީހުގެ ރިޔާސަތުގައި މިވަގުތު އެއްވެސް ބޭފުޅަކު ނެތޭ. އެހެންވީމާ މި ހާލަތުގައި އަޅުގަނޑުމެންނެއް އެގޮތަކަށް ނުވެއް ނެރެވޭނެ އޭ. މަޖިލިސް މެދުކެނޑިފައޭ އެ އޮތީ. މަޖިލިސް ފެށުމާއެކު، މަޖިލީހުގެ ރިޔާސަތަށް މަޖިލީހުގެ ރައީސް ވަޑައިގަތުމާއެކީގައި، އަޅުގަނޑުމެން ހަމަ ރުހުމުގައި ބޭރަށްދާނެ ވާހަކަ. ނަން އިއްވާފައި އޮތީމަ، ރުހުމުގައި ބޭރަށް ދާނެ ވާހަކަ އަޅުގަނޑު ދެންނެވިން.“ ނާޒިލް ވިދާޅުވިއެވެ.
ގަދަކަމުން އަޅުގަނޑުމެންނަށް އަނިޔާ ކޮށްފައި ނެރުނީ. މަޖިލިސް މެދުކެނޑިފައި އޮއްވާ އަޅުގަނޑުމެން ބޭރުކުރެވޭނެ އެއްވެސް ޖަގާއެއް މަޖިލީހުގެ ގަވާއިދު ތަންނުދޭ. އެވާހަކަ އަޅުގަނޑުމެން ތަފްސީލްކޮށް ބުނިން
މެންބަރު އިބްރާޙީމް ނާޒިލް
ނާޒިލް އިތުރަށް ވިދާޅުވީ، ރައީސުލްޖުމްހޫރިއްޔާ ޑރ މުޙައްމަދު މުޢިއްޒު މިދިޔަ އަހަރު އިއްވެވި ރިޔާސީ ބަޔާނުގައި އެމަނިކުފާނު ދެއްކެވި ވާހަކަފުޅާއި އަމަލުފުޅާއި ދިމާ ނުވާ ކަމަށާ، އެވާހަކަ ރައްޔިތުން ދައްކާއިރު، އެ އަޑު އެމަނިކުފާނަށް އިއްވުމުގެ މަސައްކަތް ހުއްޓުމެއްނެތި ކުރައްވާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
